ހޯމް ސްޓޭ ތަޢާރަފްކުރަނީ ފަތުރުވެރިކަމުގެ ވިޔަފާރިއަށް ވަންނަން ބޭނުންވާ ދިވެހިންނަށް ފަހި ފުރުސަތެއް ހޯދައިދިނުމަށް ކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ. އަންނަ މަހުގެ 1 ވަނަ ދުވަހު ހޯމް ސްޓޭ ތައާރަފްކުރުމަށް ޓޫރިޒަމް މިނިސްޓްރީން ދަނީ މަސައްކަތް ކުރައްވަމުންނެވެ.
ހޯމް ސްޓޭ ފަތުރުވެރިކަމަކީ، އެރަށެއްގައި ދިރިއުޅޭ ބަޔަކާއެކު އެއްގެއެއްގައި ފަތުރުވެރިން ޗުއްޓީ ހޭދަ ކުރާ ބާވަތުގެ ފަތުރުވެރިކަމެވެ. މި ބާވަތުގެ ފަތުރުވެރިކަމަކީ ދުނިޔޭގެ ޤައުމުތަކުގައި ކާމިޔާބު ކަމާއެކު ހިންގާ އެއް މޮޑެލެވެ.
ހޯމް ސްޓޭ ފަތުރުވެރިކަމާއި ގުޅޭގޮތުން ނޫސްވެރިންނަށް މައުލޫމާތުދެއްވަމުން ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ ޢައްސަދު ރިޟާ ވިދާޅުވީ، ޓޫރިޒަމް މިނިސްޓްރީން އެންމެ ބޮޑަށް ބޭނުންވާ އެއްކަމަކީ ފަތުރުވެރިކަމުގެ ސިނާއަތުގައި ދިވެހިން ވަޒީފާ އަދާކުރުމަށްވުރެ ބޮޑަށް މިދާއިރާގެ ހިންގުންތެރިންގެ ގޮތުގައި ދިވެހިން ތިބުންކަމަށެވެ.
މީގެ 10 ވަރަކަށް އަހަރު ކުރިން ގެސްޓްހައުސް ވިޔަފާރި ފެށިގެން މި ސިނާއަތް މިއަދު ރާއްޖޭގައި ފުޅާވެގެން އައިނަމަވެސް މިއީ ކޮންމެ މީހަކަށް އިންވެސްޓް ކުރެވޭނެ ސިނާއަތެއް ނޫންކަން އޭނާ ފާހަގަކުރެއްވިއެވެ. ހޯމް ސްޓޭ ތައާރަފްކުރަނީ ޓޫރިޒަމް ދާއިރާއަށް ވަންނަން ބޭނުންވެފައިތިބި ދިވެހިންނަށް މި ފުރުސަތު ފަހިކޮށްދިނުމަށް ކަމަށް އޭނާ ވިދާޅުވިއެވެ.
"ޓޫރިޒަމްއަށް ވަންނަން ބޭނުންވާ ވަރަށް ގިނަ ރަށްރަށުގެ މީހުންނަށް އަދިވެސް ޓޫރިޒަމްއަށް ނުވަދެވި އެބަހުރި. ނުވަދެވި މި ހުންނަނީ ގެސްޓްހައުސް ގަވާއިދުގައި މިހުރި ބައެއްކަހަލަ ދަތިތަކާއި ހުރެ ނޫނީ ގެސްޓް ހައުސް އިންވެސްޓްމަންޓަކީ ބޮޑު އިންވެސްޓްމަންޓަކަށް ރާއްޖޭގައި މިހާރު ގެސްޓް ހައުސްތައް ހަދާފައި ހުރި ގޮތައް ބަލާއިރު ބޮޑު އިންވެސްޓްމަންޓެއް ކަމަށްވާތީ. އެހެންވީމަ މިކަން ފަސޭހަކުރުމުގެ ގޮތުން އަޅުގަނޑުމެން ހޯމް ސްޓޭ ޓޫރިޒަމް މި އިންޓްރޮޑިއުސް ކުރަނީ. ހޯމްސްޓޭ ޓޫރިޒަމްއަކީ ރަށު ފަތުރުވެރިކަން ކޮންމެ މީހަކަށްވެސް ކުރަން ޖާގަ ލިބުމާއިއެކު އެ ފުޅާވެގެން އައީމަ އަޅުގަނޑުމެން މިދަންނަވާ ޓޫރިޒަމް ސިންދަފާތުކުރަން އެހެން އޭރިއާތަކަށްވެސް ލިބޭ ވަރަށް ބޮޑު ފުރުސަތެއް." ޢައްސަދު ވިދާޅުވިއެވެ.
ޢައްސަދު ވިދާޅުވީ، ރާއްޖެ މަޝްހޫރުވެފައިވަނީ އަގުބޮޑު މަންޒިލެއްގެ ގޮތުގައިކަމަށެވެ. ނަމަވެސް ގެސްޓްހައުސް ފަތުރުވެރިކަމާއިއެކު ރާއްޖެ އެފޯޑް ކުރެވޭ ފަތުރުވެރިންގެ އަދަދު އޭގެ ކުރިއާއި އަޅާބަލާއިރު ގިނަވެއްޖެކަމަށެވެ. ހޯމް ސްޓޭއާއިއެކު އެކި ފަންތީގެ ފަތުރުވެރިނަށް ރާއްޖެ އައުމުގެ ފުރުސަތު ފަހިވެގެންދާނެކަމަށާއި އައު މާކެޓްތަކުން ރާއްޖެ އަންނަ ފަތުރުވެރިންގެ އަދަދުވެސް އިތުރުވެގެންދާނެކަމަށް ޢައްސަދު ވިދާޅުވިއެވެ.
"ގެސްޓްހައުސް ޓޫރިޒަމްއާއިއެކު ރާއްޖެ އެފޯޑްކުރެވޭ މީހުން ގިނަވެއްޖެ. ދެން ހޯމް ސްޓޭ އައުމާއިއެކު އަޅުގަނޑުމެން ޤަބޫލުކުރަނީ އެއަށްވުރެންވެސް ގިނަ މީހުންނަށް އެ ފުރުސަތު ލިބިގެންދާނެކަމަށް. މާނައަކީ މިހާރު ރާއްޖެއަށް ދަތުރުކުރާ މާކެޓްތަކަށްވުރެ އައު މާކެޓްތަކެއް ހޯމް ސްޓޭއާއިއެކު ހުޅުވިގެންދާނެ. އެކިއެކި ރީޖަންތަކުން މީހުން ދަތުރުކުރަންފަށާނެ. ރާއްޖޭގެ ޓޮޕް ޓެން ލިސްޓް ބަދަލުވަމުންދާނެ." ޢައްސަދު ވިދާޅުވިއެވެ.
ޖަނަވަރީ މަހުގެ 1 ވަނަ ދުވަހު މ.ދިއްގަރުގައި ހޯމް ސްޓޭ ތައާރަފްކުރުމަށް ޓޫރިޒަމް މިނިސްޓްރީން މިހާރު ވަނީ ތައްޔާރުވެފައެވެ. ހޯމްސްޓޭ ޓުއަރިޒަމްގެ އިތުރުން، ސްޕޯޓްސް ޓުއަރިޒަމް، މައިސް ޓުއަރިޒަމް އަދި ކަލްޗަރަލް ޓުއަރިޒަމް ޕްރޮމޯޓްކުރުމުގެ މަސައްކަތް ސަރުކާރުން ދަނީ ކުރަމުންނެވެ.