ކޯވިޑް 19 އިން ރައްކާތެރިވުމަށްޓަކައި މީހުން އެއްވެ އުޅުން މިދުވަސްކޮޅު ރަނގަޅު ކަމަކަށް ނުވާތީ، އޭޕްރީލްމަހު ބޭއްވުމަށް ހަމަޖެހިފައި އޮތް ނައިޓް މާކެޓް ފަސްކޮށްފިއެވެ. މިއީ ރޯދަމަހަށް ޙާއްސަކޮށްގެން ބޭއްވުމަށް ނިންމާފައިވާ ނައިޓް މާކެޓެކެވެ.
ސިޓީކައުންސިލުން ބޭއްވި ބައްދަލުވުމުގައިވަނީ އޭޕްރީލްމަހުގެ ނައިޓްމާކެޓު ކުރިއަށްގެންދާނެ ފަރާތެއް ހޯދުމަށް އިޢުލާންކުރުން ފަސްކުރަންވެސް ނިންމާފައެވެ. ނަމަވެސް މިހާރު އޮތް ހާލަތު ރަގަޅުވެއްޖެ ހިނދެއްގައި ނައިޓު މަރކެޓު ބޭއްވުމުގެ ވިސްނުން ގެންގުޅޭ ކަމަށް މާލެ ސިޓީ ކައުންސިލުގެ މޭޔަރ ސިފާ މުޙައްމަދު ވަނީ ވިދާޅުވެފައެވެ.
އޭޕްރީލްމަހު ބޭއްވުމަށް ހަމަޖެހިފައިވާ ނައިޓް މާކެޓްގެ އިތުރުން ކެއަރ ސޮސައިޓީއިން ބޭއްވުމަށް ހުއްދަ ދީފައިވާ ފަންޑު ރެއިޒިން ހަރަކާތްވެސް ފަސްކުރުމަށް އެ ފަރާތަށް އެންގުމަށްވެސް މާލެ ސިޓީކައުންސިލުގެ ބައްދަލުވުމުގައި ވަނީ ނިންމާފައެވެ. ނައިޓް މާކެޓްއާއި ފެއަރ ބޭއްވުމުގެ އުސޫލާ އެއްގޮތަށް އަހަރަކު 2 ފަހަރު ނައިޓު މާރކެޓެއް ބޭއްވުމަށް މާލެ ސިޓީ ކައުންސިލުން ވަނީ ނިންމާފައެވެ.
އަދި ކުރިން ބޭއްވުމަށް ކަނޑައަޅާފައިވާ ނައިޓް މާރކެޓް ވީހާވެސް އަވަހަކަށް އިޢުލާންކޮށް ބަޔަކާއި ހަވާލުކުރުމަށް ކައުންސިލުން ދިޔައީ މަސައްކަތްކުރަމުންނެވެ. ކޮރޯނާ ވައިރަސް ފެތުރުން ހުއްޓުވުމަށްޓަކައި ސަރުކާރުން ފިޔަވަޅުތައް އަޅަމުންދާއިރު، ދުނިޔޭގެ އެކި ކަންކޮޅުތަކުގައި ގިނަ މީހުން ޖަމާވެގެން ބާއްވާ ހަރަކާތްތައް ދަނީ ކެންސަލްކުރަމުންނެވެ. މިގޮތުން ކޮންމެ އަހަރަކު ބާއްވާ އެންމެ ބޮޑު ޓުއަރިޒަމް ފެއަރކަމަށްވާ ޖަރމަން ބަރލިން ފެއަރވެސް ވަނީ މިއަހަރު ކެންސަލްކޮށްފައެވެ. މީގެ އިތުރުންވެސް ވިޔަފާރީއާ ގުޅުންހުރި ގިނަ ހަރަކާތްތަކެއް ކެންސަލްކޮށްފައިވާކަމަށް ޚަބަރުތައް ބުނެއެވެ.