ހަތް މެޖިސްޓްރޭޓް ކޯޓަކަށް ފަނޑިޔާރުން އައްޔަންކޮށްފި

ޖުޑީޝަލް ސަރވިސް ކޮމިޝަން، ޖޭއެސްސީން 7 މެޖިސްޓްރޭޓް ކޯޓަކަށް ފަނޑިޔާރުން އައްޔަންކޮށްފިއެވެ. އެ ކޯޓަކަށް ފަނޑިޔާރުން އައްޔަންކުރަން އެ ކޮމިޝަނުން ނިންމާފައިވަނީ ކޮމިޝަނުގެ 65 ވަނަ ބައްދަލުވުމުގައެވެ.

ދިވެހިރާއްޖޭގެ މެޖިސްޓްރޭޓް ކޯޓުތަކަށް ފަނޑިޔާރުން ހޯދުމަށް ޖޭއެސްސީން އިއުލާންކުރީ މިދިޔަ އޮކްޓޯބަރު މަހުގެ ތެރޭގައެވެ. ފަނޑިޔާރުން އައްޔަން ކުރައްވަނީ ކުރިމަތިލައްވާ ފަރާތްތަކުގެ ތެރެއިން ފަނޑިޔާރުން ޢައްޔަންކުރުމުގައި ކޮމިޝަނަށް ލަފާދޭ ކޮމިޓީން އިންޓަރވިއުކުރުމަށްފަހު ފަނޑިޔާރުކަމަށް ޢައްޔަންކުރުމަށް ޖޭއެސްސީއަށް ލަފާއަރުވާ ފަރާތްތަކުގެ ތެރެއިންނެވެ.

ޖޭއެސްސީން ފަނޑިޔާރުން އައްޔަން ކުރައްވާފައިވަނީ ހއ. ބާރަށު މެޖިސްޓްރޭޓް ކޯޓާއި ބ. ކެންދޫ މެޖިސްޓްރޭޓް ކޯޓު، ބ. ތުޅާދޫ މެޖިސްޓްރޭޓް ކޯޓު، ކ. މާފުށި މެޖިސްޓްރޭޓް ކޯޓު، ކ. ކާށިދޫ މެޖިސްޓްރޯޓް ކޯޓު، ލ. މާވަށު މެޖިސްޓްރޭޓް ކޯޓު އަދި ގދ. ގައްދޫ މެޖިސްޓްރޭޓް ކޯޓަށެވެ.

ބާރަށު މެޖިސްޓްރޭޓް ކޯޓުގެ އިސް މެޖިސްޓްރޭޓްގެ މަގާމަށް އައްޔަން ކުރައްވާފައިވަނީ ހއ. ބާރަށް، ރޭސަމް، އަލްއުސްތާޛު ޢަބްދުﷲ ޖައިލަމެވެ. ދިވެހިރާއްޖޭގެ ޤައުމީ ޔުނިވަރސިޓީން ބެޗްލަރ އޮފް ޝަރީޢާ އެންޑް ލޯ ޙާސިލްކުރައްވާ ޢަބްދުﷲ ޖައިލަމްއަކީ ޝަރުޢީ ދާއިރާގައި 5 އަހަރު ދުވަހުގެ ތަޖުރިބާ ހުރި ބޭފުޅެކެވެ.

ބ. ކެންދޫ މެޖިސްޓްރޭޓް ކޯޓުގެ އިސް މެޖިސްޓްރޭޓަކަށް ޖޭއެސްސީން އައްޔަންކުރައްވާފައިވަނީ އެރަށު، ސައްކެޔޮގެ، އަލްއުސްތާޛު ޖިނާން ޢަބްދުﷲއެވެ. އޭނާ ވަނީ ދިވެހިރާއްޖޭގެ އިސްލާމީ ޔުނިވާސިޓީއިން ބެޗްލަރ އޮފް ޝަރީޢާ އެންޑް ލޯ ވިތު އޮނާރސް ޙާސިލްކުރަށްވާފައެވެ. އޭނާއަކީ ޝަރުޢީ ދާއިރާގައި 6 އަހަރަށް ވުރެ ގިނަ ދުވަހުގެ ތަޖުރިބާ ލިބިފައިވާ ބޭފުޅެކެވެ.

ތުޅާދޫ މެޖިސްޓްރޭޓް ކޯޓުގެ އިސް މެޖިސްޓްރޭޓަކަށް އައްޔަން ކުރައްވާފައިވަނީ ލ.މާވަށް، އެންދެރިމާގެ، އަލްއުސްތާޛު އިސްމާޢީލް މާހިރުއެވެ. އެނާ ވަނީ ވިލާ ކޮލެޖުން ބެޗްލަރސް އޮފް ޝަރީއާ އެންޑް ލޯ ޙާސިލްކުރައްވާފައެވެ. އޭނާ ވަނީ 2013 އިން 2023 އަށް ލ. މާވަށު މެޖިސްޓްރޭޓް ކޯޓުގެ އިސްމެޖިސްޓްރޭޓެއްގެ ގޮތުގައި މަސައްކަތްކުރައްވާފައެވެ.

