ފައިދާވާ ކުންފުންޏެއްގެ ގޮތުގައި އެމްޓީޑީސީ ކުރިއަށް އޮތްތާނގައި ހިންގޭނެ ފަދަ މާޙައުލެއް ކުންފުނީގައި މިހާރު ޤާއިމްކުރެވިފައިވާކަމަށް އެމްޓީޑީސީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު ވިދާޅުވެއްޖެއެވެ.
އެމްޓީޑީސީން ވަނީ 11 އަހަރަށް ފަހު މިދިޔަ ހިއްސާގެ ފައިދާ ބަހާފައެވެ. އެގޮތުން ހިއްސާއަށް 50 ލާރި ވަނީ ބަހާފައެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން އެމްޓީޑީސީގެ މެނޭޖިންގ ޑިރެކްޓަރ ތަޒްމީލް އަބްދުއްސަމަދު ވިދާޅުވީ، ހުސްވި އަހަރުގެ ފައިދާއިން މިއަހަރުވެސް ހިއްސާގެ ފައިދާ ބަހާނެ ކަމަށެވެ. އެގޮތުން މިދިޔަ އަހަރަށްވުރެ ދެގުނަ ރަނގަޅު އަދަދެއް ބެހުމަކީ އުއްމީދެއް ކަމަށް ތަޒްމީލް ވިދާޅުވިއެވެ.
" ކުރިއަށް އޮތް 20އަކަށް 25 ހަކަށް ދުވަސްތެރޭ އޭޖީއެމް ބޭއްވިގެންދާނެ، އަހަރީ އާއްމު ޖަލްސާގައި އުއްމީދަކީ، ހިއްސާގެ ފައިދާ އިޢުލާންކޮށް ބެހި އަދަދަށްވުރެ ރަނގަޅު އަދަދެއް ނުވަތަ ޑަބަލް އަދަދެއް އަނެއްކާވެސް މިއަހަރުވެސް ބެހުން،" ތަޒްމީލް ވިދާޅުވިއެވެ.
ތަޒްމީލް ފާހަގަކުރެއްވި ގޮތުގައި މިއަހަރަކީ އެމްޓީޑީގެ ތާރީޙުގައިވެސް ފާހަގަކޮށްލެވޭ އަހަރެއް ކަމަށެވެ. އަދި އެމްޓީޑީސީގެ ހިންގުން ހަރުދަނާކޮށް ކުންފުންޏަކީ ފައިދާވާ ކުންފުންޏަކަށް ހެދުމުގައި ސަރުކާރުން ބޮޑު އެއްބާރުލުމެއް ލިބެމުންދާކަން ތަޒްމީލް ފާހަގަކުރެއްވިއެވެ. ތަޒްމީލް ވަނީ އެކުންފުނިން ކުރިއަށް އޮތްތާނގައިވެސް ހިއްސާދާރުންނަށް ފައިދާ ބަހާނެކަމުގެ ޔަޤީންކަންވެސް ދެއްވާފައެވެ.
"ދެން ކޮންމެ މީހަކުވެސް އެމްޓީޑީސީގެ ހިންގުމާއި ހަވާލުވެ ހުއްޓަސް، އަޅުގަނޑު ހިއްސާދާރުން ދޭން އޮތް ޔަޤީން ކަމަކީ، އެމްޓީޑީސީ މިހާރު އޮތް މަގަށް ބަލާއިރު، ފައިދާވާ ކުންފުންޏެއްގެ ގޮތުގައި ކުރިއަށް ގެންދޭވެ ފަދަ މާހައުލެއް އެމްޓީޑީސީގައި ޤާއިމްކުރެވިފައިވާކަން،" ތަޒްމީލް ވިދާޅުވިއެވެ.
މިއަހަރު އެމްޓީޑީސީއަށް 15 އަހަރު ފުރޭއިރު އެކަންވެސް ރަސްމީކޮށް ފާޙަގަކުރުމަށް އެކުންފުނިން ވަނީ ނިންމާފައެވެ. އެމްޓީޑީސީއަށް މައިގަނޑު ގޮތެއްގައި އާމްދަނީ ލިބެނީ އެކުންފުނިން ކުއްޔަށްދީފައިވާ 2 ރަށުންނެވެ. އެއީ އަނަންތަރާ ކިހަވަކާއި އަޔާޑާ މަގުއްދޫއެވެ.
އެމްޓީޑީސީން ދަނީ ހދ. ނާގޯށީގައިވެސް ރިސޯޓެއް ތަރައްޤީކުރުމުގެ މަސައްކަތް ފެށުމަށް ތައްޔާރުވަމުންނެވެ. އެގޮތުން އެރަށުގައި ރިސޯޓް ތަރައްޤީކުރުމުގެ މަސައްކަތް މިއަހަރުގެ މެދުތެރޭގައި ފެށިގެންދާނެކަމަށް އެމްޓީޑީސީން ހާމަކުރެއެވެ. އެމްޓީޑީސީއަކީ ފަތުރުވެރިކަމުގެ ސިނާއަތުގެ މަންފާ ދިވެހި ރައްޔިތުންނަށް ހޯދައިދިނުމުގެ ގޮތުން ސަރުކާރުން 2006 ވަނަ އަހަރު އުފެއްދެވި ކުންފުންޏެކެވެ.