ޖުޑީޝަލް ސާވިސް ކޮމިޝަން (ޖޭއެސްސީ)އަށް ދަށު ކޯޓުތަކުން އިންތިޚާބު ކޮށްފައިވާ މެމްބަރުގެ މަގާމަށް ކުރިމަތިލުމުގެ ފުރުސަތު ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) އިން މިއަދު ހުޅުވާލައިފިއެވެ.
އެ މަގާމަށް އާ ބޭފުޅަކު ހޮވުމަށް އިންތިހާބު ބާއްވަން ނިންމަވާފައިވަނީ މިހާރު ޖޭއެސްސީއަށް ދަށު ކޯޓުތަކުން އައްޔަން ކޮށްފައިވާ ފަނޑިޔާރުގެ ދައުރު ހަމަވާތީއެވެ. އެހެން ކަމުން ޑީޖޭއޭ މިއަދު ކޮށްފައިވާ އިއުލާންގައި ވިދާޅުވެފައިވަނީ ޖޭއެސްސީއަށް ދަށު ކޯޓުގެ ފަރާތުން އިންނަވާ ބޭފުޅަކު ކަނޑައެޅުމަށް ބާއްވާ އިންތިހާބު އަންނަ މަހު ގެ 24ވަނަ ދުވަހު ބާއްވަން ނިންމާފައިވާ ކަމަށެވެ. އަދި އެ މަގާމަށް ކުރިމަތިލުމުގެ މުއްދަތު މިއަދު ފެށިގެން އަންނަ މަހުގެ ހަތް ވަނަ ދުވަހުގެ 14:00ގެ ނިޔަލަށް ވަނީ ހުޅުވާލައްވާފައެވެ.
ދަށު ކޯޓުތަކުގެ ފަނޑިޔާރުންގެ ތެރެއިން ޖޭއެސްސީގައި މިހާރު އިންނަވަނީ ޑްރަގް ކޯޓުގެ ފަނޑިޔާރު މުހައްމަދު އީސާފުޅެވެ. އެ ބޭފުޅާގެ ފަސް އަހަރުގެ ދައުރު އަންނަ މަހު ހަމަވާނެ. އީސާފުޅު ޖޭއެސްސީއަށް އިންތިޚާބުވީ އޮގަސްޓް، 2014ގައެވެ.
ޖޭއެސްސީގައި ވަކީލުންގެ ފަރާތުން އިންނަވާނެ މެމްބަރަކު ކަނޑައެޅުމަށް ބާއްވާ އިންތިޚާބު އަންނަ ހޮނިހިރު ދުވަހު ބޭއްވުމަށް ވެސް ވަނީ ހަމަ ޖެހިފައިވެއެވެ. ވަކީލުންގެ ތެރެއިން ޖޭއެސްސީއަށް އާ ބޭފުޅަކު އިންތިހާބުކުރަނީ އެ މަގާމުގައި މިހާރު އިންނެވި ލަތީފާ ޤާސިމްގެ މަގާމު ގެއްލިފައިވާތީއެވެ.