ދިވެހި ރާއްޖެއަކީ ވަރަށްވެސް ހިތްގައިމު، ރީތި ރަށްތަކެއްގެ މައްޗަށް އެކުލެވިގެންވާ ޤައުމެކެވެ. ދުނިޔޭގެ އެންމެ ރީތި މަންޒިލްތަކުގެ ތެރޭގައި މި ޤައުމުގެ ނަން، ރަން އަކުރުން ފަވާލާފައިވާ މައިގަނޑު އެއް ސަބަބަކީ މިއީއެވެ.ރާއްޖޭގެ ހުރިހާ ރަށްތަކެއްގެ ތެރެއިންވެސް އެންމެ މުހިއްމު އެއް ރަށަކީ ވެރިކަންކުރާ ރަށް، މާލެއެވެ. މާލޭގެ މަގުތަކަށް ބަލާލުމުން މިހާރު ފާހަގަވެގެންދަނީ މަގުތަކުގެ ކަންމަތިތަކާއި، ޕާކްކޮށްފައިވާ ވެހިކަލްތަކުގެ ފުރަގަހާއި، އަދި ހުސް ބިންތަކަށް އަޅާފައިވާ ކުންޏެވެ. އަދި، އުކާލާފައި އޮންނަ ކުނި ކޮތަޅުތަކެވެ. އަދި، މިފަދަ ކުނި ކޮތަޅުތަކުން ދުވާ ވަހެވެ. މިއީ، ހަމަ މި ރީތި ދިވެހިރާއްޖޭގެ ވެރިކަންކުރާ ރަށުގެ މަގުތައް ބާވައޭ ސުވާލު ކޮށްލަން ޖެހޭ މިންވަރަށް މި މައްސަލަ މިވަނީ ބޮޑުވެފައެވެ.މި މަގުތަކަކީ ހަމަ އެންމެންވެސް ބޭނުންކުރަން އޮތް މަގުތަކެކެވެ. އަދި، މި މަގުތަކުގެ ސާފު ތާހިރުކަމާއި ރީތިކަން ދެމެހެއްޓުމަކީ ހަމަ ކޮންމެ ރައްޔިތެއްގެ ކޮނޑުގައިވެސް އެޅިފައިއޮތް ޒިންމާއެކެވެ. މަގުމައްޗަށް ކުނި އެޅުމަކީ ޢާއްމު އިޖްތިމާޢީ މިންގަނޑުތަކާއި ޚިލާފް، ވަރަށް ޒިންމާދާރުކަން ކުޑަ ޢަމަލެކެވެ. އަދި މިއީ، ޤާނޫނީ ގޮތުންވެސް މަނާ ކަމެކެވެ.މި މައްސަލަ ޙައްލުކުރައްވަން ހައުސިންގ މިނިސްޓްރީން ފިޔަވަޅުތައް އަޅުއްވަމުން ގެންދަވާއިރު، މިފަދަ ޢަމަލުތައް ހިންގާ ފަރާތްތައް ހޯއްދަވައި އެ ފަރާތްތަކާމެދު ފިޔަވަޅުއަޅުއްވާނެކަމަށް ހައުސިންގ މިނިސްޓްރީން ވިދާޅުވެއެވެ. މީގެ އިތުރުން، ފިހާރަތަކުން މަގުތަކާއި ދުވާރުމަތީގައި މުދާ ބަހައްޓައިގެން ވިއްކުމަކީވެސް މަނާކަމެއްކަމަށް ހައުސިންގ މިނިސްޓްރީގެ ޢާއްމު ޚިދުމަތާބެހޭ ބައިގެ ޑިރެކްޓަރ ޖެނެރަލް ޢަބްދުލް ޙަމީދު ޢަލީ ވިދާޅުވިއެވެ.ގިނަ އަދަދެއްގެ ކުނި މާލޭގެ މަގުތަކުގައި ބަހައްޓާފައިވާކަން ފާހަގަކުރެވެއެވެ. މި ގޮތަށް ކުނި ގިނައިން ބަހައްޓާފައި ހުންނަނީ މީހުން ގިނަ އިންއުޅޭ ސަރަޙައްދުގައެވެ. އެގޮތުން ޕޭންމަންޓްމައްޗާއި މަގުމަތީގައި ހުންނަ ގަސްތަކުގެ ބުޑުގައި ކުނި ބަހައްޓާފައިހުރެއެވެ. އަދި ގިނަ އަދަދެއްގެ ފުޅިއާއި ދަޅުފަދަ ތަކެތި މަގު މައްޗަށް އަޅާފައި ހުންނަކަންވެސް ފާހަގަކޮށްލެވެއެވެ.މިކަންކަމަކީ މުޖުތަމަޢުގެ އެންމެން ކުރާ ކަމެއް ނޫންކަމުގައިވިޔަސް މަދު ބައެއްގެ މިފަދަ ޢަމަލުތަކުގެ ސަބަބުން މުޅި މުޖުތަމަޢުގެ އެންމެނަށް ދަނީ އޭގެ އުނދަގޫ ކުރިމަތިވަމުންނެވެ. މިކަމަކީ ކޮންމެ މީހަކުވެސް ވިސްނާލުން ރަނގަޅު ކަމެކެވެ.