ބައިނަލްއަޤްވާމީ 32 އެއަރލައިނަކުން މިހާރު ރާއްޖެއަށް ދަތުރުކުރަމުން އަންނަ ކަމަށް ޓޫރިޒަމް މިނިސްޓްރީން ހާމަކޮށްފިއެވެ. މީގެތެރޭގައި ޝެޑިއުލް ދަތުރުތައް ބާއްވާ އެއަރލައިންތަކާއި، ޗާޓަރ ދަތުރުތައް ބާއްވާ އެއަރލައިންތައްވެސް ހިމެނެއެވެ.
ޓުއަރިޒަމް މިނިސްޓްރީން އާއްމުކޮށްފައިވާ އެންމެ ފަހުގެ 'މޯލްޑިވްސް ޓޫރިޒަމް އަޕްޑޭޓްސް' ރިޕޯޓުގައިވާ ގޮތުން ގިނަ އަދަދެއްގެ އެއަރލައިންތަކަކުން މިހާރު އަންނަނީ ރާއްޖެއަށް ދަތުރުކުރަމުންނެވެ. ރާއްޖޭގެ ބޯޑަރު އަލުން ބައިނަލްއަޤްވާމީ ދަތުރުތަކަށް ހުޅުވާލީ މިދިޔަ އަހަރުގެ ޖުލައި މަހުގެ 15 ވަނަ ދުވަހުއެވެ. އެދުވަހުން ފެށިގެން މިއަހަރުގެ މާރޗް މަހުގެ 3 ވަނަ ދުވަހާއި ހަމައަށް ރާއްޖެއަށް ޝެޑިއުލްކޮށްގެން 23 ފްލައިޓަކުން އަންނަނީ ދަތުރުކުރަމުންނެވެ. އަދި ބައިނަލްއަޤްވާމީ 9 ފްލައިޓަކުން އަންނަނީ ޗާޓަރ ދަތުރުތައް ކުރަމުންނެވެ.
ރާއްޖެއަށް ޝެޑިއުލް ދަތުރުތައް ބާއްވަމުންދާ އެއަރލައިންތަކުގެތެރޭގައި އެމިރޭޓްސް، އޭރޯފްލޮޓް، އެއަރ އިންޑިއާ، އެޑްލްވެއިސް، އެމިރޭޓްސް، އިއްތިހާދު އެއަރވޭސް، ޤަތަރު އެއަރވޭސް، ސްޕައިސްޖެޓް، ސްރީލަންކަން އެއަރލައިން، ޓާކިޝް އެއަރލައިން ފާހަގަކޮށްލެވެއެވެ.
އަދި ރާއްޖެއަށް ޗާޓަރު ދަތުރުތައް ބާއްވާ އެއަރލައިންތަކުގެ ތެރޭގައި އެއަރ އަސްތާނާ، އަޒުރު އެއަރ ޔޫކްރެއިން، ގުލިވައާ، ޔޫކްރެއިން އިންޓަރނޭޝަނަލް، ސްކެޓް އެއަރވޭސް، އުޒްބަކިސްތާން އެއަރވޭސް އަދި ބުއޫ އެއަރ ގެއިތުރުން ވިސްތާރާ ހިމެނެއެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާގޮތުން ރާއްޖެއަށް އެންމެ ގިނަ އަދަދަކަށް ފަތުރުވެރިން އައިސްފައިވަނީ އެމިރޭޓްސް އެއަރލައިންސްގެ ފްލައިޓުތަކުގައެވެ. އެގޮތުން މިއަހަރުގެ އެއްވަނަ ދުވަހުން މާރޗް މަހުގެ 3 ވަނަ ދުވަހުގެ ނިޔަލަށް އެމިރޭޓްސްއިން ރާއްޖެއަށް ވަނީ 444 ދަތުރުކޮށްފައެވެ. މި ދަތުރުތަކުގައި 39801 ފަތުރުވެރިން ރާއްޖެއަށް އައިސްވާ ކަމަށް ތަފާސް ހިސާބުތަކުން ދައްކައެވެ.
ދެން އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވަނީ ޤަތަރު އެއަރވޭސްގެ ފްލައިޓްތަކުގައެވެ. އެގޮތުން މި މުއްދަތުގައި އެ އެއަރލައިނުން 378 ދަތުރުކޮށް 27766 ފަތުރުވެރިން އައިސްފައިއެވެ.
ރާއްޖެއަށް ޗާޓަރު ދަތުރުތައް ބާއްވާ އެއަރލައިންތަކުގެތެރެއިން އެންމެ ގިނަ އަދަދަކަށް ދަތުރުވެރިން ރާއްޖެއަށް އައިސްފައިވަނީ އެއަރ އަސްތާނާގެ ފްލައިޓްތަކުގައެވެ. އެގޮތުން އެ އެއަރލައިންއިން ރާއްޖެއަށް 54 ދަތުރުކޮށްފައިވާއިރު، މި ދަތުރުތަކުގައި އެ އެއަރލައިންގެ ފްލައިޓްތަކުގައި ރާއްޖެއަށް ވަނީ 5687 ފަތުރުވެރިން އައިސްފައެވެ.
ދެން އެންމެ ގިނަ އަދަދަކަށް ފަތުރުވެރިން ރާއްޖެއަށް އައިސްފައިވަނީ އަޒުރު އެއަރ ޔޫކްރެއިންގެ ފްލައިޓްތަކުގައެވެ. އެގޮތުން އެ އެއަރލައިންގެ ފްލައިޓްތަކުގައި ރާއްޖެއަށް 4522 ފަތުރުވެރިން އައިސްފައިވާކަމަށް ޓޫރިޒަމް މިނިސްޓްރީގެ ތަފާސްހިސާބުތަކުން ދައްކައެވެ.