އޮކްޓޫބަރުމަހުގެ ނިޔަލަށް ރާއްޖޭގެ 94 އިންސައްތަ ރިސޯޓް ފަތުރުވެރިންނަށް އަލުން ހުޅުވާލެވޭނެކަމަށް މޯލްޑިވްސް މާކެޓިންގ އެންޑް ޕީއާރު ކޯޕަރޭޝަން، އެމްއެމްޕީއާރުސީން ބުނެފިއެވެ.
ރާއްޖެއަށް އެންމެ ގިނައިން ފަތުރުވެރިންނަށް އަންނަ އެއް މަންޒިލްކަމަށްވާ އިނގިރޭސިވިލާތުގެ ގްލޯބްޓްރެންޑް މެގަޒިންއަށް މަޢުލޫމާތުދެއްވަމުން އެމްއެމްޕީއާރުސީގެ މެނޭޖިންގ ޑިރެކްޓަރ ތޮއްޔިބް މުހައްމަދު ވިދާޅުވީ، ޖުލައިމަހުގެ 15 ވަނަ ދުވަހު ރާއްޖޭގެ ބޯޑަރު ހުޅުވާލިފަހުން ވަރަށް ގިނަ ރިސޯޓްތަކެއް ހުޅުވާފައިވާކަމަށެވެ. އަދި މިހިނގާ ސެޕްޓެމްބަރުމަހުގެ ތެރޭގައިވެސް އިތުރު 29 ރިސޯޓެއް އަލުން ހުޅުވާނެކަމަށާއި، އުއްމީދުކުރަނީ ރާއްޖޭގައި އޮޕަރޭޓްކުރާ 156 ރިސޯޓްގެ ތެރެއިން 146 ރިސޯޓެއް އޮކްޓޫބަރުމަސް ނިމެންވާއިރަށް ހުޅުވުންކަމަށް ތޮއްޔިބް ވިދާޅުވިއެވެ.
ބޯޑަރު ބަންދުކޮށްފައި އޮތުމަށްފަހު ރިސޯޓްތަކާއި ސަފާރީތައް ފަތުރުވެރިންނަށް ހުޅުވާލާފައިވާއިރު، އަންނަމަހު މާލެ ސަރަހައްދު ފިޔަވައި ދެން ހުރި ސަރަޙައްދުތަކުގެ ގެސްޓްހައުސްތައް ހުޅުވުމަށް ސަރުކާރުން ދަނީ މަސައްކަތްކުރަމުންނެވެ. އަދި ނޮވެމްބަރުމަހު މާލެ ސަރަޙައްދުގެ ގެސްޓްހައުސްތައް ހުޅުވޭތޯވެސް ސަރުކާރުން ދަނީ މަސައްކަތްކުރަމުންނެވެ.
ރާއްޖޭގެ ބޯޑަރުތައް ފަތުރުވެރިންނަށް އަލުން ހުޅުވާލާފައިވާއިރު، ރާއްޖޭގައި އަޅާފައިވާ ރައްކާތެރިކަމުގެ ފިޔަވަޅުތައް ބޭރުގެ މީޑިއާތަކުން ދަނީ ފާހަގަކުރަމުންނެވެ. އެގޮތުން ފަތުރުވެރިންނަށް ރިސޯޓުގައި ޚިދުމަތްދޭ މުވައްޒަފުންގެ ރައްކާތެރިކަމަށް ޙާއްސަ ގައިޑްލައިންތައް އެކުލަވާލާފައިވާކަން މީޑިއާތަކުން ފާހަގަކުރެއެވެ. އަދި ރާއްޖެ އައުމުގެ ކުރިން ނެގެޓިވް ޕީސީއާރު ޓެސްޓެއް ހުށަހަޅަންޖެހޭއިރު، ރާއްޖެ އަންނަ ހިސާބުން ފަތުރުވެރިން ކޯވިޑްއަށް ޓެސްޓްކުރުމަށް ހަމަޖައްސާފައިވާ އިންތިޒާމްތަކާ ބެހޭ މަޢުލޫމާތުތައްވެސް ބޭރުގެ މީޑިއާތަކުން ދަނީ ފާހަގަކުރަމުންނެވެ.
ރާއްޖޭގެ ފަތުރުވެރިކަމުގެ ސިނާއަތް އަނެއްކާވެސް ކޮޅަށް ޖެހުމަށް ޓުއަރިޒަމް މިނިސްޓްރީއާއި އެމްއެމްޕީއާރުސީން ގިނަ މަސައްކަތްތަކެއް ކުރަމުންދާއިރު، ބޭރުގެ މީޑިއާތަކާ ގުޅިގެން ރާއްޖެ އިޝްތިހާރުކުރުމަށް އެމްއެމްޕީއާރުސީން ދަނީ ގިނަ މަސައްކަތްތަކެއް ކުރަމުންނެވެ.