ފަތުރުވެރިކަމުގެ ޚިދުމަތްދޭ ތަންތަނުން މޫދަށް ކުނި އެޅޭގޮތަށް އެކަމާއި ގުޅޭ ޤަވާއިދުގައި އޮތް މާއްދާ އުވާލައިފިއެވެ.
ޓޫރިޒަމް މިނިސްޓްރީން ގަވާއިދުގެ އެ މާއްދާ އުވާލާފައި މިވަނީ ބައެއް ރިސޯޓުތަކުން ތިމާވެއްޓަށް ގެއްލުންވާގޮތަށް މޫދަށް ކުނި އަޅާކަމުގެ ޝަކުވާ އިތުރުވެފައިވާ ދަނޑިވަޅެއްގައެވެ.
ފަތުރުވެރިކަމުގެ ދާއިރާގައި ތިމާވެށި ޙިމާޔަތްކޮށް ރައްކާތެރިކުރުމާ ބެހޭ ޤަވާޢިދުގެ ދަށުން މީގެކުރިން ބައެއް ބާވަތްތަކުގެ ކުނި ވަކި މިންގަނޑެއްގެ ތެރެއިން މޫދަށް އެޅޭގޮތަށް އޮތީ ހުއްދަ ދީފައެވެ. އެގޮތުން ކައިރި ސަރަޙައްދެއްގައި ކުނި ރަނގަޅަށް މެނެޖްކުރެވޭނެ އިންތިޒާމު ނުހުންނަ ރިސޯޓުތަކުން ކުނީގެ ގޮތުގައި ހިމެނޭ ކާބޯތަކެތީގެ ބާކިބައި މޫދަށް އެޅުމުގެ ހުއްދަ ލިބެއެވެ.
މިގޮތުން އުކާލެވޭނީ އޭގެ ޒާތުގައި ނެތިފަނާވެގެންދާފަދަ ކުނި ނުވަތަ ބަޔޯޑީގްރޭޑަބަލް ކުންޏެވެ. އަދި މިގޮތަށް އުކާލާއިރުވެސް މޫދަށް އަޅަން ހުއްދަދީފައި ވަނީ އެސަރަޙައްދެއްގެ އޮޔާއި ވައިހުރި ގޮތަކަށް ބަލާ މީހުން ދިރިއުޅޭ ރަށްރަށަށް ކުނި ނުލައްގާގޮތަށެވެ. އެހެންކަމުން މިގޮތަށް މޫދަށް އަޅާ ކުނި އަޅަންޖެހެނީ ރަށްރަށާއި ވަކި ދުރުމިނަކަށް ބެލުމަށްފަހުގައެވެ.
އެހެންނަމަވެސް ދާދިފަހުވަނީ ރާއްޖޭގައި ހިންގާ ބޮޑު ރިސޯޓަކުން މޫދަށް ކުނި އެޅުމުގެ މައްސަލައެއް ފެންމަތިވެ، މިކަމުގެ ޝަކުވާ ބޮޑުވިއެވެ.
މިޙާދިސާގައި އެ ރިސޯޓުން ވަނީ ޕްލާސްޓިކް ކުންޏާއި އެކި ޒާތުގެ ކުނި އެ ރިސޯޓުގެ މޫދަށް އަޅާފައެވެ. ނަމަވެސް ފަތުރުވެރިކަމުގެ ދާއިރާގައި ތިމާވެށި ޙިމާޔަތްކޮށް ރައްކާތެރިކުރުމާ ބެހޭ ޤަވާޢިދުގައި ފަތުރުވެރިކަމަށް ދޫކޮށްފައިވާ ރަށްރަށާއި ފަޅުތަކަށް ކުނި އެޅުމަކީ މަނާކަމެކެވެ.
ރ.އަތޮޅުގައި ހިންގަމުން އަންނަ ރިސޯޓަކުން މޫދަށް ކުނި އެޅުމުގެ މައްސަލަ ފެންމަތިވުމުން އެމައްސަލަ ކަމާބެހޭ އިދާރާތަކާއި ގުޅިގެން ބަލަމުން އަންނަކަމަށް އެންވަޔަރަމަންޓަލް ޕްރޮޓެކްޝަން އޭޖެންސީ، އީޕީއޭއިން ވަނީ ވިދާޅުވެފައެވެ.
އެހެންނަމަވެސް ފަތުރުވެރިކަމުގެ ދާއިރާގައި ތިމާވެށި ޙިމާޔަތްކޮށް ރައްކާތެރިކުރުމާ ބެހޭ ޤަވާޢިދުގެ ދަށުން އެފަދަ ތަންތަނުގައި ހުންނަ މިފަދަ މައްސަލަތައް ބަލާނީ ސީދާ ޓޫރިޒަމް މިނިސްޓްރީންނެވެ.