ކޯވިޑް-19 ގެ ބަލިމަޑުކަމުގައި އިސް ސަފުގައި މަސައްކަތްކުރި ނޮން-މެޑިކަލް ވޮލަންޓިއަރުންގެ އަގު ވަޒަންކުރުމުގެ ގޮތުން މިނިސްޓްރީ އޮފް ޓޫރިޒަމުން އިންތިޒާމްކުރައްވައިގެން ހަފްލާއެއް ބާއްވައިފިއެވެ. މިޙަފްލާގައި ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަޙްމަދު ބައިވެރިވެ ވަޑައިގެންނެވިއެވެ.
މި ޙަފްލާގައި ވޮލަންޓިއަރުންނާ މުޚާތަބުކޮށް ވާހަކަފުޅު ދައްކަވަމުން ރައީސުލްޖުމްހޫރިއްޔާގެ އަނބިކަނބަލުން ވިދާޅުވީ، ކޯވިޑްގެ ބަލިމަޑުކަމުގައި ވޮލަންޓިއަރުންގެ ތެރޭގައި ވެސް އެކި ކަހަލަ ތަކްލީފްތަކާ ކުރިމަތިލާން ޖެހިފައި ތިބި ބޭފުޅުން ތިއްބެވިކަމާއި ނަމަވެސް އެބޭފުޅުންގެ އަމިއްލަ ދިރިއުޅުމުގެ ކަންކަން އިސްކުރެއްވުމުގެ ބަދަލުގައި އިންސާނިއްޔަތުކަން އިސްކުރެއްވިކަން ފަޒްނާވަނީ ފާހަގަކުރައްވާފައެވެ. އަދި އެކަމަނާގެ ވާހަކަފުޅުގައި ވޮލަންޓިއަރުންނަކީ ވެސް އިންސާނުންކަމަށާއި އެބޭފުޅުންނަކީ ދިރިއުޅުމަށްޓަކައި ޒަރޫރީ ބޭނުންތައް ފުރިހަމަކުރަންޖެހޭ ބޭފުޅުންކަން ފާހަގަކުރެއްވިއެވެ.
" ދަރުމަވެރިންނޭ ބުންޏަސް އެމީހުންނަކީވެސް އިންސާނުން. އެމީހުންވެސް ރެންޓުވެސް ދައްކަންޖެހޭނެ. ބިލްތައްވެސް ދައްކަންޖެހޭނެ. އެމީހުންވެސް ކުރާނެ ޚަރަދުތައްވެސް ހުންނާނެ. އެހެންވީމަ ހަމަ ދަރުމަވެރިންވެސް ކޮންމެވެސް ވަރެއްގެ އުޖޫރައެއް ލިބިގެން އެމީހުންނަށްވެސް އެ މަސައްކަތް ކުރެވޭނީ." ފަޒްނާ އަޙްމަދު ވިދާޅުވިއެވެ.
ރައީސުލްޖުމްހޫރިއްޔާގެ އަނބިކަނބަލުން ވަނީ ޖުމްލަކޮށް ވޮލަންޓިއަރުންގެ ގޮތުގައި މަސައްކަތްކުރެއްވުމަށް އިސްނަންގަވައި ޙަރަކާތްތެރިވި ހުރިހާ ފަރާތްތަކަށް ޝުކުރު ދަންނަވާފައެވެ.
މި ހަފްލާގައި ވާހަކަފުޅު ދައްކަވަމުން ޓޫރިޒަމް މިނިސްޓަރ އަބްދުއްﷲ މައުސޫމް ވިދާޅުވީ މި ވޮލަންޓިއަރުންގެ ޓީމަކީ ކޯވިޑްގެ ހާލަތު އެންމެ ގޯސްވެފައިވާ ދުވަސްވަރު ހެލްތު ދާއިރާގެ ފަރާތްތަކާއި ގުޅިގެން މަސައްކަތް ކުރުމަށްޓަކައި އެކުލަވާލެވުނު ނޮން-މެޑިކަލް ޓީމެއްކަމެވެ. މިނިސްޓަރ ވިދާޅުވީ ރާއްޖެ އެންމެ ނާޒުކު ދަނޑިވަޅުގައި އޮތްއިރު ވޮލަންޓިއަރުންގެ ޓީމުން ކުރެއްވި ބުރަ މަސައްކަތް ފާހަގަކުރައްވާ އެ ފަރާތްތަކަށްވެސް މިނިސްޓަރ ވަނީ ޝުކުރު އަދާކުރައްވާފައެވެ. ހަމައެއާއެކު ޓޫރިޒަމް މިނިސްޓްރީގެ 2021 ވަނަ އަހަރުގެ އަމާޒަށް ވާސިލްވެވުމުގެ ފަހަތުގައި އެ ވޮލަންޓިއަރުން ކުރެއްވި ބުރަ މަސައްކަތުގެ އަތެއް ވާކަން މައުސޫމްގެ ވާހަކަފުޅުގައި ވަނީ ފާހަގަކުރައްވާފައެވެ.
މި ހަފްލާގައި ވޮލަންޓިއަރުންގެ އަގުވަޒަން ކުރުމުގެ ގޮތުން ވަނީ އެފަރާތްތަކަށް ހަނދާނީ ލިޔުމެއް އަރުވާފައެވެ.
މީގެ އިތުރުން ވޮލަންޓިއަރުންގެ ގޮތުގައި މަސައްކަތް ކުރެއްވި ބޭފުޅުންނަށް ކޮންމެވެސް ވަރެއްގެ އުޖޫރައެއް ޓޫރިޒަމް މިނިސްޓްރީން ވަނީ ހަމަޖައްސަވާ ދެއްވާފައެވެ.