މަސައްކަތު ގަޑިން ބޭރުން މުވައްޒަފުންނަށް ގުޅުން ޕޯޗްގަލްގައި ޤާނޫނަކުން މަނާކޮށްފި

މަސައްކަތު ވަގުތުން ބޭރުގައި މުވައްޒަފުންނާއި ވާޒީފާ ދޭ ފަރާތްތަކުން މުޢާމަލާތް ކުރުމަކީ މަނާ ކަމެއްގެ ކަމަށް ބަޔާންކޮށް ޕޯޗުގަލްގެ ޤާނޫނު އިސްލާހުކޮށްފިއެވެ.

މިކަމާއި ގުޅޭ ގޮތުން ވާހަކަ ދައްކަވަމުން ޕޯޗުގަލްގެ ލޭބަރ މިނިސްޓަރ އަނާ މެންޑެސް ގޯޑިންހޯ ވިދާޅުވީ، ކޯވިޑާއެކު ދުރުގައި ތިބެގެން މަސައްކަތް ކުރުމަށް މަޖުބޫރުވެގެން ދިޔަ ކަމަށެވެ. ނަމަވެސް އޮފީސް މާޙައުލުން ބޭރުގައި މަސައްކަތް ކުރާއިރު، މިކަމަށްވެސް އިންތަކެއް ކަނޑައެޅުން މުހިންމުކަން ސަރުކާރަށް ފާހަގަ ވެގެން ދިޔަ ކަމަށެވެ.

މި ޤާނޫނުގެ ދަށުން ޕޯޗުގަލްގައި ވަޒީފާ ދޭ ފަރާތްތަކަށް އޮފީސް ގަޑީގެ ބޭރުގައި މުވައްޒަފުންނަށް ގުޅައި މެއިލް ކުރުމަކީ މަނާ ކަމެކެވެ. އަދި ބަންދު ދުވަސްތަކުގައިވެސް އެއްވެސް ގޮތަކަށް ގުޅުމަކީ މަނާ ކަމެކެވެ. މީގެ އިތުރުން ގޭގައި ތިބެގެން މަސައްކަތް ކުރާއިރު، އިންޓަނެޓާއި ކަރަންޓު ބިލު ދެއްކުމުގައި މުވައްޒަފުންނަށް އެހީތެރިވާން ޖެހެއެވެ. އަދި މިއީ ކުންފުނީގެ ޚަރަދުގެ ގޮތުގައި ޖެހޭނެ ކަމަށް މި ޤާނޫނުގައި ބުނެއެވެ. މީގެ އިތުރުން މި ޤާނޫނުގެ ދަށުން ބެލެނިވެރިންނަށް ދަރިފުޅަށް 8 އަހަރު ވަންދެން ގޭގައި ތިބެގެން މަސައްކަތް ކުރުމުގެ ފުރުސަތު އޮންނާނެއެވެ.

ހުކުރު ދުވަހު ޕޯޗުގަލްގެ ޤާނޫނު ހަދާ މަޖިލީހުން މި ޤާނޫނު ފާސްކޮށްފައިވާއިރު، މި ޤާނޫނު ތަންފީޒު ވާނީ 10 މުވައްޒަފުންނަށް ވުރެ ގިނަ މުވައްޒަފުން ގެންގުޅޭ ކުންފުނިތަކުގެ މައްޗަށް އެކަނި ކަމަށް ޤާނޫނުގައި ބުނެއެވެ.

ޕޯޗުގަލްގައި މިފަދަ ޤާނޫނެއް ތަޢާރަފު ކުރިއިރު، މިއީ ޔޫރަޕުގައި މި ބާވަތުގެ ޤާނޫނެއް ތަޢާރަފު ކުރި ފުރަތަމަ ފަހަރެއް ނޫނެވެ. ފްރާންސުގައިވެސް މަސައްކަތު ގަޑިން ބޭރުގައި ފޯނު ނިވައިގެން އުޅުމުގެ ހައްޤު މަސައްކަތެރިންނަށް އޮވެއެވެ. މީގެ އިތުރަށް އިނގިރޭސިވިލާތުގައި މުވައްޒަފުން އަމިއްލައަށް މަސައްކަތް ކުރާ ގަޑި ކަނޑައެޅުމުގެ ބާރު ދިނުމަށް ވެސް ލަފާ އެރުވުނު ކަމަށް އެޤައުމުގެ މީޑިއާ ރިޕޯޓުތައް ބުނެއެވެ. ނަމަވެސް އަދި ރަސްމީކޮށް އެކަން ހުށަހަޅާފައި ނުވެއެވެ.