ވައިޑް-ބޮޑީ އޮޕަރޭޝަންތައް ފެށުމާއެކު އެފްޓީއޭގެ މަންފާވެސް އިތުރަށް ލިބޭނެ: މޯލްޑިވިއަން

ޤައުމީ އެއަރލައިން މޯލްޑިވިއަންގެ ވައިޑް-ބޮޑީ އޮޕަރޭޝަންތައް ޗައިނާއަށް ފެށުމުން، މިނިވަން ވިޔަފާރީގެ އެއްބަސްވުމުގެ މަންފާ އިތުރުވެގެންދާނެ ކަމަށް މޯލްޑިވިއަނުން ވިދާޅުވެއްޖެއެވެ.

މޯލްޑިވިއަނުން ވައިޑް-ބޮޑީ އޮޕަރޭޝަންތައް ފެށުމާއި ގުޅޭ ގޮތުން ޕީއެސްއެމްއަށް ދެއްވި ބަސްތީ ގަތުމެއްގައެވެ.

މޯލްޑިވިއަންގެ ވައިޑްބޮޑީ އޮޕަރޭޝަން ތާވަލްކޮށްފައިވަނީ، ހަފްތާއަކު 3 ދަތުރު ޗައިނާގެ 3 މަންޒިލަކަށް ކުރާ ގޮތަށެވެ. އެ މަންޒިލްތަކަކީ، ބެއިޖިން، ޝަންހާއި އަދި ޗެންޑޫއަށެވެ.

މިއާއެކު ކޮންމެ ދަތުރެއްގައިވެސް އެއަރ ކާގޯ ގޮތުގައި 10 ޓަނުގެ މުދާ އުފުލޭނެކަމަށް މޯލްޑިވިއަނުން ވަނީ ހާމަކޮށްފައެވެ. އެކުންފުނީގެ ޗީފް ސްޓްރެޓިޖިސްޓް މުޙައްމަދު ސައްފާހް ވިދާޅުވީ މި ދަތުރުތަކަކީ ރާއްޖޭގެ ވިޔަފާރިތަކަށްވެސް އިތުރު މަންފާތަކެއް ކުރާނެ ދަތުރުތަކެއް ކަމަށެވެ. އެގޮތުން މުދާ އުފުލަން ފެށުމާއެކު ރާއްޖޭގެ ހިންގާ ވިޔަފާރިތަކަށް ރާއްޖެއަށް މުދާ އެތެރެކުރުމަށާއި، ރާއްޖޭގެ މުދާ ޗައިނާ މާކެޓަށް ގެންދިއުމަށް އިތުރަށް މަގުފަހިވެގެން ދާނެ ކަމަށެވެ.

މީގެ އިތުރުން އަންނަ އަހަރުގެ ޖަނަވަރީ މަހުން ފެށިގެން ޗައިނާއާ ރާއްޖެއާއި ދެމެދު ޢަމަލުކުރަން ފަށާ މިނިވަން ވިޔަފާރީގެ އެއްބަސްވުމުގެ ފައިދާވެސް މިދަތުރުތަކާއެކު އިތުރަށް ލިބިގެންދާނެ ކަމަށް ސައްފާހް ވިދާޅުވިއެވެ.

"މީގެ މާނައަކީ އިމްޕޯޓް ކުރަން ބަލާކަމުގައިވާނަމަވެސް އަދި ރާއްޖޭގެ އުފެއްދުންތައް ހާއްސަކޮށް މަސް އެކްސްޕޯޓް ކުރަން ބަލާކަމަށްވަންޏާވެސް އިތުރު ގޭޓްވޭއެއް މި އެއަރކްރާފްޓާއި އެކީގައި ހުޅުވިގެންދާނެ. ޗައިނާއާއި އެކު މިވަގުތު ފްރީޓްރޭޑް އެގްރިމެންޓެއްގެ މަސައްކަތް ކުރެވިގެންދާއިރު، މީގެ މަންފާވެސް އިތުރަށް ލިބިގެންދާނެ ކަމަށް އަޅުގަނޑުމެން ފާހަގަކުރަން" ސައްފާހް ވިދާޅުވިއެވެ.

މޯލްޑިވިއަނުން ޗައިނާއަށް ކުރާ ދަތުރުތައް ފެށުމަށް ތައްޔާރުވެފައިވާއިރު، މި ދަތުރުތައް ކުރަނީ އެއަރބަސް އޭ-330-200 މަރުކާގެ ބޯޓެއްގައެވެ. މި ބޯޓު އަންނަ ޖެނުއަރީ މަހުގެ 7 ވަނަ ދުވަހު ރާއްޖެ ގެނައުމަށް ނިންމާފައިވާއިރު، މީގެ އިތުރު ބޯޓެއް އަންނަ އަހަރު ފަހަކޮޅު ގެނައުމުގެ މަސައްކަތް އެކުންފުނިން ދަނީ ކުރަމުންނެވެ.

މީގެ އިތުރުން މި ދަތުރުތައް އެހެން މަންޒިލްތަކަށްވެސް ފުޅާކުރުމުގެ މަސައްކަތް ކުރަމުންދާ ކަމަށް މޯލްޑިވިއަންއިން ވިދާޅުވެއެވެ.

މޯލްޑިވިއަނުން ވައިޑްބޮޑީ އޮޕަރޭޝަންތަކާއެކު އެއަރކާގޯ ޚިދުމަތް ފަށާއިރު، މިވަގުތު ސީ ޓު އެއަރކާގޯ ޚިދުމަތަކީ ރާއްޖެ ދަތުރުކުރާ ގިނަ އެއަރލައިންތަކުން ބައިވެރިވަމުން އަންނަ ޚިދުމަތަކެވެ.