ވިޔަފާރިއެއް ފަށަން ހުށައަޅަތާ 15 ދުވަހުގެ ތެރޭގައި ހުއްދަދީ، މަލީ އެހީދޭނަން: އިލްޔާސް

ވިިޔަފާރިއެއް ފަށަން ބޭނުންވާ މީހަކު ބިޒްނަސް ޕްލޭނެއް ހުށައަޅާތާ 15 ދުވަހުގެ ތެރޭގައި، އެކަމައް ބޭނުންވާ ފައިސާ ފަހިކޮށްދެއްވާނެކަމަށް ދަ ޑިމޮކްރެޓްސްގެ ރިޔާސީ ކެންޑިޑޭޓް އިލްޔާސް ލަބީބު ވިދާޅުވެއްޖެއެވެ.

ނ. އަތޮޅަށް ކުރައްވާ ކެމްޕެއިން ދަތުރުފުޅުގައި އެ އަތޮޅު މަނަދުއަށް ވަޑައިގެން ބޭއްވި ޖަލްސާގައި ވާހަކަފުޅުދައްކަވަމުން ރިޔާސީ ކެނޑިޑޭޓް އިލްޔާސް ވިދާޅުވީ، ވިޔަފާރިއެއް ފަށްޓަން ބޭނުންވާ މީހަކު، ޑިމޮކްރެޓްސްގެ ވެރިކަމެއްގައި ހުށަހަޅަން ޖެހޭނީ ހަމައެކަނި ބިޒްނަސް ޕްލޭނެއް ކަމަށެވެ. އެއާއެކު އެ ވިޔަފާރިއެއް ފެށުމަށް ހުއްދަ ދެއްވާނެކަމަށް އިލްޔާސް ވިދާޅުވިއެވެ.

ނ. އަތޮޅު މަނަދޫގެ ލޯކަލް ޓުއަރިޒަމް ތަރައްގީ ކުރުމަށްހުޅުވާ ވިޔަފާރިތަކުން އެރަށުގެ ރައްޔިތުންނަށް އޭގެ މަންފާ ލިބެންޖެހޭނެކަން ފާހަގަކުރައްވާ އިލްޔާސް ވިދާޅުވީ، އެކަން ފަސޭހަކުރުމުގެގޮތުން، ވިޔަފާރިއެއް ހުޅުވަން ބޭނުންވާ ކޮންމެ ރައްޔިތެއް ހުށަހަޅަން ޖެހޭނީ ހަމައެކަނި ބިޒްނަސް ޕްލޭނެއްކަމަށެވެ. އަދި
15 ދުވަހުގައި އެކަމަށް ބޭނުންވާ ފައިސާއާއި ވަސީލަތްތައް ފަހިކޮއްދެއްވާނެކަމަށް އިލްޔާސް ވައުދުވިއެވެ.

"ތިބޭފުޅުން ޓުއަރިޒަމްގެ މަސައްކަތް ކުރުމަށް ވޯޓާ ސްޕޯޓްސް ސެންޓަރެއް، ޑައިވް ސެންޓަރެއް، އެކްސްކާރޝަން ފެސިލިޓީތަކެއް، ނައިޓް ފިޝިން ފެސިލިޓީތައް ގާއިމްކުރަން، ޓުއަރިސްޓު ފިހާރަތައް ހިންގަން، އަޅުގަންޑުމެން ތިބޭފުޅުންގެ ފަރާތުން ބޭނުންވަނީ ހަމައެކަނި ތިބޭފުޅުން އެކަން ކުރާނެގޮތުގެ ބިޒްނަސް ޕްލޭންއް" އިލްޔާސް ވިދާޅުވިއެވެ.

"ފަސޭހަ ވިޔަފާރި" ސިޔާސަތަކީ ޑިމޮކްރެޓްސްގެ މެނިފެސްޓޯގެ މުހިންމު ބައެއްކަން އިލްޔާސް ފާހަގަކުރެއްވިއެވެ. މިސިޔާސަތުގެ ދަށުން ވިޔަފާރިތަކަށް މާލީ އެހީތެރިކަން ފޯރުކޮށްދެއްވާނެކަމަށް އިލްޔާސް ވިދާޅުވިއެވެ. އިލްޔާސް ވިދާޅުވީ، ވިޔަފާރިތަކަށް ބޭނުންވާ ތަފާތު އެކި ތަމްރީންގެ ފުރުޞަތުތައްވެސް ފަހިކޮށްދެއްވާނެކަމަށެވެ.

މަނަދޫގެ ތަރައްޤީއަށް ރާއްވަވާފައިވާ ކަންކަމާއި ގުޅޭގޮތުން ވާހަކަފުޅު ދައްވަމުން އިލްޔާސް ވިދާޅުވީ، އެރަށުގައި ހުންނަ ނ.އަތޮޅު ހޮސްޕިޓަލުގެ ފެންވަރު ރަނގަޅުކޮށް، އެރަށުގެ ރައްޔިތުންގެ ބޯހިޔާވަހިކަމުގެ މައްސަލަ ޙައްލު ކޮށްދެއްވާނެކަމަށެވެ. އެގޮތުން ގެދޮރު އެޅުމަށް ބޭނުންވާ ވަސީލަތާއި ފައިސާގެ އެހީ ފޯރުކޮށްދެއްވާނެކަމަށް އިލްޔާސް ވިދާޅުވިއެވެ.