އަންނަ އަހަރުގެ މާޗުމަހު މަޑަވެލި-ހޯނޑެއްދޫ ބްރިޖް ބޭނުންކުރަން ފެށޭނެ

ރާއްޖޭގައި އެއްރަށް އަނެއް ރަށް ގުޅާލުުގެ މަސައްކަތްތައް ކުރެވިފައި ހުރީ ވަރަށް މަދުންނެވެ. އޭގެތެރެއިން އެއް މަސައްކަތަކީ މަޑަވެލި ހޯނޑެއްދޫ ގުޅާލުމުގެ މަސައްކަތެކެވެ. އިޖްތިމާޢީ އަދި އިޤްތިޞާދީ ފުރުޞަތުތައް ފަހިކުރުމަށް އެ ދެ ރަށް ގުޅިފައި އޮތުމުގެ މުހިންމުކަން ރަށުގެ ރައްޔިތުންވެސް ފާހަގަކުރެއެވެ.

މަޑަވެލި ހޯނޑެއްދުއަކީ އެއް ފަޅެއްގެ ތެރޭގައި ގާތްގަނޑަކަށް 400 މީޓަރުގެ ދުރުމިނެއްގައި އޮންނަ ދެ ރަށެކެވެ. އެދެމެދުގައި ކުޑަ ފަޅުރަށެއްވެސް އޮވެއެވެ.

ދެ ރަށް ގުޅާލުމުގެ މަޝްރޫޢު އެންމެ ފުރަތަމަ ކުރިއަށްގެންދިޔައީ 2016ވަނަ އަހަރު، އޭރުގެ ސަރުކާރުންނެވެ. 440 މީޓަރުގެ ކޯޒްވޭއަކުން ދެ ރަށް ގުޅާލުމުގެ މަސައްކަތް ނިމި ބޭނުންކުރަން ހުޅުވާލީ 2018 ވަނަ އަހަރުގެ ކުރީކޮޅުއެވެ. ނަމަވެސް އަހަރުގެ މެދުތެރެއާއި ހަމައަށް ދިޔައިރު، ކޯޒްވޭގެ ސަބަބުން ދެން ކުރިމަތިވާން ފެށީ ތިމާވެށީގެ ބޮޑެތި މައްސަލަތަކެކެވެ.

ކޯޒްވޭ ފަރުމާކޮށްފައިވާގޮތުން، ރަނގަޅަށް އޮއެ ނުދެމޭތީ މަޑަވެލި އަދި ހޯނޑެއްދުއަށްވެސް އުދައެރުމުގެ މައްސަލަ ވަރަށް ބޮޑަށް ކުރިމަތިވާން ފެށިއެވެ. ވެލި ބެޑެއްހެން ހަދާފައި އޮތް ކޯޒްވޭއަށްވެސް ރާޅު އަރަމުންދިޔައެވެ. އަދި އޮއެ ނުދެމޭތީ ލޮނުގަނޑު ބޮޑުވެ ރަށުތެރެއަށް ރާޅުއަރާ ރަށްގިރުމުގެ މައްސަލަވެސް ވަރަށް ބޮޑަށް ކުރިމަތިވަމުންދާކަމަށް، ހޯނޑެއްދޫ ކައުންސިލްގެ ރައީސް ހުސައިން ވާރިޝްވެސް ފާހަގަކުރެއްވިއެވެ. މޫސުން ގޯސްވެ ދިޔަވަރު ބޮޑުވާ ދުވަސްވަރު ރާޅުއަރާތީ ރައްޔިތުން ނިކުމެ، ކޯޒްވޭ ބުރިވެސްކޮށްލިއެވެ.

"ވަރަށް ބޮޑެތި ގެއްލުންތައް އުދަ އަރައިގެން ވެއްޖެ. ހޯނޑެއްދޫ ބިމުން ގާތްގަނޑަ 7 ހެކްޓަރު ގެއްލިއްޖެ. އަލަށް މި ހަދަނީ ބްރިޖްކުރާ ތަނެއްވީމަ، މި މައްސަލަ ޙައްލުވާނެ. މިއީ ވަރަށް މުހިންމު މަޝްރޫޢުއެއް." ހޯނޑެއްދޫ ކައުންސިލްގެ ރައީސް ވާރިޝް ވިދާޅުވިއެވެ.

މިހާރު އޮތް ކޯޒްވޭ ނަގާ، ބްރިޖަކުން މި ދެ ރަށް ގުޅާލުމަށް ސަރުކާރުން އެމްޓީސީސީއާއި ހަވާލުކުރީ 2021 ވަނަ އަހަރުގެ އޮކްޓޯބަރު މަހުއެވެ. ނަމަވެސް މި ޕްރޮޖެކްޓްގެ ޢަމަލީ މަސައްކަތް ފެށީ މިއަހަރުގެ މަރޗްމަހުއެވެ. ޕްރޮޖެކްޓްގެ ލަސްވުމުގެ ކަންބޮޑުވުން ދެ ރަށުގެ ކައުންސިލުން ފާޅުކުރެއެވެ.

