އައްޑޫ ސިޓީގެ 3 ރަށެއްގައި ގޭދޮށު މަސް ފެކްޓަރީތައް ޑިޒައިންކޮށް، ތަރައްޤީކޮށް އަދި ހިންގާދޭނެ ފަރާތްތައް ހޯދުމުގެ މަސައްކަތް އައްޑޫ ސިޓީ ކައުންސިލުން ފަށައިފިއެވެ. ގޭދޮށު މަސް ފެކްޓަރީތައް ތަރައްޤީކުރުމަށް ޝައުގުވެރިވާ ފަރާތްތައް ހޯދުމަށް އިޢުލާންކޮށްފައިވަނީ، އައްޑޫ ސިޓީ ހިތަދޫ، މަރަދޫ އަދި ހުޅުދޫގައެވެ.
އިންޑިއާ ސަރުކާރުގެ އެހީތެރިކަމާއެކު އައްޑޫގައި ޤާއިމު ކުރާ ގޭދޮށު މަސް ފެކްޓަރީތައް ޤާއިމު ކުރުމަށް ޝައުގުވެރިވާ ފަރާތްތައް ހޯދުމަށް އައްޑޫ ސިޓީ ކައުންސިލުން ކޮށްފައިވާ އިޢުލާނުގައި ބުނެފައިވަނީ އިންޑިއާ އާއި ރާއްޖޭގެ ކުންފުނިތަކުން ބިޑު ހުށަހެޅުމަށް ހުޅުވާލާކަމަށެވެ. މިމަސައްކަތަކީ ލާމަރުކަޒީ ޤާނޫނުގެ ދަށުން ސިޓީ ކައުންސިލަށް ލިބޭ ބާރުގެ ދަށުން ސިޓީ ކައުންސިލުން ހުޅުވާލި މަޝްރޫޢެއްކަމަށް ސިޓީ ކައުންސިލުން ބުނެއެވެ.
ގޭދޮށު މަސް ފެކްޓަރީތައް ތަރައްޤީކުރާނެ ބަޔަކު ހޯދުމަށް ކޮށްފައިވާ އިޢުލާންގައި ވަނީ މި މަސައްކަތްކުރުމަށް ޝައުގުވެރިވާ ފަރާތްތަކުން މިއަދުން ފެށިގެން މިމަހުގެ 9 ވަނަ ދުވަހުގެ ނިޔަލަށް އައްޑޫ ސިޓީ ކައުންސިލުގައި ރަޖިސްޓްރީވުމަށް ވަނީ އެދިފައެވެ. ރަޖިސްޓްރީކުރުމަށް ފީއެއްގެ ގޮތުގައި 1500 ރުފިޔާ ދައްކަންޖެހެއެވެ. ބިޑު ހުށަހެޅުމާއި ބިޑު ހުޅުވުން އޮންނާނީ މިމަހުގެ 12 ވަނަ ދުވަހުކަމަށްވެސް ސިޓީ ކައުންސިލުން ބުނެއެވެ.
އައްޑޫ ސިޓީގެ ހިތަދޫ، މަރަދޫ އަދި ހުޅުމީދޫގައި ޤާއިމުކުރުމަށް ހަމަޖެހިފައިވާ ގޭދޮށު މަސްޕްލާންޓްތަކަކީ، އައްޑޫއިން މަސްކިރާ، ޕްރޮސެސްކުރުމުގެ މަސައްކަތް ކުރެވޭ ގޮތަށް ތައްޔާރުކުރާ ތަންތަނެވެ. މީގެ އިތުރުން 20 ޓަނުގެ އައިސް އުފައްދާ މި ޕްލާންޓް ތަކުގައި، 10 ޓަނުގެ މަސް ރައްކާކުރެވޭނެއެވެ. އަދި މިމަސް ޕްލާންޓު ތަކުގެ ސަބަބުން 400 ޓަނާއި 800 ޓަނާއި ދެމެދު މަސް ގަނެ ޕްރޮސެސް ކުރުމަށް މަގުފައިވެގެން ދާނެކަމަށް އައްޑޫ ސިޓީ ކައުންސިލުން ބުނެއެވެ.
އައްޑޫ ސިޓީގެ އިތުރުން މިއަހަރުގެ ތެރޭގައި ގޭދޮށު މަސް ފެކްޓަރީއެއް މ.އަތޮޅުގައި ޤާއިމްކުރާނެކަމަށް ފިޝަރީޒް މިނިސްޓަރ ޒަހާ ވަހީދުވަނީ ވިދާޅުވެފައެވެ. ރައްޔިތުންގެ މަޖިލީހުގައި މެމްބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރ ޒަހާ ވިދާޅުވެފައިވަނީ ގޭދޮށު މަސް ފެކްޓަރީ ރާއްޖޭގެ އެކި ސަރަހައްދުތަކުގައި ތަރައްޤީ ކުރުމުގެ މަސައްކަތް ކުރަމުންދާކަމަށެވެ.