އާއްމު ތަންތަނަށް އެއްވެ ދަރުސްތައް ބޭއްވުމުގެ ބަދަލުގައި، މީޑިއާގެ ވަސީލަތްތައް މެދުވެރިކޮށް ދީނީ މަޢުލޫމާތު ފޯރުކޮށްދެމުން ގެންދިއުމަށް އިސްލާމިކް މިނިސްޓްރީއިން އިލްތިމާސްކުރައްވާފައެވެ.
އެއްވެ އުޅުން މަދުކުރުމަށް އަޅާ ފިޔަވަޅެއްގެ ގޮތުން މިސްކިތްތަކުގައި ދީނީ ނަސޭހަތް ދިނުމަށް ކުރިއަށްގެންދާ ޕްރޮގްރާމް ވަގުތީ ގޮތުން މެދުކަނޑާލުމަށް އިސްލާމިކް މިނިސްޓްރީން ވަނީ ނިންމާފައެވެ. މިކަމާއި ގުޅިގެން އިސްލާމިކް މިނިސްޓްރިއިން ބުނެފައި ވަނީ މިވަގުތު މިސްކިތްތަކުގައާއި އާއްމު ތަންތަނުގައި ދަރުސް ދިނުމުގެ ހުއްދަ ދީފައިވާ ހުރިހާ ފަރާތްތަކުންވެސް މިނިސްޓްރިއިން އަންގަންދެން ދަރުސްދިނުމުގެ ޕްރޮގްރާމްތައް ހުއްޓާލުމަށް އަންގާކަމަށެވެ.
މިގޮތަށް ނިންމާފައިވަނީ ރާއްޖެއިން ކޮރޯނާ ވައިރަހުގެ ކޭސްތައް ފެނިފައި ވާތީ، އިތުރަށް މިބަލި ރާއްޖެއިން ފެނުން ހުއްޓުވުމަށް އަޅާ ރައްކާތެރިކަމުގެ ފިޔަވަޅެއްގެ ގޮތުންނެވެ. ނަމަވެސް އޭގެބަދަލުގައި މީޑިއާގެ ވަސީލަތްތައް މެދުވެރިކޮށް ދީނީ މަޢުލޫމާތު އާއްމުންނަށް ފޯރުކޮށްދިނުމަށް އިސްލާމިކް މިނިސްޓްރީއިން އިލްތިމާސްކުރެއެވެ.
މީގެއިތުރަށް މިނިސްޓްރީއިން ވަނީ ކޯވިޑް 19އާއި ގުޅިގެން ރަށްރަށުގައި "ބޮޑުދުމާ ހިނގުން" ނުވަތަ ޖަމާޢަތުގައި މީހުން ތަކްބީރް ކިޔަމުން ހިނގާކަން ފާހަގަވެފައި ވާތީ، އެކަން އެގޮތަށް ނުކުރުމަށް ނަސޭހަތްތެރިވެފައެވެ. މިނިސްޓްރީން ބުނެފައި ވަނީ މިކަމަކީ ކީރިތި ރަސޫލާގެ ސުންނަތުން ސާބިތުވާ ކަމަކަށް ނުވާތީއާއި މިދަނޑިވަޅުގައި މީހުން އެއްވެ އުޅުމަކީ ރައްކާތެރި ކަމަކަށް ނުވާތީ އެކަން އެގޮތަށް ނުކުރުމަށް ނަސޭހަތްތެރިވާކަމަށެވެ.
މީގެބަދަލުގައި ފަރުޟު ފަސް ނަމާދު ޤާއިމުކުރުމާއި، މިފަދަ ނުރައްކާތެރި ވަބާތަކުން ރައްކާތެރިކަން ދެއްވުމަށް އެދި ﷲގެ ހަޟްރަތުގައި އިބްތިހާލުވެ ދުޢާ ދަންނެވުމަށް އިސްކަންދިނުމަށް އިލްތިމާސްކޮށްފައިވެއެވެ.
މިޙާލަތުގައި ކުރިއަށްގެންދާ ކޮންމެ ކަމެއްގައިވެސް، ސިއްޙީ ދާއިރާގެ އިލްތިމާސްތަކަށް ބޯލަނބައި އެގޮތަށް ޢަމަލުތައް ބެހެއްޓުމަށް އިސްލާމިކް މިނިސްޓްރީން ވަނީ އެދިފައެވެ.
ކޯވިޑް 19އަކީ ގައިން ގަޔަށް އަރާ ބައްޔަކަށް ވުމާއިއެކު، އެއްވެ އުޅުން ވީހާވެސް މަދުކުރުމަށް އެޗްޕީއޭއިން ވަނީ އިލްތިމާސްކޮށްފައެވެ.
އިސްލާމިކް މިނިސްޓްރީއިންވަނީ ހުންއައުމާއި، ކެއްސާ ކިނބިހިއެޅުންފަދަ ބަލީގެ އަލާމާތްތައް ހުރި މީހުންނާއި، ކުޑަކުދިންނާއި އުމުރުންދުވަސްވީ މީހުން އަދި ބަލި މީހުން މިސްކިތަށް ޖަމާޢަތަށް ނުދިއުމަށް އިލްތިމާސްކުރައްވާފައެވެ. އަދި މިސްކިތްތަކުގައި ކުރިއަށްގެންދާ ޤުރުއާން ކްލާސްތައް މެދުކަނޑާލުމާއި، ހުކުރު ޚުތުބާ ކުރުކުރުމާއި، އަދި ބަލިން ރައްކާތެރިކޮށްދިނުމަށް އެދި މިސްކިތްތަކުގައި ކުރެވޭ ފަރުޟު ޖަމާއަތު ނަމާދުގެ ތަކުގެ ތެރެއިން އަޑުހަރުކޮށް ކިޔަވާ ނަމާދުތަކުގައި ޤުނޫތުއް ނާޒިލާ ކިޔަން އެމިނިސްޓްރީން ވަނީ އަންގަވާފައެވެ.