ފެކްޓްރީ ހަދައިގެން ހިންގި ބިދޭސީ ވިޔަފާރިތައް ހުއްޓުވައިފި، ބިދޭސީންގެ މައްސަލަ ބޮޑު ހައްލަކާދިމާއަށް

ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް ހިންގި ރެއިޑް އޮޕަރޭޝަންތަކުގައި އެންމެ ބޮޑަށް އިސްކަންދިނީ، ގޭގޭގައި ފެކްޓްރީ ހަދައިގެން ދިވެހިންގެ ނަމުގައި ހިންގަމުންދިޔަ ވިޔަފާރިތައް ހުއްޓުވުމަށްކަމަށް ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވެއްޖެއެވެ. ކޮންޓްރޯލަރ ވިދާޅުވީ އެންމެ ބޮޑު ކަންބޮޑުވުމަކީ ސާފުތާހިރުކަން ކުޑަކޮށް ކާބޯތަކެތި ތައްޔާރުކޮށްގެން ދިވެހިންގެ ނަމުގައި އޭގެ ވިޔަފާރިކުރުންކަމަށެވެ.

ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ކަނޑައަޅާފައިވާ އަމާޒު ހާސިލުކުރުމަށް މިދިޔަ އަހަރެއްހާ ދުވަހުގެ ތެރޭގައި ގިނަ މަސައްކަތްތަކެއް ސަރުކާރުން ވަނީ ކުރައްވާފައެވެ. ޕީއެސްއެމް ނިއުސްއިން ގެނެސްދިން "ހަފްތާ 52" ޕްރޮގްރާމުގައި އެކަންކަމާ ގުޅޭގޮތުން ވާހަކަ ދައްކަވަމުން، ކޮންޓްރޯލަރ ޖެނެރަލް އޮފް އިމިގްރޭޝަން މުޙައްމަދު ޝަމްޢާން ވަޙީދު ވިދާޅުވީ ޤަވާއިދާ ޚިލާފަށް އުޅޭ ބިދޭސީންގެ މައްސަލަ ހައްލު ކުރުމަށް، ދައުލަތުގެ ނިޒާމުގެތެރޭގައި ހުރި ގިނަ މައްސަލަތައް ހައްލުކުރުމަށް އިސްކަން ދެއްވިކަމަށެވެ.

ފުރަތަމަކަމަކަށް، މި މައްސަލަ ޙައްލުކުރުމަށް އިމިގްރޭޝަން ނިޒާމުގެތެރޭގައިވެސް ގިނަ މައްސަލަތަކެއް ހުރިކަން ކޮންޓްރޯލަރ ފާހަގަކުރެއްވިއެވެ. ނަމަވެސް އެ ނިޒާމުގެ މައްސަލަތައް ޙައްލުކޮށް، ބައެއް ޢަމަލުކުރަމުން އައި ބައެއް އުސޫލްތަކަށްވެސް ބަދަލުތަކެއް ގެންނެވިކަމަށް ޝަމްޢާން ވިދާޅުވިއެވެ. ޚާއްޞަކޮށް އެމައްސަލަ ހައްލުކުރުމަށް މަދު ދުވަސްކޮޅެއްގެތެރޭގައި އެކަމަށް ޚާއްޞަ ސޮފްޓްވެއަރއެއް ތައްޔާރުކުރެވި، ދައުލަތުގެ ހުރިހާ އިދާރާތަކުން މައުލޫމާތު ލިބޭނެ ނިޒާމެއް ހަމަޖެހުނުކަމަށް ވިދާޅުވިއެވެ.

މިއާއެކު ދާޚިލީ ވުޒާރާގެ ދަށުން ހިންގަމުންދާ ތަންފީޒީ އެހެން އިދާރާތަކާއި ގުޅިގެން ކުރެވޭ މަސައްކަތް ޝަމްޢާން ފާހަގަކުރެއްވިއެވެ. އަދި މީގެ ކުރިން ނުކުރެވޭ މިންވަރަށް ބިދޭސީންގެ މައްސަލަ ހައްލުކުރުމަށް މަސައްކަތްތަކެއް ފެށުނުކަމަށްވެސް ޝަމްއާން ވިދާޅުވިއެވެ.

