ހަގީގީ މާނައިގައި ލާމަރުކަޒު ކުރުމަށް 52 ހަފްތާގެ ތެރޭ މުހިންމު މަސައްކަތެއް

ލާމަރުކަޒީ ނިޒާމެއް ރާއްޖެއަށް ތަޢާރަފްކޮށް އެ އުސޫލުން ހިންގުމުގެ ނިޒާމަށް ބޮޑެތި ބަދަލުތަކެއް ވަނީ ގެނެސްފައެވެ. މަރުކަޒުވެފައިވާ ބާރުތަކެއް ރަށްރަށުގެ ރައްޔިތުންގެ އަތްމައްޗަށް ދޫކޮށްލުމަކީ މި ނިޒާމުގެ ހަގީގީ ތަޞައްވުރެވެ. ނަމަވެސް 14 އަހަރު ފަހުންވެސް ނިޒާމަށް ބޭނުންވާ ބަދަލުތަކެއް އައިސްފައި ނުވެއެވެ.

އަދުގެ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާއި ހަވާލުވެ ވަޑައިގަތީ، ނިޒާމުގެ ދެކޮޅުވެސް އަމިއްލަފުޅަށް ތަޖުރިބާ ކުރެއްވުމަށް ފަހުއެވެ. ހައުސިންގް މިނިސްޓަރުގެ މަޤާމުގައި، 7 އަހަރު ދުވަހު ސަރުކާރުގެ ފަޅިން ނިޒާމު ތަންފީޒު ކުރުމުގައި ހުރި ގޮންޖެހުންތައް ފެނިވަޑައިގަތެވެ. އަދި މާލޭގެ މޭޔަރު ކަމުގައި ނިޒާމީ ގޮތުން އިދާރީ ދާއިރާތަކަށް ހުރި ގޮންޖެހުންތައް ތަޖުރިބާ ކުރެއްވިއެވެ.

އެހެން ކަމުން އެމަނިކުފާނު ވެރިކަމާއި ހަވާލުވެވަޑައިގަތީ، ނިޒާމު ހަމައަކަށް އަޅުވަން އަޒުމު ކަނޑައަޅުއްވައިގެންނެވެ. ސަރުކާރުގެ ސިޔާސަތުތައް ކަނޑައެޅުމުގައި، ރައްޔިތުންގެ ޚިޔާލު ހިމަނައި، ކައުންސިލްތައް ބާރުވެރި ކުރުވުމަށް މެނިފެސްޓޯގައި ހިމަނުއްވައި ކައުންސިލްތަކާއި ރައްޔިތުން ގުޅުވައި ދިނުމަށް ޚާއްސަ ވުޒާރާއެއް އުފެއްދެވިއެވެ. އެ ވުޒާރާގެ މަސައްކަތަކަށްވީ ކައުންސިލްތަކުގެ ހިންގުމުގެ ތެރެއަށް ނުވަދެ، ސަރުކާރާއި ކައުންސިލްތަކާއި ދެމެދު ހީނަރުވެފައިވާ ގުޅުން ރަނގަޅުކޮށް ކައުންސިލްތަކަށް ބޭނުންވާ ކަންކަން ސަރުކާރުގެ ތެރެއިން ފަހިކޮށްދިނުމެވެ.

މިމަސައްކަތަށް އައު ވުޒާރާއެއް އުފައްދަވައިގެން ފައްޓަވައި، ރާއްޖޭގެ 169 ކައުންސިލަކަށް ރައީސުލްޖުމްހޫރިއްޔާ އަމިއްލަފުޅަށް ޒިޔާރަތްކުރެއްވިއެވެ. އަދި ކައުންސިލްތަކުގެ ކަންބޮޑުވުންތައް ވަރަށް ގާތުން އަޑުއައްސަވާ އެކަންކަމަށް ހައްލުތައް ހޯއްދަވައިދެއްވާނެ ކަމުގެ ޔަޤީންކަން އެމަނިކުފާނު ވަނީ އަރުވާފައެވެ.

