ރާއްޖޭގެ ފަތުރުވެރިކަމާއި ގުޅޭގޮތުން ލިޔެފައިވާ ޚާއްސަ ފޮތް "ޓޫ ތައުޒަން އެންޗޭންޓެޑް އައިލެންޑްސް" ނެރެފިއެވެ. މި ފޮތަކީ ދިވެހިރާއްޖޭގެ ފަތުރުވެރިކަން ފެށިގެން، ފުޅާވަމުން އައި ގޮތާއި ގުޅޭގޮތުން ލިޔެފައިވާ ފޮތެކެވެ.
ޓޫ ތައުޒަން އެންޗޭންޓެޑް އައިލެންޑްސް މި ފޮތް ތައްޔާރު ކުރީ ދިވެހި ރާއްޖެއަށް އެންމެ ފުރަތަމަ ޒިޔާރަތްކުރި ޓުއަރިސްޓު ކަމަށްވާ ޖޯޖް ކޯބިންއާއި ފޮޓޯގްރާފަރ ފްރޭންސެސްކޯ ބާނިންއާ ދެމީހުން ގުޅިގެންނެވެ. މިފޮތަކީ ޖޯޖް ކޯބިންއާއި ފްރޭންސެސްކޯ ބާނިން 1972 ވަނަ އަހަރު ތައްޔާރުކުރި ފޮތެކެވެ. ރަސްމީކޮށް ނެރެފައިނުވާ މި ފޮތަކީ، މި ދެމީހުން އެންމެ ފުރަތަމަ ފަތުރުވެރިން ގޮވައިގެން ރާއްޖެއަށް އައި ދަތުރުގަ ތައްޔާރުކުރި ފޮތެކެވެ. އެހެންނަމަވެސް މިފޮތް މިހާރު ނެރެފައިވަނީ ފަހުގެ މަޢުލޫމާތުތައް އަޕްޑޭޓްކޮށްފައެވެ.
ސަލްޓަން ޕާކްގައި ކުރިއަށްދިޔަ ރަސްމިއްޔާތުގައި މި ފޮތް ރަސްމީކޮށް ނެރުމަށްފަހު ކޯބިން ވަނީ ފޮތުގެ ގިނަ ކޮޕީތަކެއްގައި ސޮއިކޮށްފައެވެ.
މި ރަސްމިއްޔާތުގައި ވާހަކަ ދައްކަވަމުން ކޯބިން ބުނީ އޭނާ އަކީވެސް ދިވެހިންގެ ތެރެއަށް ނިސްބަތްވާ މީހެއް ކަމުގެ އިހުސާސް ރާއްޖެއަށް ކުރާ މިދަތުރުގައި ކުރެވޭކަމަށެވެ.
މިރަސްމިއްޔާތުގައި ވާހަކަދައްކަވަމުން ފަތުރުވެރިކަމުގެ ބާނީންގެ ތެރޭގައި ހިމެނިވަޑައިގަންނަވާ ހެލްތު މިނިސްޓަރ އަހުމަދު ނަސީމް ވިދާޅުވީ މިފޮތް ނެރުމަށް ނިންމެވީ ރާއްޖޭގެ ފަތުރުވެރިކަމަށް 50 އަހަރު ފުރުމާ ގުޅިގެންކަމަށެވެ.
1971 ވަނަ އަހަރު ކޯބިން ރާއްޖެއަށް ޒިޔާރަތްކުރީ ރާއްޖޭގެ ގުދުރަތީ ރީތިކަން ބަލާލާ، ފަތުރުވެރިކަން ރާއްޖެއަށް ތައާރަފްކުރެވިދާނެތޯ ބެލުމަށެވެ. އެއަށްފަހު ދެވަނަ ފަހަރަށް 1972 ވަނަ އަހަރު 12 މީހުން ހިމެނޭ އިޓަލީގެ ޓުއަރިސްޓް ގްރޫޕަކާއެކު ކޯބިން ރާއްޖެއަށް ކުރި ދަތުރަކީ ފަތުރުވެރިންގެ ގޮތުގައި ބަޔަކު ރާއްޖެއަށް ޒިޔާރަތްކުރި ފުރަތަމަ ފަހަރެވެ.