ޕްރޮޖެކްޓްގެ މަސައްކަތް ކުރިއަށްދާގޮތް ބައްލަވާލެއްވުމަށްފަހު އެމްޓީސީސީގެ ސީއީއޯ ޢާދަމް އާޒިމް ވިދާޅުވީ، މި ޕްރޮޖެކްޓް ޕްލޭންކުރެވި ކުރިއަށްދަނީ، ކުރިން ދިމާވި ތިމާވެށީގެ މައްސަލަތަކަށް ވަރަށް ބޮޑަށް ރިޢާޔަތްކުރެވިގެން އިތުރަށް ރަށަށް ގެއްލުން ނުވާނެގޮތަށްކަަމަށެވެ.

ދެ ރަށް ގުޅާލާނީ، ބްރިޖަކުންނެވެ. އަދި ދެ ރަށުގެ މެދުގައި އޮންނަ "ކަންނަގިއްލާ" ކިޔާ ފަޅުރަށް ހުރަސްކުރާ ސަރަޙައްދު ހަދާނީ ކޯޯޒްވޭއެއްގޮތަށެވެ.

އާޒިމް ވިދާޅުވީ މި މަސައްކަތުގައި ޖުމްލަ 17 ތަނބު ޖަހާނެކަމަށެވެ. މީގެތެރެއިން 2 ތަނބުގެ ޕައިލިން މަސައްކަތް ނިމި، މިހާރުކުރިއަށްދަނީ ތިންވަރަ ތަނބުގެ މަސައްކަތެކެވެ.

"ބްރިޖް ކޯޒްވޭ ނިމޭއިރު، ކުރީގެ ކޯޒްވޭގެ ސަބަބުން ރަށް ގިރުމުގެ މައްސަލަ ދިމާވި ހިސާބުތަކަށް ވެލިއަޅާ އިއާދަވެސްކުރާނަން. މުޅި މި މަޝްރޫޢު އަންނަ އަހަރު ފެބްރުއަރީއަށް ނިމޭނެ. އަދި މަރޗްމަހު މި ކޯޒްވޭއިން ރައްޔިތުން ދަތުރުކުރާނެ. މިއީ ހިތްފަސޭހަ އަދި ތިމާވެއްޓާ ރައްޓެހިކޮށް ގެންދެވޭ މަސައްކަތެއް." އާޒިމް ވިދާޅުވިއެވެ.

ވަޒީފާގެ ބޭނުންތަކާއި، އެއްރަށުން އަނެއް ރަށަށް ހިޖުރަކޮށްވެސް ދެރަށުގެ މީހުން އަންނަނީ ދިރިއުޅެމުންނެވެ. އެހެންކަމުން އެކަމަށް ހުރަސް އެޅޭގޮތަށް މަސައްކަތް ނުކުރާނެކަމަށާއި، އަލަށް ހަދާ ކޯޒްވޭގައި ދަތުރުކުރެވޭވަރު ނުވަނީސް ކުރިން ހަދާފައިވާ ކޯޒްވޭ ނުނަގާނެކަމަށް އެމްޓީސީސީން ބުނެއެވެ.

މި މަޝްރޫޢުގެ ދަށުން، 260 މީޓަރުގެ ސަރަޙައްދެއްގެ ގޮނޑުދޮށް ހިމާޔަތް ކުރުމާއި، ކޯޒްވޭގެ 2544 ކިއުބިކް މީޓަރުގެ ސެގްމެންޓް ކޮންކްރީޓް މަސައްކަތް ކުރުމާއި، 285 ސްޕަން ޕައިލް ހަރުކުރުމާއި، 4596 އަކަ މީޓަރުގެ ސަރަޙައްދެއްގައި ތާރު އެޅުމުގެ މަސައްކަތް ހިމެނެއެވެ. އަދި ޕޭވްމަންޓް ހެދުމާއި، އެޕްރޯޗް ރޯޑުގެ 3144 އަކަ މީޓަރުގެ ސަރަޙައްދެއްގައި ތާރު އެޅުމާއި، ރެއިލިންގ، މަގުބައްތި އަދި މަގުމަތީ ނިޝާން ހަރުކުރުމުގެ މަސައްކަތް ކުރާނެއެވެ.

މި މަޝްރޫއަކީ 79.4 މިލިއަން ރުފިޔާގެ މަޝްރޫޢުއެކެވެ.