ހއ. ހޯރަފުށީގައި ތަރައްޤީކޮށްފައިވާ އެއަރޕޯޓަށް މިމަހުގެ 16 ވަނަ ދުވަހު ޓެސްޓް ފްލައިޓް ޖައްސަން ނިންމައިފިއެވެ.
ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަހްމަދު ޒުހައިރު ވިދާޅުވީ އަންނަ ހަފްތާގެ ހޯމަދުވަހު ހޯރަފުށީގައި ތަރައްޤީކޮށްފައިވާ އެއަރޕޯޓަށް ޓެސްޓް ފްލައިޓް ޖައްސާނެކަމަށާއި އެ އެއަރޕޯޓް ރަސްމީކޮށް މިމަހުގެ 17 ވަނަ ދުވަހު ހުޅުވަން ނިންމާފައިިވާކަމަށެވެ. އަދި ޓެސްޓް ފްލައިޓް ޖެއްސުމަށްފަހު އިތުރު މައްސަލައެއް ނެތްނަމަ ވީއެންމެ އަވަހަކަށް ޝެޑިއުލް ދަތުރުތައް ފަށާނެކަމަށް ޒުހައިރު ވިދާޅުވިއެވެ. ޒުހައިރު ވިދާޅުވީ އެއަރޕޯޓް ހުޅުވުމަށްޓަކައި މިހާރު ވާންޖެހޭ ތައްޔާރީތައް ވަމުން އަންނަކަމަށެވެ.
ހއ.ހޯރަފުށީގައި ތަރައްޤީކުރަނީ 1200 މީޓަރު ދިގު، 35 މީޓަރު ފުޅާ ރަންވޭއެކެވެ. 8635 ސްކުއަރ މީޓަރުގެ އޭޕްރަން އަކާއި ޓެކްސީ ވޭއެއްގެ އިތުރުން ސާވިސް މަގުތަކާއި، 9473 ސްކުއަރ މީޓަރުގެ ޕާކިން އޭރިއާއަކާއި 1718 ސްކުއަރ މީޓަރުގެ ފަޔާ އެކްސެސް މަގެއް ހެދުމަށް ހަމަޖެހިފައިވެއެވެ.
ކުރީ ސަރުކާރުން ހއ މާފިނޮޅުގައި ތަރައްގީ ކުރަން ނިންމި އެއަރޕޯޓު ހޯރަފުށީގައި އެޅުމަށް ނިންމީ މި ސަރުކާރުންނެވެ. 2019 ވަނަ އަހަރު އޭޕްރީލްމަހު ހޯރަފުށީ ފަޅުން 16ހެކްޓަރުގެ ބިން ހިއްކައިގެން އެރަށުގައި އެއަރޕޯޓް ތަރައްޤީކުރަން ފެށި މަޝްރޫޢަކީ ހއ.އަތޮޅުގެ އުތުރުގެ ރަށްތަަކަށް އޮތް ދަތުރުފަތުރުގެ ދަތިކަމަށް ޙައްލު ހޯދުމަށް ފެށި އުންމީދީ މަޝްރޫޢެކެވެ
ހޯރަފުށި އެއަރޕޯޓް ހެދުމަށްޓަކައި 198 މިލިޔަން ރުފިޔާ ޚަރަދުވެފައިވެއެވެ.