"އަހަރެމެން މަސައްކަތްކުރާނީ އެމީހުންގެ ނުރައްކާތައް ކުޑަކޮށްފަ ނުވަތަ ހުއްޓުވައި، އެ ޓީމުގެ ކިރިޔާވެސް ބަލިކަށިކޮށް ފެންނަ ކަންތައްތަކުގެ ފައިދާނަގަން.ސްޕެއިނުގެ ކޯޗު، ލުއިސް ޑި ލާ ފުއެންޓޭ
ޔޫރޯ ފުޓްބޯޅަ މުބާރާތުގެ ކުއާޓާ ފައިނަލްގައި މިރޭ ޖަރުމަނާ ދެކޮޅަށް ނިކުތުމަށް ހަމަޖެހިފައިވާ މެޗުގެ ކުރީން، ސްޕެއިނުގެ ކޯޗު، ލުއިސް ޑި ލާ ފުއެންޓޭ ބުނީ، ސްޕެއިނާ ޖަރުމަނު ބައްދަލުކުރާ މެޗު ވާނީ ވަރަށް އެއްވަރު މެޗަކަށް ކަމަށާއި، އަދި އެ މެޗަކީ މުބާރާތުގެ ފައިނަލް މެޗަށްވުން ގާތް ކަމަށެވެ. ހުރިހާ ގޮތަކުން ވެސް އެ މެޗު ވަނީ ވަރަށް ހަމަހަމަ މެޗެއް ކަމަށް ފުއެންޓޭ ބުންޏެވެ.
ފުއެންޓޭ މިހެން ބުނީ، މެޗުގެ ކުރީން އިއްޔެ ބޭއްވި ނޫސްވެރިންގެ ބައްދަލުވުމުގައެވެ.
ޖަރުމަނާ ދެކޮޅަށް ކުޅޭ މެޗަށް މާގިނަ ބަދަލުތަކެއް ނުގެންނާނެ ކަމަށާއި، ފަހަރެއްގައި އެކެއް ނުވަތަ ދެ ބަދަލު ފެނިދާނެ ކަމަށާއި، އޭނާގެ ޓީމުން ނިކުންނާނީ މުބާރާތުގައި މީގެކުރީން ވެސް ކުޅެފައިވާ ގޭމް ޕްލޭންއާ އެއްގޮތަށް ކަމަށް ފުއެންޓޭ ބުންޏެވެ.
ޖަރުމަނުން އަބަދުވެސް މެޗުތައް ފަށަނީ ވަރަށް ވަރުގަދަކޮށް ކަމަށާއި، އޭނާގެ ޓީމުން މަސައްކަތްކުރާނީ އެކަން ހުއްޓުވުމަށް ކަމަށް ވެސް ފުއެންޓޭ ވަނީ ބުނެފައެވެ. އަދި އޭނާގެ ޓީމުން މެޗުގެ ފުރަތަމަ މިނެޓުން ފެށިގެން ހުރިހާ މަސައްކަތެއް ފަށާނެ ކަމަށް ވެސް ފުއެންޓޭގެ ވާހަކައިގައި ފާހަގަކުރިއެވެ. ސްޕެއިނުން އަބަދުވެސް ވިސްނާނީ އެ ޓީމުން ކުރުމަށް ހަމަޖެހިފައިވާ މަސައްކަތްތައް ކުރުމަށް ކަމަށާއި، ޖަރުމަނަށް އެމީހުންގެ މަސައްކަތް ނުކުރެވިދާނެ ކަމަށް ވިސްނައިގެން އޭނާގެ ޓީމުން މެޗަށް ނުނިކުންނާނެ ކަމަށް ވެސް ފުއެންޓޭ ބުންޏެވެ.
ފަރުވާކުޑަކޮށްލުމުގެ ސަބަބުން ބޯޅަ ގެއްލޭނަމަ އޭގެ ފައިދާ އިދިކޮޅު ޓީމުން ނަގާނެ ކަމަށާއި، އެކަމުގެ ސަބަބުން އެ ޓީމަކަށް ނުހަނު ބޮޑު ގޮންޖެހުމަކާ ކުރިމަތިލާންޖެހޭނެ ކަމަށާއި، ޖަރުމަނެކޭ އެއްގޮތަށް ސްޕެއިނުގެ އެޓޭކުގައި ވެސް ހަލުވި ކުޅުންތެރިން އެބަތިބި ކަމަށް ފުއެންޓޭ ބުންޏެވެ.
ސްޕެއިނުގެ މިޑްފީލްޑަރު، ޑަނީ އޮލްމޯގެ ފަރާތުން ޖަރުމަނުގެ ފުޓްބޯޅައާ ގުޅޭގޮތުން ލިބުނު މައުލޫމާތުގެ ބޭނުންހިފޭނެކަމާ ބެހޭގޮތުން ފުއެންޓޭ ބުނީ، އޮލްމޯގެ އިތުރުން ގްރިމަލްޑޯ އަކީ ޖަރުމަނު ފުޓްބޯޅައިގައި ތަޖުރިބާ ބޮޑު ދެ ކުޅުންތެރިންނަށް ވުމުން އެ ދެކުޅުންތެރިންނާއެކު ވެސް ގިނަ ވާހަކަތަކެއް އޭނާ ދައްކާފައިވާ ކަމަށެވެ. އެގޮތުން އެ ގައުމުގެ ފުޓްބޯޅައާ ގުޅޭ ކަންތައްތަކެއް ހިއްސާކޮށްފައިވާއިރު ޖަރުމަނުގެ ގައުމީ ޓީމާ ބެހޭގޮތުން ގިނަ އެއްޗެހި އޭނާގެ ޓީމަށް އެނގޭކަމަށާއި ހުރިހާ ކުޅުންތެރިން ވެސް ތިބީ އެ މެޗަށް ރަނގަޅަށް ތައްޔާރުވެފައި ކަމަށް ފުއެންޓޭ ބުންޏެވެ.
"އަހަރެމެން މިތިބީ މެޗު ކާމިޔާބުކުރުމަށްޓަކައި މެޗަށް ވަރަށް ރަނގަޅަށް ތައްޔާރުވެގެން، ނިކުންނާނީ ކޮނޑުގައި އެޅިފައިވާ ޒިންމާތައް އަދާކޮށް ފުރިހަމައަށް ފޯކަސްކޮށްގެން." ފުއެންޓޭ ބުންޏެވެ.
ޖަރުމަނާ ދެކޮޅަށް ސްޕެއިން ކުޅުމަށް ހަމަޖެހިފައިވާ މި މެޗު ފަށާނީ ރާއްޖޭގަޑިން މިރޭ 9 ޖަހާއިރު އެވެ.