ކޯވިޑާއިއެކުވެސް ރާއްޖޭގެ ފަތުރުވެރިކަން އަލުން ކޮޅަށްޖެހުމުގައި މުޅި އިންޑަސްޓްރީގެ ބޮޑު އެއްބާރުލުމެއް ލިބެމުންދާކަމަށާއި، މިކަން މިގޮތުގައި ދެމެހެއްޓުމަށް އެކުގައި މަސައްކަތްކުރުމަށް މޯލްޑިވްސް މަރކެޓިންގ އެންޑް ޕީއާރް ކޯޕަރޭޝަން، އެމްއެމްޕީއާރްސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ގޮވާލައްވައިފިއެވެ.
ރާއްޖެއަށް މިއަހަރު ޒިޔާރަތްކުރި 5 ލައްކަވަނަ ފަތުރުވެރިޔާ ޒިޔާރަތްކުރުން ފާހަގަކުރުމަށް ބޭއްވި ރަސްމިއްޔާތުގައި އެމްއެމްޕީއާރްސީގެ މެނޭޖިންގ ޑިރެކްޓަރ ޠައްޔިބް މުހައްމަދު ވިދާޅުވީ، މިހާރު މިފެންނަ ކާމިޔާބީއަކީ ބޯޑަރު ބަންދުވެފައި އޮތް އިތުރުވެސް ރާއްޖެ މަރކެޓް ކުރުމަށް ކުރަމުންދިޔަ މަސައްކަތުގެ ފޮނި ނަތީޖާކަމަށެވެ. އެގޮތުން މިދިޔަ އަހަރުގެ ޕީކް ސީޒަންގައި ދުވާލަކަށް އަންނަމުންދިޔަ ފަތުރުވެރިންގެ އަދަދާއި ދާދި ގާތަށް މިއަހަރު މިފެށުނު ސީޒަންގައިވެސް ފަތުރުވެރިން އަންނަން ފަށާފައިވާކަމަށް ޠައްޔިބު ވިދާޅުވިއެވެ.
ޠައްޔިބު ވިދާޅުވީ ކޯވިޑާއިއެކުވެސް ފަތުރުވެރިކަން ކުރިއަށް ގެންދިއުމުގެ ފުރުސަތު ފަހިކޮށްދިނުމަށް އެމްއެމްޕީއާރްސީއާއި، ކަމާއިގުޅޭ މިނިސްޓްރީތަކުގެ އިތުރުން ހެލްތު ޕްރޮޓެކްޝަން އެޖެންސީންވެސް ބޮޑު އެއްބާރުލުމެއް ދެމުންދާކަމަށެވެ. އަދި ފަތުރުވެރިކަމުގެ ޚިދުމަތް ފޯރުކޮށްދޭ ރިސޯޓްތަކާއި، ގެސްޓްހައުސްތަކާއި، ލިވަރބޯޑް އަދި ފަތުރުވެރިކަމުގެ ދާއިރާގެ މުޅި މަރކެޓް ގުޅިގެން މުހިންމު މަސައްކަތްތަކެއް ކުރަމުންދާކަން އޭނާ ފާހަގަކުރެއްވިއެވެ.
"ކުރިއަށް އޮތް މަހުގައިވެސް ގިނަ އެއަރލައިންތަކުގެ ދަތުރު ފެށުމަށް ތައްޔާރުވެފައިވަނީ. މި ހޯދަމުންދާ ކާމިޔާބީ މިގޮތުގައި ހިފެހެއްޓުމަށް މަރކެޓް އިޝްތިހާރު ކުރާ ފަރާތްތަކާއި، ރިސޯޓްތަކާއި ގެސްޓްހައުސްތަކާއި ލިވަބޯޑް ހޮޓާތަކާއި، އެންމެން ގުޅިގެން މަސައްކަތްކުރަންޖެހޭ." ޠައްޔިބު ވިދާޅުވިއެވެ.
ރާއްޖެއަށް ދުވާލަކު އަންނަ ފަތުރުވެރިންގެ އަދަދު 3000 އިން މައްޗަށް މިހާރު ވަނީ އަރާފައެވެ. އެއަރލައިންތަކާއި ފަތުރުވެރިން އަންނަ މިންވަރު އިތުރުވަމުން އަންނައިރު، މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އެމްއޭސީއެލްއިންވެސް ވަނީ ސީޒަނަށް ވަރަށް ބޮޑަށް ތައްޔާރުވެފައެވެ. އެމްއޭސީއެލްގެ ޖެނެރަލް މެނޭޖަރ ހަސަން އަރީފް ވިދާޅުވީ މިދިޔަ މަހަށްވުރެ މިމަހު ފްލައިޓް އައި މިންވަރު %33 އިތުރުވެފައިވާކަމަށެވެ.
"މިހާރު މީހުން އަންނަ މިންވަރު އިތުރުވާތީ އެޗްޕީއޭއާ ގުޅިގެން ގައިޑްލައިންތައް ރިވިއުކޮށް، ކަނޑައަޅާ ގޮތްތަކަށް ރައްކާތެރިކަން ކަށަވަރުކުރަމުންދަނީ. އަދި އިތުރު ވެހިކަލްތަކާއި ރިސޯސް ބޭނުންކޮށްގެން، ދަތިތައް ނާންނާނެގޮތަށް ޚިދުމަތް ދެމުން މިދަނީ." އަރީފް ވިދާޅުވިއެވެ.
ކޯވިޑް-19އާއި ގުޅިގެން ރާއްޖޭގެ ބޯޑަރ ބަންދުކޮށްފައި އޮތުމަށްފަހު 15 ޖުލައިގައި ބޯޑަރު އަލުން ހުޅުވާލިފަހުން 19 އެއަރލައިނަކުން ވަނީ ރާއްޖެއަށް ދަތުރުތައް ފަށާފައެވެ. މިމުއްދަތުގައި ލައްކައަކަށްވުރެ ގިނަ ފަތުރުވެރިންވަނީ ރާއްޖެއަށް ޒިޔާރަތްކޮށްފައެވެ.