މިއަހަރުތެރޭ ފަތުރުވެރިކަމަށް އަލަށް 7000 އަށްވުރެ ގިނަ އެނދު ނެރެވޭނެކަމަށް ލަފާކުރެވޭކަމަށް މިނިސްޓަރ އޮފް ޓޫރިޒަމް އަބްދުﷲ މަޢުސޫމް ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަމުން މިނިސްޓަރ އޮފް ޓޫރިޒަމް އަބްދުﷲ މަޢުސޫމް ވިދާޅުވީ ރިސޯޓް ތަރައްޤީކުރަން ދޫކޮށްފައިވާ ރަށްތަކުގެ ތެރެއިން ގިނަ ރަށްތަކުގެ މަސައްކަތް މިއަހަރުތެރޭ ނިމޭނެކަމަށް ލަފާކުރެވޭކަމަށެވެ.
ކޯވިޑާއި ގުޅިގެން ބަންދުކުރި ބައެއް ރިސޯޓުތައް އަދިވެސް ހުޅުވާފައިނުވާއިރު، އަހަރުގެ ކުރިއަށް އޮތް ދުވަސްތަކުގައި މީގެތެރެއިންވެސް ގިނަ ތަންތަން ހުޅުވިގެންދާނެކަމަށް މިނިސްޓަރ ވިދާޅުވިއެވެ.
ރާއްޖޭގެ އެކި ހިސާބުތަކަށް ފަތުރުވެރިކަން ފުޅާކުރުމަށް ކުރަމުންދާ މަސައްކަތްތަކާއި ގުޅޭގޮތުންވެސް މިނިސްޓަރ ވަނީ ވާހަކަދައްކަވާފައެވެ. އެގޮތުން ރާއްޖޭގެ އުތުރާއި ދެކުނުގައި ބައިނަލްއަޤްވާމީ އެއަރޕޯޓްތައް ތަރައްޤީވެގެންދިޔުމުން ފަތުރުވެރިކަމަށް ގިނަ ކުރިއެރުންތަކެއް ލިބިގެންދާނެކަން މިނިސްޓަރ ފާހަގަކުރެއްވިއެވެ.
"ފަސޭހައިން ދަތުރުކުރެވެން ފެށީމައި ފަތުރުވެރިކަން ތަރައްޤީވެގެންދަނީ، މިހާރު އުތުރާއި ދެކުނުގައި އިންޓަރނޭޝަނަލް އެއަރޕޯޓް ތަރައްޤީކުރުމުގެ މަސައްކަތްކުރެވެމުން އެބަދަނީ، ސީދާ ޕޮއިންޓް ޓު ޕޮއިންޓް، ސީދާ ބޭރުން ގަން އިންޓަރނޭޝަނަލް އެއަރޕޯޓަށް، ބޭރުން ހަނިމާދޫ އެއަރޕޯޓަށް ބޯޓް ޖައްސަން ފެށީފަ، އެހިސާބު ތަރައްޤީވެގެންދާނީ،" މިނިސްޓަރ މައުސޫމް ވިދާޅުވިއެވެ.
މިނިސްޓަރ ވިދާޅުވީ މުޅި ރާއްޖޭގެ ޓޫރިޒަމް ތަރައްޤީވެގެން ދިޔުމަށް ރާއްޖޭގެ އެތެރޭގެ ދަތުރުފަތުރުގެ ނިޒާމް ހަރުދަނާވުންވެސް މުޙިއްމު ކަމަށެވެ. އެގޮތުން އުތުރުގައި ފެށުމަށް ތައްޔާރުވަމުންދާ ހައި ސްޕީޑް ފެރީގެ ޙިދުމަތާއި އެކު ފަތުރުވެރިކަމަށް ގިނަ ކުރިއެރުންތަކެއް އަންނާނެކަމަށް ލަފާކުރެވޭ ކަމަށްވެސް މިނިސްޓަރ ވިދާޅުވިއެވެ.