އިންޓަރނެޓް މެދުވެރިކޮށް ފައިނޭންޝަލް ސްކޭމް، ނުވަތަ އޮޅުވާލައިގެން ފައިސާ އަތުލުމުގެ މުޢާމަލާތް
ހިންގަމުންދާކަމަށް އިންޓަރޕޯލުން އަންގާފައިވާކަމަށާ، އެކަމަށް ސަމާލުވުމަށް މޯލްޑިވްސް ޕޮލިސް ސަރވިސްއިން ވިދާޅުވެއްޖެއެވެ.
މޯލްޑިވްސް ޕޮލިސް ސަރވިސްއިން ވިދާޅުވީ ކޯވިޑް-19އާ ގުޅިގެން ރައްޔިތުންގެ އެތައް ބަޔަކު ކަންބޮޑުވުމެއްގައި އުޅެމުންދާ ދަނޑިވަޅެއްގައި ބައެއް ކުށްވެރިން ދުނިޔޭގެ އެކިކަންކޮޅުތަކުގައި ތިބި މީހުންނަށް އޮޅުވާލައިގެން އެކިގޮތްގޮތަށް އިންޓަރނެޓް މެދުވެރިކޮށް ފައިސާ ފޭރިގަތުމުގެ މުޢާމަލާތް ހިންގަމުންދާކަން އިންޓަރޕޯލުން އެޖަމްޢިއްޔާގެ ހުރިހާ މެމްބަރު ޤައުމުތަކަށް އަންގާފައިވާކަމަށެވެ.
މިގޮތުން ސަރޖިކަލް މާސްކާއި އެހެނިހެން ބޭސްފަރުވާގެ ޑިމާންޑު ބޮޑުވެ މިތަކެތި ފިހާރަތަކުން ލިބުމުގައި ދަތި ދުވަސްވަރެއްގައި، އިންޓަރނެޓް މެދުވެރިކޮށް ފޭކް ފިހާރަތައް ހިންގަމުންދާކަމަށް ފުލުހުން ވިދާޅުވެއެވެ. އަދި ފޭކު ވެބްސައިޓްތަކާއި ސޯޝަލް މީޑިއާ އެކައުންޓްތަކާއި އަދި މިފަދަ ތަކެތި ވިއްކާކަމަށް ދަޢުވާކުރާ އީމެއިލް އެޑްރެސްތައް މިދުވަސްވަރު އިތުރުވެފައިވާކަން އިންޓަރޕޯލުން ވަނީ ޤައުމުތަކުގެ ސަމާލުކަމަށް ގެނެސްފައެވެ. ފުލުހުން ވިދާޅުވީ ޢާއްމުން އޮންލައިންކޮށް ގަންނަ މާސްކާއި އެހެނިހެން މެޑިކަލް ސަޕްލައިތައް ނުލިބި އެމީހުންގެ ފައިސާތައް އޮންލައިންކޮށް ކުށްވެރިންނަށް ގެއްލޭ މިންވަރު އިތުރުވެފައިވާކަން އިންޓަރޕޯލުން ފާހަގަކޮށްފައިވާކަމަށެވެ.
އޮޅުވާލައިގެން ފައިސާ އަތުލާ ބައެއް ގޮތްތައް
- ކްލިނިކް ނުވަތަ ހޮސްޕިޓަލް އޮފިޝަލުންގެ ނަމުގައި މީހުންނަށް ފޯނުކޮށް އެމީހުންގެ ޢާއިލާ މެމްބަރެއް މިބަލީގެ ޝިކާރައަކަށްވެފައިވާކަމަށް ބުނެ އޮޅުވާލައިގެން ފައިސާ ހޯދުން
- ސިއްޙީ މާހިރުންގެ ނަމުގައި މީހުންނަށް އީ-މެއިލްކޮށް އެ އީ-މެއިލްގެ ޒަރިއްޔާއިން ފައިސާ އަތުލުން
އޮންލައިންކޮށް އެއްޗެއް ގަތުމުގެކުރިން ސަމާލުވާންވީ ބައެއް ކަންކަން
- އޮންލައިންކޮށް އެއްޗެއް ގަތުމުގެކުރިން އެތަކެތި ވިއްކާ ކުންފުނި ނުވަތަ މީހަކީ ސައްޙަ ފަރާތެއްތޯ ބަލައި ވެރިފައިކުރުން
- އޮންނައިން މުޢާމަލާތް ތިކުރެވެނީ ސައްޙަ ވެބްސައިޓެއް މެދުވެރިކޮށްތޯ ކަށަވަރުކުރުން
- އޮންލައިން ރިވިއުތައް ބެލުން
- ކުންފުނި ހުރި ޤައުމު ނޫން އެހެން ޤައުމެއްގައި ހުރި ބޭންކް އެކައުންޓަކަށް ޓްރާންސެކްޝަން ހަދަން ބުނާނަމަ އެޕޭމަންޓް ނުހަދައި އެކަން ފުލުހުންގެ ސަމާލުކަމަށް ގެންނައުން
- އޮޅުވާލުމުގެ ޝިކާރައަކަށް ވެއްޖެކަމަށް ޤަބޫލު ކުރެވޭނަމަ ވީ އެންމެ އަވަހަކަށް ބޭންކަށް އެކަން އަންގައި އެޓްރާންސެކްޝަން ހުއްޓުވަން މަސައްކަތް ކުރުން
- ގޮތްނޭނގޭ މީހުންނާއި އެކައުންޓްތަކުން ފޮނުވާފައި ހުންނަ ލިންކްތަކާއި އެޓޭޗްމަންޓްތައް ނުހުޅުވުން
- މެޑިކަލް އިކުއިޕްމަންޓްތައް ފޯރުކޮށްދޭކަމަށް ބުނެ ނުވަތަ މެޑިކަލް ޗެކްސް ހަދައިދޭނެކަމަށްބުނެ އީ-މެއިލްގެ ޒަރިއްޔާއިން މީހުންގެ ޒާތީ މަޢުލޫމާތައް އެދޭނަމަ އެ އީ-މެއިލްތަކަށް އިޖާބަ ނުދިނުން
މި ދުވަސްވަރު އޮންލައިންކޮށް ތަކެތި ގަންނަނަމަ، ތަކެތި ގަންނަ ކުންފުންޏާއި ވެބްސައިޓްތަކަކީ ސައްޙަ ވެއިބްސައިޓެއްތޯ ކަށަވަރުކުރެއްވުމަށް ފުލުހުން އިލްތިމާސްކުރައްވައެވެ.