ލާމަރުކަޒީ ނިޒާމަށް 14 އަހަރު ވެފައިވާއިރު މިހާތަނަށް 10 އިސްލާހެއް، ޤާނޫނަށް ވަނީ ގެނެވިފައެވެ. ނަމަވެސް މި އިސްލާހުތަކަކީ އެންމެ ބޭނުންތެރި އަދި އޭގެ ފައިދާ ރައްޔިތުންނަށް ކުރާ އިސްލާހުތަކެއްތޯ ބެލުމަކީ މުހިންމުކަމެއް ކަމަށް ސަރުކާރުން ދެކެއެވެ.

މިއާއެކު ސަރުކާރުން ނިޒާމު ހަރުދަނާ ކުރުމަށް ބަދަލުތަކެއް ގެނައީ ޢިލްމީ ދިރާސަތަކެއް ކުރުމަށް ފަހުއެވެ. ޤައުމީ ޔުނިވަރސިޓީ މެދުވެރިކޮށް ކުރި މިދިރާސާގެ އަލީގައި ނިޒާމުގައި ހުރި ކަންބޮޑުވުންތައް ދެނެގަނެވިފައިވެއެވެ. މީގެ އިތުރުން ނިޒާމުގެ އެންމެ ޅަފަތުގެ ދައުރުން ފެށިގެން މިހާތަނަށް މަސައްކަތް ކުރައްވާފައިވާ ތަޖުރިބާކާރުންނާއި ބައްދަލުކޮށް އެ ފަރާތްތަކަށް ދިމާވި ގޮންޖެހުންތައް ސަރުކާރުން ވަނީ އޮޅުންފިލުވާފައެވެ.

ސަރުކާރުން ކައުންސިލްތައް ބާރުވެރިކުރުމަށް އެންމެ އިސްކަމެއް ދިނީ މާލީ ޤާބިލްކަން ކައުންސިލްތަކަށް ހޯދައި ދިނުމަށެވެ. އެގޮތުން ކޮންމެ ކައުންސިލަކަށްވެސް އެ ކައުންސިލެއްގެ އިޙްތިޞާސް ތެރެއިން ނުވަތަ އެހެން ސަރަހައްދަކުންވެސް ފަޅު ރަށެއް ލިބޭނެ އިންތިޒާމު ހަމަޖެއްސިއެވެ. އަދި މި ރަށްތަކުގައި އިޤްތިޞާދީ މަސައްކަތެއްކޮށް އާމްދަނީ ލިބޭނެ މަގު ސަރުކާރުން ފަހިކޮށްދީފައިވެއެވެ.

މިއާއެކު ކައުންސިލްތަކުގެ އިންސާނީ ވަސީލަތްތައް ތަރައްޤީ ކުރުމުގެ އިތުރުން ޢުމްރާނީ ވަސީލަތްތައް ތަރައްޤީ ކުރުމުގެ މަސައްކަތް ސަރުކާރުން ފެށްޓެވިއެވެ. ސަރުކާރުން ކައުންސިލްތަކުގެ ހާލަތު ބެލުމަށް ކުރެއްވި ޒިޔާރަތުގައި ރާއްޖޭގެ 102 ކައުންސިލަކަށް ވަގުތުން ވަގުތަށްވެސް އައު އިމާރާތެއް ބޭނުންވެފައިވާކަން ފާހަގަވިއެވެ. އެއާއެކު އިތުރު 50 ކައުންސިލް އިމާރާތް އެޅުމަށް ޗައިނާ ސަރުކާރުގެ އެހީ ހޯދުމަށް ވަނީ ނިންމާފައެވެ.

މި ވޭތުވެ ދިޔަ 52 ހަފްތާ ތެރޭގައި ސަރުކާރުން ހޯދި އެންމެ ބޮޑު އެއް ކާމިޔާބީ އަކީ ނިޒާމު ހަރުދަނާ ކުރުމަށް ސަރުކާރާއި ކައުންސިލްތަކާއި ގުޅުވައި ދިނުމަށް ކުރެވުނު މަސައްކަތް ކަމަށް ސަރުކާރުން ޤަބޫލުކުރެއެވެ. މިއާއެކު ސަރުކާރުން ނިޒާމަށް ގެންނަ ބަދަލުތަކަކީ އޭގެ ފައިދާ ރައްޔިތުންނަށް ފެންނާނެ ބަދަލުތަކެއް ކަމަށް ސަރުކާރުން ޤަބޫލުކުރެއެވެ.