ރާއްޖޭގެ ރިސޯޓްތަކުގައި މިހާރު ވެކްސިންގެ ފުރަތަމަ ޑޯޒް ފުރިހަމަނުކޮށް ތިބީ 1587 މުވައްޒަފުންކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ.
ފަތުރުވެރިކަމުގެ ސިނާއަތުގައި މަސައްކަތްކުރާ މުވައްޒަފުންނަށް ވެކްސިން ދިނުމުގެ ޕްރޮގްރާމް ފަށާފައިވަނީ މިދިޔަ ފެބްރުއަރީ މަހުގެ ތެރޭގައެވެ.
ރާއްޖޭގައި މުޅި ޖުމްލަ 152 ރިސޯޓެއް އަންނަނީ އޮޕަރޭޓްކުރަމުންނެވެ. މި 152 ރިސޯޓްގައި މުޅި ޖުމްލަ 41431 މުވައްޒަފުން މަސައްކަތްކުރެއެވެ. މީގެތެރެއިން %96 މުވައްޒަފުން ވަނީ މިހާތަނަށް ވެކްސިންގެ ފުރަތަމަ ޑޯޒް ފުރިހަމަކޮށްފައެވެ. އެއީ 39844 މުވައްޒަފުންކަމަށް ޓޫރިޒަމް މިނިސްޓްރީން ވިދާޅުވެއެވެ. އެހެންކަމުން މިހާރު ރާއްޖޭގެ ރިސޯޓްތަކުގައި މަސައްކަތްކުރާ މުވައްޒަފުންގެ ތެރެއިން ވެކްސިންގެ އެއްވެސް ޑޯޒްއެއް ފުރިހަމަނުކުރަނީ 1587 މީހުންނެވެ.
މިހާތަނަށް ގިނަ އަދަދެއްގެ މުވައްޒަފުން ވަނީ ވެކްސިންގެ 2 ވަނަ ޑޯޒްވެސް ފުރިހަމަކޮށްފައެވެ. %69 މުވައްޒަފުން ވެކްސިންގެ 2 ވަނަ ޑޯޒް ފުރިހަމަކޮށްފައިވާއިރު މިއީ 27114 މުވައްޒަފުންނެވެ. އެހެންކަމުން ރިސޯޓްތަކުގެ މުވައްޒަފުންގެ ތެރެއިން ކޯވިޑް19 ގެ ވެކްސިންގެ ފުރަތަމަ ޑޯޒް ޖަހައި އަދި 2 ވަނަ ޑޯޒް ނުޖަހާ ތިބި މީހުންގެ އަދަދަކީ 12239 އެވެ.
ވެކްސިން ޖަހާފައިވާ ބަޔަކު އުޅޭ މަންޒިލަކަށް ރާއްޖެ ހެދުމަށް "އަހަރެން ވެކްސިން ޖަހައިފިން"ގެ ނަމުގައި މިދިޔަ އޭޕްރިލް މަހު ޓޫރިޒަމް މިނިސްޓްރީއާއި އެމްއެމްޕީއާރުސީން ވަނީ ކެމްޕެއިނެއްވެސް ފަށާފައެވެ. މި ކެމްޕެއިންގެ މަޤްސަދަކީ ރާއްޖޭގެ ފަތުރުވެރިކަމުގެ ސިނާއަތުގައި މަސައްކަތްކުރާ ހުރިހާ ފަރާތަކަށް ވެކްސިން ޖަހައި މުޅި ދުނިޔޭންވެސް އެންމެ ފުރަތަމަ "ފުލީ ވެކްސިނޭޓެޑް" ޓޫރިޒަމެއް ޤާއިމްކުރާ ޤައުމަށް ރާއްޖެ ހެދުމެވެ.
ރާއްޖޭގެ އާބާދީގެ 177969 މީހުން މިހާރު ވަނީ ވެކްސިންގެ 2 ޑޯޒް ފުރިހަމަކޮށްފައެވެ. އަދި ވެކްސިންގެ ފުރަތަމަ ޑޯޒް ޖެހި މީހުންގެ އަދަދަކީ 313865 އެވެ.