30 އަހަރު ތެރޭގައި ފުރަތަމަ ފަހަރަށް އޮސްޓްރޭލިއާގެ އިޤްތިޞާދު މަޑުޖެހުމަކަށް ނުވަތަ ރިސެޝަނަކަށް ހިނގައްޖެއެވެ.
އޮސްޓްރޭލިއާގެ ކަމާބެހޭ ފަރާތްތަކުން ހާމަކޮށްފައިވާ މަޢުލޫމާތުތަކަށް ބަލާއިރު، މިއަހަރުގެ ފުރަތަމަ ކުއާޓަރާ އަޅާބަލާއިރު އޮސްޓްރޭލިއާގެ ޤައުމީ އުފެއްދުންތެރިކަން ނުވަތަ ޖީޑީޕީ ވަނީ 7 އިންސައްތަ ދަށަށް ގޮސްފައެވެ. މިއީ 1959 ވަނަ އަހަރަށްފަހު އިޤްތިޞާދު މިހާ ބޮޑަށް އަޑިއަޅާލި ފުރަތަމަ ފަހަރެވެ. މިއަހަރުގެ ފުރަތަމަ ކުއާޓަރުގައިވެސް އޮސްޓްރޭލިއާގެ އިޤްތިޞާދު ވަނީ 0.3 އިންސައްތަ ދަށަށް ގޮސްފައެވެ.
2008 ވަނަ އަހަރު މުޅި ދުނިޔެއަށް ކުރިމަތިވި އިޤްތިޞާދީ ހީނަރުކަމުގައި ބޮޑެތި އިޤްތިޞާދުތަކުގެ ތެރެއިން އޮސްޓްރޭލިއާއަކީ އިޤްތިޞާދީ ރިސެޝަނަކަށް ނުގޮސް އޮތް ހަމައެކަނި ޤައުމެވެ. ނަމަވެސް މިއަހަރު އޮސްޓްރޭލިއާގެ އިޤްތިޞާދަށް މަޑުޖެހުމެއް އައިސްފައިވާއިރު، އޭގެ ސަބަބުތަކުގެ ތެރޭގައި ކޯވިޑްގެ ސަބަބުން ކުރިމަތިވި އިޤްތިޞާދީ ހީނަރުކަމާއި މިއަހަރު ކުރީކޮޅު އެޤައުމުގައި ހިނގި އަލިފާނުގެ ހާދިސާތަކުން ކުރި އަސަރު ހިމެނެއެވެ.
ކޯވިޑްގެ ސަބަބުން އިޤްތިޞާދަށް ކުރަމުންދާ އަސަރުތަކުގެ ތެރެއިން އެޤައުމުގެ މިލިއަނެއްހާ މީހުންގެ ވަޒީފާ ގެއްލިފައިވާކަމަށް ޚަބަރުތައް ބުނެއެވެ. އިޤްތިޞާދަށް ކުރިމަތިވެފައިވާ ހީނަރުކަމުން އަރައިގަތުމަށް އޮސްޓްރޭލިއާގެ ސަރުކާރުން ގިނަ މަސައްކަތްތަކެއް ކުރަމުންދާއިރު، އޭގެ ތެރޭގައި އިޤްތިޞާދުގައި ދައުރުވާ ފައިސާ އިތުރުކުރުން ހިމެނެއެވެ.
ތަޖުރިބާކާރުން ބުނާގޮތުން އޮސްޓްރޭލިއާގެ އިޤްތިޞާދަށް މަޑުޖެހުމެއް އަޔަސް، ދުނިޔޭގެ އެހެން އިޤްތިޞާދުތަކާ އަޅާކިޔާއިރު އޮސްޓްރޭލިއާގެ އިޤްތިޞާދު އޮތީ ރަނގަޅު ހާލަތެއްގައެވެ.