ހަފްތާ ބަންދުގައިވެސް މޫސުން ގޯސް، ކަނޑު ދަތުރުކުރުމުގައި އިތުރަށް ސަމާލުވޭ!

ރާއްޖެއަށް މިހާރު ކުރަމުންދާ ވިއްސާރައާއި ގުޅިގެން ހަފްތާ ބަންދުގައިވެސް މޫސުން ގޯސްވާނެ ކަމަށް މޫސުމާއި ބެހޭ ޤައުމީ އިދާރާއިން ވިދާޅުވެއްޖެއެވެ.

ހަފްތާ ބަނދުގައި މޫސުން ގޯސްވާނެކަމަށް ލަފާކޮށް މޫސުމާއި ބެހޭ ޤައުމީ އިދާރާއިން ވިދާޅުވީ، ހުކުރު ހޮނިހިރު މި ދެ ދުވަހުވެސް ރާއްޖޭގެ ބޮޑު ސަރަހައްދަކަށް ވިއްސާރަ ކުރާނެ ކަމަށާއި، ރާއްޖޭގެ އުތުރުގެ ސަރަހައްދަށް ގުގުރުމާއެކު ބޯކޮށް ވާރޭވެހޭނެ ކަމަށް ލަފާކުރެވޭކަމަށެވެ. އަދި މެދުތެރެއާ ދެކުނުގެ ރަށްތަކަށް ގަދަވަޔާއެކު ވިއްސާރަކުރާނެ ކަމަށް ލަފާކޮށްފައިވެއެވެ.

ހުޅަނގު މޫސުން ނިމި، އިރުވައި މޫސުން ފެށޭ ދުވަސްވަރު ރާއްޖެ ސަރަހައްދުގައި ކޮޅިގަނޑުތައް އުފެދުމުގެ ފުރުޞަތު އޮންނަކަމަށް މެޓް އޮފީހުން ވިދާޅުވެއެވެ. އެގޮތުން، ބަންގާޅު ކަނޑުގައި އުފެދިފައިވާ ކޮޅިގަނޑެއްގެ އިތުރުން، ރާއްޖެއާ ދުރުން ހުޅަނގުންވެސް ކޮޅިގަނޑެއް އުފެދިފައިވާ ކަމަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ.

މޫސުން ގޯސްވާނެތީ އެ އިދާރައިން ވަނީ ރާއްޖޭގެ ބޮޑުބަޔަކަށް ހުދު ސަމާލުވެސް ނެރެފައެވެ. އެގޮތުން ހއ. އަތޮޅުން ފެށިގެން އދ. އަތޮޅަށް މިރޭ 9:00 ޖެހުމާއި ހަމައަށް ވަނީ ވައިޓް އެލާޓް ނެރެފައެވެ. މީގެ އިތުރުން ބ. އަތޮޅުން ފެށިގެން އައްޑޫ ސިޓީއާ ހަމައަށް މިރޭ 8:30 އާއި ހަމައަށް ވަނީ އެލާޓް ނެރެފައެވެ. މިއާއެކު ވިލާގަނޑުގައި 45 މޭލަށް ވައިގަދަވާނެ ކަމަށް ވަނީ ލަފާކޮށްފައެވެ.

މެޓް އޮފީހުން ވަނީ، ކުރިއަށް އޮތީ ސްކޫލް ބަންދު ދުވަސްތަކަކަށް ވުމުން ކަނޑުދަތުރު ކުރައްވާ ފަރާތްތަކުން މޫސުމާއި ބެހޭ ޤައުމީ އިދާރާއިން ނެރޭ ސަމާލުތަކަށް ސަމާލުވުމަށް އިރުޝާދު ދެއްވާފައެވެ.

އިއްޔެއިން ފެށިގެން 5 ދުވަހަށް ރާއްޖޭގެ މޫސުން ގޯސްވާނެ ކަމަށް ލަފާކޮށްފައިވާއިރު، މޫސުން އަލިވާނެ ކަމަށް ލަފާކުރެވޭނީ ހޯމަ ދުވަހުން ފެށިގެންކަމަށް އެއިދާރައިން ވަނީ ވިދާޅުވެފައެވެ.