ނ.ޅޮހީ ބަނދަރު ތަރައްޤީކުރުމުގެ ޢަމަލީ މަސައްކަތް ފެށުމަށް ތައްޔާރުވެއްޖެ

ނ.ޅޮހި ބަނދަރު ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ފެށުމަށްޓަކައި އެމްޓީސީސީން އެރަށުގައި ސައިޓް މޮބިލައިޒްކޮށްފިއެވެ. ޅޮހީގައި މިހާރު ބޭނުންކުރާ ބަނދަރަކީ 2008 ގައި ހަދާފައިވާ ބަނދަރެކެވެ. މަރާމާތުނުކުރެވި ގިނަ ދުވަސްވުމުގެ ސަބަބުން މި ބަނދަރު ވަނީ ވަރަށް ބޮޑަށް ހަލާކުވެފައެވެ.

ޅޮހީ ބަނދަރާ ގުޅޭ ގޮތުން ޕީއެސްއެމް ނިއުސްއާއި ވާހަކަދައްކަވަމުން ޅޮހީ ކައުންސިލްގެ ރައީސް އިބްރާހިމް މުހައްމަދު ވިދާޅުވީ ޅޮހީ ބަނދަރީ 2008 ވަނަ އަހަރު ހަދާ ބޭނުން ކުރަން ފެށި ބަނދަރެއްކަމަށެއެވެ. މަރާމާތު ނުކޮށް ގިނަ ދުވަސް ވުމުގެ ސަބަބުން ބަނދަރުގެ އެއްގަމު ތޮއްޓާއި ލަފާ ފުރުމަށް ބޭނުން ކުރާ ސަރަހައްދު ވަނީ ބޭނުން ނުކުރެވޭ ވަރަށް ހަލާކުވެފައެވެ.

އަދި ބަނދަރު ފިލާ ހަލާކުވެފައިވުމާއި، ބަނދަރު ތިލަވުމުގެ ސަބަބުން ބޮޑެތި ދޯނިތައް ކައިރިކުރަންވެސް ދަތިވެފައިވާ ކަމަށް އެނާ ވިދާޅުވިއެވެ. މީގެ އިތުރުން ބަނދަރު ތޮށި ވެއްޓިފައިވުމުން އާންމުންނަށްވެސް ބަނދަރަކީ ނުރައްކާތެރި ތަނެއް ކަމަށް އޭނާ ވިދާޅުވިއެވެ. މުހައްމަދު އިބްރާހިމް ވިދާޅުވީ މޫސުން ގަދަ ދުވަސްވަރު އޮޑިދޯނިފަހަރުތައް ފަޅުގައި އަޅައިފައި ބޭއްވުމަކީވެސް ދިވާމެފައިވާ ބޮޑު ދަތިކަމެއް ކަމަށެވެ..

" ބަނދަރުގެ އެއްގަމު ތޮށި މިވަނީ ވަރަށް ބޮޑު ހަލާކުވެފައި. ދެން އެންމެ ބޮޑަށް އުނދަގޫ މިވަނީ ނެރު ފައިކަށި ތިލަވުމުން. ބޮޑެތި ދޯނިތަކަށް ވަދެ ނިކުތުމަށް ވަރަށް ބޮޑު ތަކުލީފަކަށް މިވަނީ. ދެން ހުޅަނގު މޫސުމުގައި ދޯނިފަހަރު ފަޅުގައި އަޅާފައި ނުބޭއްވޭ ބާނި ބޮޑުކަމުން" މުހައްމަދު އިބްރާހިމް ވިދާޅުވިއެވެ.

ޅޮހީގެ ބަނދަރު ދިމާވެފައި އޮތް މައްސަލަ ހައްލުކޮށް ބަނދަރު ޒަމާނީ ފެންވަރަށް ތަރައްގީކުރުމުގެ މަސައްކަތް ސަރުކާރުން މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީއާ ޙަވާލުކުރެއްވީ މިދޔަ ޑިސެމްބަރުމަހުގެ 29 ވަނަ ދުވަހުއެވެ.

މި މަޝްރޫއުގެ ދަށުން 66701.94 ކިއުބިކް މީޓަރުގެ ބަނދަރު ފުންކުރުމާއި، 2205 ކިއުބިކް މީޓަރުގެ ނެރު ފުންކުރުމަށް ވަނީ ހަމަޖެހިފައެވެ. އަދި 281 މީޓަރުގެ ބްރޭކްވޯޓަރ ޖެހުމާއި، 40 މީޓަރުގެ ސަބްމާޖް ބްރޭކްވޯޓަރ ޖެހުމާއި، 95 މީޓަރުގެ ރިވެޓްމަންޓް ޖެހުމާއި، 366 މީޓަރުގެ އެއްގަމު ތޮށި ޖެހުމާއި، 366 މީޓަރުގެ ސްކޯރިންގ އެޕްރޮން ޖެހުމާއި، 50 މީޓަރުގެ ގްރޮއިން ޖަހާ، 10 މޫރިންގ ބޮއި ހަރުކުރުމަށްވެސްވަނީ ހަމަޖެހިފައެވެ. މީގެ އިތުރުން 121 އަކަ މީޓަރުގެ ރޭމްޕެއް ހެދުމާއި، ކޮންކްރީޓް ޖެޓީ ހެދުމާއި، 2 ނެވިގޭޝަން ލައިޓް ހަރުކުރުމާއި، 19 މަގު ބައްތި ހަރުކުރުމާއި 1720 އަކަ މީޓަރުގެ ޕޭވްމަންޓް ހެދުންވެސް މި މަޝްރޫޢުގެ މަސައްކަތްތަކުގެ ތެރޭގައި ހިމެނެއެވެ.

978 މީހުން ދިރިއުޅޭ ނ.ޅޮހީއަކީ މަސްވެރިކަމާއި ލޯކަލް ޓޫރިޒަމް އޮންނަރަށެއެވެ. އެހެންކަމުން ދުވާލެއްގެ މައްޗަށް ރަށުގެ ބަނދަރުގެ ބޭނުން ހިފާ މީހުންވެސް މަދެއްނޫނެވެ.

ޅޮހީގެ ބަނދަރު ޒަމާނީ ފެންވަރަށް ތަރައްގީ ކުރެވިގެން ދިއުމުން މިހާރު އޮތް ބަނދަރަށް ޖާގަ އިތުރުވެ ދޯނިތަކަށް އެއްވެސް ދަތިކަމެއް ނެތި ޖެޓީއާއި ގާތް ކުރެވި ރަށަށް އަރާފައިބާ ފަރާތްތަކަށް ލުއިފަސޭހަކަން ލިބިގެން ދާނެކަން އެރަށު ކައުންސިލުން ފާހަގަކުރައްވައެވެ.

ނ. ޅޮހީ ބަނދަރު އަޕްގްރޭޑްކުރުމުގެ މަސައްކަތް އެމް.ޓީ.ސީ.ސީއާ ހަވާލުކޮށްފައިވަނީ 640 ދުވަހުގެ ތެރޭގައި މަސައްކަތް ނިންމާގޮތަށެވެ. މިމަޝްރޫޢަށް ގާތްގަނޑަކަށް 68 މިލިއަނަށްވުރެ ގިނަ ރުފިޔާ ޚަރަދުވާނެކަމަށް ޕްލޭނިންގ މިނިސްޓްރީން ވިދާޅުވެއެވެ.