ކ. މާފުށި މެޖިސްޓްރޭޓް ކޯޓުގެ މެޖިސްޓްރޭޓްކަމަށް ޢައްޔަންކުރައްވާފައިވަނީ އެރަށު ޝާހީ، އަލްއުސްތާޛާ ޝިފްނާ އަޙްމަދު ޞާދިޤުއެވެ. އޭނާ ވަނީ ދިވެހިރާއްޖޭގެ ޤައުމީ ޔުނިވަރސިޓީއިން ބެޗްލަރ އޮފް ޝަރީޢާ އެންޑް ލޯ (އޮނާރސް) ފަސްޓް ކްލާސް ޙާސިލްކުރައްވައި، އެވިޑް ކޮލެޖްއިން މާސްޓަރ އޮފް ބިސްނަސް އެޑްމިނިސްޓްރޭޝަން ޙާސިލްކުރައްވާފައެވެ.

މާލެއަތޮޅު ކާށިދޫ މެޖިސްޓްރޭޓް ކޯޓުގެ އިސްމެޖިސްޓްރޭޓްކަމަށް ފ. ދަރަނބޫދޫ، ރޯޝަނީގެ، އަލްއުސްތާޛު ޢަލީ އިސްމާޢީލް ޢައްޔަނުކުރައްވާފައިވާއިރު އޭނާއަކީ ޝަރުޢީ ދާއިރާގައި 4 އަހަރަށްވުރެ ގިނަ ދުވަހުގެ ތަޖުރިބާލިބިފައިވާ ބޭފުޅެކެވެ. އޭނާ ވަނީ ދިވެހިރާއްޖޭގެ ގައުމީ ޔުނިވަރސިޓީއިން ބެޗްލަރ އޮފް ޝަރީޢާ އެންޑް ލޯ އަދި އިސްލާމިކް ޔުނިވަރސިޓީ އޮފް މޯލްޑިވްސްއިން މާސްޓަރ އޮފް ލޯސް (ކޮމްޕަރޭޓިވް ޖުރިސްޕްރޫޑެންސް) އާއި މަސްޓަރ އޮފް ޖުޑީޝަލް ސައިންސް އެންޑް ޝަރީޢާ ޕޮލިސީ ޙާސިލްކުރައްވާފައެވެ.

ލ. މާވަށު މެޖިސްޓްރޭޓް ކޯޓުގެ އިސްމެޖިސްޓްރޭޓް ކަމަށް ޢައްޔަން ކުރައްވާފައިވަނީ ލ. ގަން، މަތިމަރަދޫ، ފަޒާ، އަލްއުސްތާޛު އަޙްމަދު ޝާފީއެވެ. އޭނާ ވަނީ ދިވެހިރާއްޖޭގެ ޤައުމީ ޔުނިވަރސިޓީއިން ބެޗްލަރ އޮފް ޝަރީޢާ އެންޑް ލޯ (އޮނާރސް) އަދި މާސްޓަރ އޮފް ލޯސް ޙާސިލްކުރައްވާފައެވެ. އޭނާ ވަނީ ޝަރުޢީ ދާއިރާގައި 5 އަހަރަށްވުރެ ގިނަ ދުވަހުގެ ތަޖުރިބާ ހޯއްދަވާފައެވެ.

ގައްދޫ މެޖިސްޓްރޭޓް ކޯޓުގެ އިސްމެޖިސްޓްރޭޓްކަމަށް ޢައްޔަން ކުރައްވާފައިވަނީ ގދ. ގައްދޫ، ޔެލޯސީ، އަލްއުސްތާޛު އަޙްމަދު ޢަވްފު ޢަބްދުއްޞަމަދެވެ. އޭނާ ވަނީ ދިވެހިރާއްޖޭގެ ޤައުމީ ޔުނިވަރސިޓީއިން ބެޗްލަރ އޮފް ޝަރީޢާ އެންޑް ލޯ އަދި މާސްޓަރސް އޮފް ލޯސް އިން އިސްލާމިކް ބޭންކިންގ އެންޑް ފައިނޭންސް ޙާސިލްކުރައްވާފައެވެ. ޝަރުޢީ ދާއިރާގައި 3 އަހަރު ދުވަހުގެ ތަޖުރިބާ ލިބިފައިވާއިރު، އަލްއުސްތާޛު އަޙްމަދު ޢަވްފު ޢަބްދުއްޞަމަދު މިހާރު މަސައްކަތް ކުރައްވަމުން ގެންދަވަނީ ރައީސުލްޖުމްހޫރިއްޔާގެ އޮފީހުގެ ސީނިއަރ ކޮންޓެންޓް އޮފިސަރގެ މަޤާމުގައެވެ.

ޖޭއެސްސީން ހަތް ކޯޓަކަށް މެޖިސްޓްރޭޓުން އައްޔަން ކުރައްވާފައިވާއިރު މަގާމު ރަސްމީކޮށް ހަވާލުކުރައްވާނީ މަގާމުގެ ހުވާކުރެއްވުމަށްފަހުއެވެ.