ވޯޓު ކަރުދާހަށް ލޯފަން މީހުން ހޭލުންތެރިކުރުމުގެ ޕްރޮގްރާމް މާދަމާ ފަށަނީ

ލޯފަން މީހުން އަމިއްލައަށް ވޯޓުލުމަށް ތަމްރީންކުރުމުގެ ޕްރޮގްރާމް މާދަމާ ފަށްޓަވާނެ ކަމަށް އިލެކްޝަންސް ކޮމިޝަނުން ވިދާޅުވެއްޖެއެވެ.

ފެނުމުން މަޙްރޫމުވެފައިވާ މީހުންނަށް އިންތިޚާބުތަކުގައި ވޯޓުލުމަށް މަގުފަހިކުރެއްވުމަށް، އިންތިޚާބުތަކާބެހޭ ޢާންމު ޤާނޫނަށް ވަނީ އިސްލާޙު ގެނެސްފައެވެ. ޤާނޫނަށް ގެނެވުނު މި އިޞްލާޙާއިއެކު ފެނުމުން މަޙްރޫމްވެފައިވާ މީހުން ވޯޓުލުމަށްޓަކަށް، ވޯޓު ކަރުދާހުގައި ޚާއްސަ ޓެމްޕްލޭޓެއް ވަނީ ހިމަނާފައެވެ.

ޕީއެސްއެމްނިއުސްގެ ރާއްޖެ މިއަދު ޕްރޮގްރާމްގައި ވާހަކަދައްވަމުން އިލެކްޝަން ކޮމިޝަންގެ ނައިބު ރައީސް އިސްމާޢީލް ޙަބީބު ވިދާޅުވީ، ތަމްރީންތައް އަތޮޅުތަކުގައާއި މާލޭގައި ފެށުމަށް ބޭނުންވާ މީހުން މިހާރު ތަމްރީންކޮށްފައިވާކަމަށެވެ.

އަދި މިޓީމްތައް އަތޮޅުތަކަށް ފޮނުވާ، 3 ސަރަޙައްދެއްގައި މާދަމާ ތަމްރީންތައް ފަށްޓަވާނެކަމަށް އިލެކްޝަންސް ކޮމިޝަންގެ ނައިބު ރައީސް އިސްމާއީލް ހަބީބު ވިދާޅުވިއެވެ. މި ތަމްރީންތައް ހިންގާ މައި ސަރަޙައްދުތަކަކީ، ހދ، އދ އަދި ގދ އަތޮޅެވެ. ޙަބީބް ވިދާޅުވީ، މިއީ ތަފާސްހިސާބަށް ބަލާއިރު ލޯފަން މީހުން އެންމެ ގިނަކަމަށް ބެލެވޭ ސަރަޙައްދުތައްކަމަށެވެ.

މިތަމްރީންގެ ތެރެއިން، ވޯޓު ކަރުދާސް އޮންނާނެ ގޮތް ޢަމަލީ ގޮތުން ތަޖުރިބާކުރުމުގެ ފުރުޞަތު ދީ، ވޯޓު ލުމަށް އެފަދަ މީހުން ހޭލުންތެރިކުރާނެއެވެ. މީގެ ޕްރެކްޓިކަލް ސެޝަންތައްވެސް ކުރިއަށްގެންދާނެއެވެ.

ޙަބީބު ވިދާޅުވީ، ޓްރެއިނަރުންގެ މެދުގައި މީގެ ޢަމަލީ ތަޖުރިބާ ހިންގިއިރު، 5-10 މިނެޓުގެ ވަގުތެއް އެކަކު ވޯޓުލާން ހޭދަވިކަމަށެވެ. ނަމަވެސް ތަމްރީން ތަކާއެކު، މި ވަގުތު ކުޑަކުރުމަކީ ވަރަށް ބޮޑު ޢަމާޒެއްކަމަށް އޭނާ ވިދާޅުވިއެވެ.

ވޯޓު ކަރުދާހުގައި ލޯފަން މީހުން ބޭނުންކުރާނީ، އެމްބޯސް ނުވަތަ ކަރުދާހުގައި އުފުލިފައި ހުންނަ ގޮތަށް ހުންނަ ކުދި ބޮޅުތަކެކެވެ. ކޮންމެ ކެންޑިޑޭޓެއްގެ ކެންޑިޑޭޓް ނަންބަރުގެ އަދަދު މި ޓެމްޕްލޭޓުން ދެނެގަނެވޭނެއެވެ. މި ޓެމްޕްލޭޓް ހުރިހާ ވޯޓު ކަރުދާސްކޮޅެއްގައިވެސް ހުންނާނެއެވެ. ލޯފަން މީހުންނަށް ޚާއްސަ ވަކި ވޯޓު ކަރުދާހެއް ބޭނުމެއް ނުކުރާނެއެވެ.

"މިސާލަކަށް ކެންޑިޑޭޓް ނަންބަރު 1ގައި އިންނާނީ އުފުލިފައި އިންނަ އެއްބޮޅު. ދޭއްގައި ދެ ބޮޅު. މިގޮތަށް އެ ކެންޑިޑޭޓެއްގެ ނަންބަރުގެ އަދަދަށް ހުންނާނީ. އެހެންވީމަ ވަރަށް ފަސޭހަވާނެ." ޙަބީބު ވިދާޅުވިއެވެ.

ޙަބީބު ވިދާޅުވީ ބްރައިލް އަކުރު ބޭނުން ނުކުރުމަށް ނިންމީ، އެއީ ރާއްޖޭގައި ފަރިތަ ކަމަކަށް ނުވާތީކަމަށެވެ.

ލޯފަން މީހުން ތަމްރީންކޮށް މަޢުލޫމާތު ދިނުމަށް، ކައުންސިލްތަކާއި އަދި މީޑިއާގައިވެސް މަޢުލޫމާތު ދިނުމުގެ ޕްރޮގްރާމްތައް ހިންގުމަށް އިލެކްޝަންސް ކޮމިޝަނުންވަނީ ނިންމަވާފައެވެ.

އިލެކްޝަންސް ކޮމިޝަނުންވަނީ ވޯޓުލާ މަރުކަޒުގައި ހަރަކާތްތެރިވާ އޮފިޝަލުން ތަމްރީން ކުރުމުގެ ޕްރޮގްރާމްވެސް މިހާރު ފަށްޓަވާފައެވެ. އެގޮތުން އަތޮޅުތަކާއި މާލޭގައިވެސް މިޕްރޮގްރާމް ވަނީ ފަށްޓަވާފައެވެ. މި އިންތިޚާބުގައި 5600އަށްވުރެ ގިނަ އޮފިޝަލުން ހަރަކާތްތެރިވާނެއެވެ.