ރާއްޖެ ޒިޔާރާތްކުރާ ފަތުރުވެރިންގެ އަދަދު އިތުރުވެ، އަނެއްކާވެސް ރެކޯޑް އަދަދަކަށް ފަތުރުވެރިން ރާޢްޖެ އައިސްފައިވާ ކަމަށް ޓޫރިޒަމް މިނިސްޓްރީން ހާމަކުރައްވައިފިއެވެ.
މިދިޔަ އަހަރުގެ ޖުލައި މަހު ބޯޑަރު އަލުން ހުޅުވާލުމާއިއެކު، އެއް ދުވަހެއްގެ ތެރޭގައި އެންމެ ގިނަ ފަތުރުވެރިން ރާއްޖެ އައީ މިމަހުގެ 5 ވަނަ ދުވަހުއެވެ. އެގޮތުން 6،296 ފަތުރުވެރިން ވަނީ އެދުވަހު ރާއްޖެއަށް ޒިޔާރަތްކޮށްފައެވެ.
ކޯވިޑްއަށްފަހު ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކާއި އިދާރާތައް ގުޅިގެން ކުރި މަސައްކަތުން މިހާރު ރާއްޖެ އަންނަ ފަތުރުވެރިންގެ އަދަދު އެއްދުވަހުން އަނެއް ދުވަހަށް އަންނަނީ އިތުރުވަމުންނެވެ. އެގޮތުން ވޭތުވެދިޔަ ނޮވެންބަރު މަހު ރާއްޖެއަށް ޒިޔާރާތްކުރި 144،725 ފަތުރުވެރިންގެ އަދަދަކީ ކޯވިޑުގެ ކުރިން 2019 ވަނަ އަހަރުގެ ނޮވެމްބަރުމަހު ރާއްޖެއަށް އައިސްފައިވާ ފަތުރުވެރިންނާއި އަޅާ ބަލާއިރު، 4.9 އިންސައްތަ އިތުރު އަދަދެކެވެ. މީގެ އިތުރުން ދުވާލަކު، އެވްރެޖްކޮށް 4،824 ފަތުރުވެރިން ވަނީ ރާއްޖެއައިސްފައެވެ. ހަމައެއާއެކު މި ހިނގަމުންދާ ޑިސެމްބަރު މަހު މިހާތަނަށް 26،519 ފަތުރުވެރިން ވަނީ ރާއްޖެ ޒިޔާރާތްކޮށްފައެވެ.
2020 ވަނަ އަހަރާއި އަޅާބަލާއިރު ރާއްޖޭގެ ފަތުރުވެރިކަން މިއަހަރު ވަނީ ވަރަށް ބޮޑުތަން ކުރިއަރާފައެވެ. އެގޮތުން މިހާރު ރާއްޖެއަށް އެންމެގިނައިން ފަތުރުވެރިން އަންނަނީ އަވައްޓެރި އިންޑިއާއިންނެވެ. އެއީ 22.5 އިންސައްތަ ފަތުރުވެރިންނެވެ. 2 ވަނައަށް އެންމެ ގިނަ ފަތުރުވެރިން އަންނަނީ ރަޝިޔާއިންނެވެ.
ޓޫރިޒަމް މިނިސްޓްރީގެ ތަފާސް ހިސާބުތައް ދައްކާ ގޮތުގައި މިއަހަރުގެ މިހާތަނަށް 1.2 މިލިއަން ފަތުރުވެރިން ވަނީ ރާއްޖެ ޒިޔާރާތްކޮށްފައެވެ.