އިމިގްރޭޝަން ކޮންޓްރޯލަރ ވިދާޅުވީ، ޤަވާއިދާ ޚިލާފަށް އުޅޭ ބިދޭސީންގެ މައްސަލަ ޙައްލުކުރުމަށް ކުރެއްވި މަސައްކަތުގެތެރެއިން އެންމެ ބޮޑަށް ފާހަގަކުރެވުނު އެއް މައްސަލައަކީ ދިވެހިން ނިވާފަތްގަނޑަކަށް ހަދައިގެން ހިންގަމުން ދިޔަ ވިޔަފާރިތަކުގެ މައްސަލަ ކަމަށެވެ. ޚާއްޞަކޮށް އެތަންތަނުގައި ސާފުތާހިރުކަން ކުޑަކަންވެސް ކޮންޓްރޯލަރ ފާހަގަކުރެއްވިއެވެ.

"ރެއިޑް އޮޕަރޭޝަންތަކުން ވަރަށް ބޮޑަށް ފާހަގަވި ބައެއް ގޭގޭގައި ބޮޑެތި ފެކްޓަރީތައް ހަދާފައި ހުރިތަން. ދިވެހިން ކާންބޯކުރާ މަސައްކަތް ދިވެހި ލޭބަލް ޖަހައިގެން، ދިވެހި އުފެއްދުންތައް ކަމަށް ހަދައިގެން ވިޔަފާރިކުރަމުން އެބަދޭ. އަޅުގަނޑުމެން އަހަރު ދުވަހު ތެރޭ އެންމެ ބޮޑު ފޯކަސްއެއް ދިނީ ޤަވާއިދާއި ޚިލާފަށް ވިޔަފާރިކުރާ މީހުންނަށް. " މުޙައްމަދު ޝަމްޢާން ވަޙީދު ވިދާޅުވިއެވެ.

ކޮންޓްރޯލަރ ވިދާޅުވީ، ރާއްޖޭގައި ޤަވާއިދާއި ޚިލާފަށް ދިވެހިން ނިވާފަތްގަނޑަކަށް ހަދައިގެން ބޮޑެތި ވިޔަފާރިތައް ކުރަމުންދާ ބިދޭސީންނަށް، އިތުރު ފުރުސަތެއް ނުދީ ފޮނުވާލަމުންދާ ކަމަށެވެ. މިއާއެކު މިވޭތުވެދިޔަ އަހަރު ތެރޭގައި 5000އަށް ވުރެ ގިނަ ބިދޭސީން ޑީޕޯޓްކޮށްލާފައިވާކަމަށާއި، އެއީ ރެކޯޑު އަދަދެއްކަމަށްވެސް ކޮންޓްރޯލަރ ވިދާޅުވިއެވެ.

މީގެއިތުރަށް ޤަވާއިދާ ޚިލާފަށް އުޅޭ ބިދޭސީން ދެނެގަތުމަށް ޚާއްޞަ އިންސްޕެކްޝަންތައް ހިންގައި، އެކި ތަންތަން ބަލައި ފާސްކުރުންތައްވެސް ހިންގަމުން އަންނަކަމަށް ޝަމްޢާން ވިދާޅުވިއެވެ. އަދި ބިދޭސީންނަށް އިހުމާލުވާ ދިވެހިންނާއި ކުންފުނިތައް ދެނެގަނެ، އެފަދަ ފަރާތްތަކާއި ކުންފުނިތައް ޖޫރިމަނާކުރަމުން އަންނަކަމަށްވެސް ވިދާޅުވިއެވެ. ނަމަވެސް ފިޔަވަޅު އެޅުމަށްވުރެ ބޮޑަށް އިސްލާހުކުރުމަށްވެސް ފުރުސަތުވޭ ދެވޭކަން ޝަމްޢާން ފާހަގަކުރެއްވިއެވެ.

ޤަވާއިދާ ހިލާފަށް އުޅޭ ބިދޭސީން އަނބުރާ ފޮނުވާލުމުގެ އިތުރުން ރާއްޖޭގައި މަސައްކަތްކުރާ ހުރިހާ ބިދޭސީންގެ ތަފްސީލީ މަޢުލޫމާތުތައް އެއްކުރުމުގެ މަސައްކަތްވެސް ސަރުކާރުން އަންނަނީ ކުރައްވަމުންނެވެ. ރާއްޖޭގައި ދިރިއުޅޭ ހުރިހާ ބިދޭސީންގެ މަޢުލޫމާތު އެނގޭނެ ބައޯމެޓްރިކްސް އެއްކުރުމުގެ މަސައްކަތްވެސް ހަލުއި ދުވެލީގައި ސަރުކާރުން އަންނަނީ ކުރަމުންނެވެ.