ރ. ކިނޮޅަހުގައި އާއްމު ތަންތަނުން ނަގާ ކުނި މެނޭޖުކުރުމަށް، ބީއެމްއެލް ކޮމިއުނިޓީ ފަންޑުގެ ދަށުން ލުއި ގޮތެއް އެރަށު ރައްޔިތުންނަށް ފަހިވެއްޖެއެވެ.
ބީއެމްއެލް ކޮމިއުނިޓީ ފަނޑުގެ ކިނޮޅަހުގެ އާންމު ސަރަހައްދުތަކުގައި ކުނި މެނޭޖު ކުރުމުގެ މަސައްކަތަށް ޕްރޮޕޯސަލް ހުށަހެޅީ އެރަށު ރައްޔިތެއް ކަމަށްވާ ވާފިރު އަހުމަދެވެ. އޭނާ މިމަސައްކަތް ކުރުމަށް ޕްރޮޕޯސަލް ހުށަހެޅިއިރު، އެރަށު ކައުންސިލުން އައީ ރަށުގެ ގޭބީސީތަކުގައި އުފެދޭ ކުނި މެނޭޖު ކުރުމުގެ މަސައްކަތް ކުރަމުންނެވެ. ނަމަވެސް މިކަމުގައި ކައުންސިލަށް ބޮޑެތި ގޮންޖެހުންތަކެއް ހުއްޓެވެ.
މިމަޝްރޫއުގެ ދަށުން އެރަށުގެ ފަސް ސަރަހައްދެއްގައި ޑަސްބިން ބަހައްޓައި، އެކި ބާވަތްތަކުގެ ކުނި ވަކި ކުރެވޭނެ ނިޒާމެއް ވަނީ ޤާއިމު ކޮށްފައެވެ. އެގޮތުން އަލުން ދެވަނަ ފަހަރަށް ބޭނުން ކުރެވޭނެ ކުނި އަދި ދެވަނަ ފަހަރަށް ބޭނުން ނުކުރެވޭނެ ކުނި ވަކި ކުރެވޭނެ އިންތިޒާމު ވަނީ ހަމަޖެހިފައެވެ.
މި ޕްރޮޖެކުޓް ކާމިޔާބުކަމާއެކު ނިންމާލުމަށް ފަހު ވާފިރު ބުނެފައިވަނީ، އެރަށުގައި ބަނދަރު ސަރަހައްދާއި އެހެން ސަރަހައްދު ތަކުގައި އުފެދޭ ކުނި ވަކިކޮށް އެޅޭނެ ޑަސްބިން ބެހެއްޓިގެން ދިއުމަކީ އެރަށުގައި ކުނި މެނޭޖު ކުރުމަށް ލިބިގެންދާ ވަރަށް ބޮޑު ލުޔެއް ކަމަށެވެ. އަދި މިއީ ރަށަށް ލިބިގެންދާ ޒީނަތްތެރިކަމެއްކަން ފާހަގަކޮށް އޭނާ ބުނީ، "ރީތި ކިނޮޅަސް، މަގޭ ކިނޮޅަސް" މި ޝީއާރާއި އެއްގޮތަށް އެންމެންގެ އެއްބާރުލުން ލިބޭނެ ކަމަށް އުންމީދު ކުރާކަމަށެވެ.
އަހަރެންގެ ބޭންކް ކޮމިއުނިޓީ ފަންޑަށް ހުށަހަޅާ ޕްރޮޕޯސަލްތަކަކީ ހިލޭ ސާބަހަށް ކުރާ މަސައްކަތްތަކާއި ތައުލީމާއި ކުޅިވަރު ހަރަކާތްތަކުގެ އިތުރުން ތިމާވެށި ހިމާޔަތްކުރުން ފަދަ ކަންކަމަށް އަމާޒުކޮށްގެން ހުށަހެޅޭ ޕްރޮޕޯސަލްތަކެކެވެ. ބީއެމްއެލް އިން މިހާރު ވަނީ މިގޮތަށް ހިންގާ ޕްރޮޖެކްޓުތަކަށް ޕްރޮޕޯސަލް ހުށަހެޅުމަށް މާރިޗު 6 ވަނަ ދުވަހުގެ ނިޔަލަށް ހުޅުވާލާފައެވެ.