ރާއްޖޭގެ ފަތުރުވެރިކަން އިޝްތިހާރު ކުރުމަށްޓަކައި ސައުތު އެފްރިކާގެ ނޫސްވެރިންތަކެއް ރާއްޖެއަށް ގެނެސްފިއެވެ.
އެމްއެމްޕީއާރުސީން ވިދާޅުވީ ފެމިލިއަރައިޒޭޝަން ޓްރިޕެއްގައި ސައުތު އެފްރިކާގެ ނޫސްވެރިންތަކެއް މިިމަހުގެ 14ވަނަ ދުވަހުން ފެށިގެން 20ވަނަ ދުވަހުގެ ނިޔަލަށް ރާއްޖޭގައި ޗުއްޓީ ހޭދަކޮށްފައިވާ ކަމަށެވެ. އެމްއެމްޕީއާރުސީން ވިދާޅުވީ މިއީ ސައުތު އެފްރިކާގެ މާކެޓަށް އަމާޒްކޮށްގެން މިއަހަރު ކުރިއަގެންދިޔުމަށް ހަމަޖެހިފައިވާ އެންމެ ފުރަތަމަ ފެމިލިއަރައިޒޭޝަން ޓްރިޕް ކަމަށެވެ.
ރާއްޖެއަށް ޒިޔާރަތްކުރި ޓީމްގައި ތިން، އެޑިޓޯރިއަލް ގްރޫޕް ތަމްސީލްކުރާ 4 ނޫސްވެރިން ހިމެނެއެވެ. މި މީޑިއާ ޓީމަކީ ސައުތު އެފްރިކާގެ އެންމެ މަޤްބޫލް އަދި މަޝްހޫރު މަޖައްލާތައް ތަމްސީލްކުރާ ޓީމެވެ. އެގޮތުން ސޮވެޓާން ލައިވް އާއި ނޯމެޑް އެފްރިކާގެ ނޫސްވެރިން މި ޓީމްގައި ހިމެނެއެވެ.
މި މަޖައްލާތަކުގެ ޕަބްލިކޭޝަންތައް ޕްރިންޓް މީޑިއާ އާއި އޮންލައިން މީޑިއާ އާއި ސޯޝަލް މީޑއާގެ ޒަރިއްޔާއިންވެސް ކިޔެން ހުރެއެވެ. އެމްއެމްޕީއާރުސީން ވިދާޅުވީ 300 މިލިއަނަށްވުރެ ގިނަ މީހުންނަށް ފޯރާ މި ޕަބްލިކޭޝަންތަކުން ރާއްޖެއަށް ކުރި މިދަތުރުގެ ސަބަބުން ރާއްޖެ އިޝްތިހާރުކުރުމުގެ ފުރުސަތު ހުޅުވިގެންދާނެ ކަމަށެވެ.
މިމީޑިއާ ޓީމުން ރާއްޖޭގައި ޗުއްޓީ ހޭދަކޮށްފައިވަނީ ފިނޮޅު މޯލްޑިވްސް، ޑުސިޓް ތާނި މޯލްޑިވްސްގެ އިތުރުން ހުރަވަޅި އައިލެންޑް ރިސޯޓުގައެވެ.
މި ޓީމުން ރާއްޖެއަށް ކުރި ދަތުރުގައި ފިނޮޅު މޯލްޑިވްސްގައިވާ މަޝްހޫރު ބީޗް ބަބްލްއަށް ޒިޔާރަތްކުރުމާއި ޑުސިޓް ތާނީގައި މަންޓާ ރޭސް އާއި އެކު ސްކޯނަލް ކުރުމާއި ހުރަވަޅި އައިލެންޑް ރިސޯޓްގައި ވޯޓަރ ސްޕޯޓސް ކުޅިވަރު ކުޅެފައިުވެއެވެ.
އެމްއެމްޕީއާރުސީންދަނީ ސައުތު އެފްރިކާގައި ރާއްޖޭގެ ފަތުުރުވެރިކަން އިޝްތިހާރުކޮށް އެޤައުމުން ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް ގިނަ ހަރަކާތްތަކެއް ރާވާ ކުރިއަށްގެންދަމުންނެވެ. އެގޮތުން މިއަހަރުގެ އޭޕްރީލްމަހުގެ ތެރޭގައިވަނީ ސައުތު އެފްރިކާގެ އެންމެ ބޮޑު އެއް ޓްރޭޑް ފެއަރ ކަމުގައިވާ ވޯލްޑް ޓްރެވަލް މާކެޓް އެފްރިކާގައި، އެމްއެމްޕީއާރުސީންވަނީ ބައިވެރިވެފައެވެ. އަދި މިއަހަރު ކުރިއަށް ރޭވިފައި ހުރި ހަރަކާތްތަކުގެތެރޭގައި ފެމިލިއަރައިޒޭޝަން އިތުރު ޓްރިޕްތައް ބޭއްވުމާއި އެއަރ ސީޝެލްސްއާއި އެކު ޖޮއިންޓް ކެމްޕެއިނެއް ކުރިއަށްގެންދިޔުން ހިމެނެއެވެ.
ސައުތު އެފްރިކާއަކީ ރާއްޖޭގެ ފަތުރުވެރިކަމަށް މުހިއްމު ޤައުމެކެވެ. މިމަހުގެ 2ވަނަ ދުވަހުގެ ނިޔަލަށް ސައުތު އެފްރިކާއިން ރާއްޖެއަށްވަނީ 3624 ފަތުރުވެރިން އައިސްފައެވެ. އަދި މިހާރު ދަތުރުކުރުމުގައި ދެމުންދާ ލުއިތަކާއި އެކު އަހަރުގެ ކުރިއަށް އޮތް ދުވަސްތަކުގައި އެޤައުމުން ރާއްޖެ އަންނަ ފަތުުރުވެެިންގެ އަދަދު އިތުރުވެގެންދާނެ ކަމަށް އެމްއެމްޕީއާރުސީން ލަފާކުރެއެވެ.