މި ސަރުކާރުން ޤާނޫނު އަސާސީއާ ޚިލާފު އެއްވެސް ކަމެއް ކޮށްފައެއް ނޯންނާނެ: ޢަބްދުއްރަޙީމް

މި ސަރުކާރުން މިހާތަނަށް ޤާނޫނު އަސާސީއާ ޚިލާފު އެއްވެސް ކަމެއް ކޮށްފައި ނޯންނާނެކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.

ރައްޔިތުންގެ މަޖިލީހުގެ ރައީސް މިހެން ވިދާޅުވީ، މަޖިލީހުގެ މި އަހަރުގެ އެންމެ ފަހު ދައުރުގެ މަސައްކަތްތަކާ ގުޅޭގޮތުން ޕީއެސްއެމް ނިއުސްގެ ބާބު ޕްރޮގްރާމުގައި ވާހަކަފުޅުދައްކަވަމުންނެވެ.

ރައްޔިތުންގެ މަޖިލީހުގެ މި ދައުރުގެ ތެރޭގައި ގިނަ މަސައްކަތްތަކެއް ކުރެވިފައިވާ ކަމަށް ރައްޔިތުންގެ މަޖިލީހުގެ ރައީސް ވިދާޅުވިއެވެ. އެގޮތުން ކުރެވުނު އެންމެ މުހިންމު މަސައްކަތެއްގެ ގޮތުގައި އެމަނިކުފާނު ފާހަގަކުރެއްވީ ޤާނޫނު އަސާސީއަށް ގެނައި އިސްލާހުގެ މަސައްކަތެވެ. މަޖިލިސް ރައީސް ވަނީ މި އިސްލާހަކީ ރައްޔިތުން ބާރުވެރިކުރުވުމަށް ގެނައި އިސްލާހެއްގެގޮތުގައި ސިފަކުރައްވާފައެވެ.

މަޖިލީހުގެ ރައީސް ޢަބްދުއްރަޙީމް ވިދާޅުވީ، މި އިސްލާހާއި ގުޅިގެން ދައްކަވަނީ މެންބަރުން ޕާޓީ ބަދަލުކުރާ މައްސަލައިގެ ވާހަކަ އެކަނި ކަމަށެވެ. ނަމަވެސް މި އިސްލާހުގައި މުހިންމު ގިނަ ކަންކަން ހުރިކަން އެމަނިކުފާނު ފާހަގަކުރެއްވިއެވެ. އެގޮތުން އަސްކަރީ ހަރަކާތެއް ހިންގުމަށް މަޖިލީހުގެ ރުހުން ހޯދުންފަދަ ކަންކަމަކީ ރައްޔިތުންގެ ބާރު ހޯދުން ކަމަށް ޢަބްދުއްރަޙީމް ވިދާޅުވިއެވެ.

މަޖިލީހުގެ ރައީސް ވަނީ ޕީއެންސީން ކުރާ މަސައްކަތަކީ ޤާނޫނު އަސާސީގެ ބާރު ދެމެހެއްޓުމާއި، ގެއްލުވާލާފައިވާ ޤަދާރާއި އިޙްތިރާމް ހޯއްދަވައިދެއްވުން ކަމަށް ވިދާޅުވެފައެވެ. އަދި މި ސަރުކާރުން މިހާތަނަށްވެސް ޤާނޫނު އަސާސީއާ ޚިލާފު އެއްވެސް ކަމެއް ކުރައްވާފައި ނުވާނެ ކަމަށް އެމަނިކުފާނު ވިދާޅުވިއެވެ.

"ޤާނޫނު އަސާސީގެ ދިފާއުގައޭ ކިޔައިގެން ދާއްކާނެ އެއްވެސް ހަޤީޤަތެއް އޮތްވާހަކައެއް ނޯންނާނެ. ޕީއެންސީގެ ސަރުކާރު އުފެދުނު ފަހުން އަދި މިހާތަނަށް 20 ވަނަ ރައްޔިތުންގެ މަޖިލީސް އައިިފަހުންވެސް ޤާނޫނު އަސާސީއާ ޚިލާފު އެއްވެސް ކަމެއް ކޮށްފައެއް ނޯންނާނެ." ޢަބްދުއްރަޙީމް ވިދާޅުވިއެވެ.

ޢަބްދުއްރަޙީމް ވަނީ ޤާނޫނު އަސާސީގެ ބާރުކަނޑުވާލައިގެން އިދިކޮޅުން ނިކުންނަން ޖެހޭނެ އެއްވެސް ކަމެއް މިސަރުކާރުން ކޮށްފައި ނުވާނެ ކަމަށް ވިދާޅުވެފައެވެ.

އެހެންނަމަވެސް އެމްޑީޕީ ވެރިކަމުގައި ޤާނޫނު އަސާސީއާ ޚިލާފަށް މަސައްކަތްކޮށްފައިވާކަން ޢަބްދުއްރަޙީމް ފާހަގަކުރެއްވިއެވެ. އޭގެ ތެރޭގައި އެ ޕާޓީގެ ފުރަތަމަ ސަރުކާރުގައި ރައްޔިތުންގެ މަޖިލީހުން ރުހުން ހޯއްދަވަން ޖެހޭކަންކަން ރުހުން ނުހޯއްދަވާ ކުރެއްވިކަމަށް އެމަނިކުފާނު ވިދާޅުވިއެވެ. އަދި ދެވަނަ ސަރުކާރުގައިވެސް އެކަން އެގޮތަށް ތަކުރާރު ކުރެއްވިކަމަށް ރައްޔިތުންގެ މަޖިލީހުގެ ރައީސް ވިދާޅުވިއެވެ.

ޤާނޫނު އަސާސީއަށް ގެނައި އިސްލާހާއި ގުޅިގެން ޤާނޫނު އަސާސީގެ ދިފާޢުގައި ކަމަށް ބުނެ އިދިކޮޅުން ސިޔާސީ ހަރަކާތްތައް ހިންގަމުންދާއިރު، ސަރުކާރުން ވަނީ ޤާނޫނު އަސާސީއަށް ގެނައި ބަދަލުތަކަކީ ރައްޔިތުންގެ ހައްޤުގައި ގެނައި މުހިންމު ބަދަލުތަކެއް ކަމަށް ވިދާޅުވެފައެވެ.