ކުރީ ސަރުކާރުން ގޯތި ދިން ލިސްޓް އޮތީ ބޭއިންސާފުން އެތައްބަޔަކަށް ގޯތި ލިބޭގޮތަށް: ރައީސް ނަޝީދު

ނިމިދިޔަ އެމްޑީޕީގެ ސަރުކާރުން ބިންވެރިޔާ ސްކީމްގެ ދަށުން ހުޅުމާލެއިން ގޯތި ދޫކުރީ ބޭއިންސާފުން އެތައް ބަޔަކަށް ގޯތި ލިބޭގޮތަށްކަމަށާއި، ސަރުކާރުން މިހާރު އަޅުއްވާފައިވާ ފިޔަވަޅުތަކާއެކު މިކަމާއި ގުޅިގެންހުރި މައްސަލަތައް ހައްލުކުރެވޭނެކަމަށް އުންމީދުކުރައްވާކަމަށް ކުރީގެ ރައީސް މުޙައްމަދު ނަޝީދު ވިދާޅުވެއްޖެއެވެ.

ސޯޝަލް މީޑިއާގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، ގޯތީގެ ލިސްޓާއި ގުