ރާއްޖެއިން ބޭރަށް ފައިސާ ފޮނުވުމުގެ ޚިދުމަތްދޭ ކުންފުނިތައް މެދުވެރިކޮށް މިއަހަރުގެ ފުރަތަމަ ކުއާޓަރުގައި ރާއްޖެއިން ބޭރަށް 17.9 މިލިއަން ޑޮލަރު ފޮނުވާފައިވާކަމަށް އެމްއެމްއޭއިން ހާމަކޮށްފިއެވެ.
މި އަދަދަކީ މިދިޔަ އަހަރުގެ ފަހު ކުއާޓަރުގައި ރާއްޖެއިން ބޭރުކުރި ފައިސާގެ އަދަދަށްވުރެ 16 އިންސައްތަ އިތުރު އަދަދެކެވެ. އަދި މިދިޔަ އަހަރުގެ ފުރަތަމަ ކުއާޓަރާއި އަޅާ ބަލާއިރު 38 އިންސައްތަ ދަށް އަދަދެކެވެ.
މޯލްޑިވްސް މަނިޓަރީ އޮތޯރިޓީ، އެމްއެމްއޭއިން ނެރެފައިވާ ކުއާޓަރލީ އިކޮނޮމިކް ބުލެޓިންގައިވާގޮތުން މިއަހަރުގެ ފުރަތަމަ ކުއާޓަރުގައި ރާއްޖެއިން ބޭރަށް ފައިސާ ފޮނުވުމުގެ ޙިދުމަތްދީފައި ވަނީ 2 ކުންފުންޏަކުންނެވެ.
އެމްއެމްއޭގެ ރިޕޯޓްގައި ފާހަގަކޮށްފައިވާ ގޮތުގައި ކޯވިޑާއި ގުޅިގެން ރާއްޖެއިން ބޭރަށް ފައިސާ ފޮނުވުމުގެ ޙިދުމަތްދޭ ފަރާތަކަށްވެސް ގިނަ ދަތިތަކެއް ކުރިމަތިވިއެވެ. އެހެންނަމަވެސް މި ދަތިތާއި އެކުވެސް މިއަހަރުގެ ފުރަތަމަ ކުއާޓަރުގައި ކުންފުނިތަކަށް ކުރިއެރުން ލިބިގެންގޮސްފައިވާކަމަށް ރިޕޯޓްގައިވެއެވެ.
ރެމިޓެންސް ކުންފުނިތައް މެދުވެރިކޮށް ރާއްޖެއިން ބޭރަށް ފޮނުވާފައިވާ ފައިސާގެ 70 އިންސައްތައަކީ ބިދޭސީން ރާއްޖެއިން ބޭރަށް ފޮނުވާފައިވާ ފައިސާއެވެ.
އެގޮތުން މިއަހަރުގެ ފުރަތަމަ ކުއާޓަރުގައި ރާއްޖެއިން ބޭރުކޮށްފައިވާ ފައިސާގެތެރެއިން 55 އިންސައްތައަކީ ބަންގްލަދޭޝަށް ބޭރުކޮށްފައިވާ ފައިސާއެވެ. ދެން އެންމެ ގިނަ އަދަދަކަށް ފައިސާ ބޭރުކޮށްފައިވަނީ އިންޑިއާއަށެވެ. އެއީ 10 އިންސައްތައެވެ. ތިންވަނަ އަށް އެންމެ ގިނަ އަދަދަކަށް ފައިސާ ބޭރުކޮށްފައިވަނީ ސްރީލަންކާއަށެވެ. އެއީ 5 އިންސައްތައެވެ.
މި މުއްދަތުގައި ބޭރު ޤައުމުތަކުން ރާއްޖެއަށް ވަނީ 15.7 މިލިއަން ރުފިޔާ ފޮނުވާފައެވެ. މިއީ 2020 ވަނަ އަހަރުގެ ފުރަތަމަ ކުއާޓަރާއި އަޅާ ބަލާއިރު 15 އިންސައްތަ އިތުރު އަދަދެކެވެ. ރާއްޖެއަށް އެންމެ ގިނަ އަދަދަކަށް ފައިސާ ފޮނުވާފައިވަނީ ޔޫއޭއީންނާއި، އިންގިރޭސިވިލާތުން އަދި ލެބަނާނުންނެވެ.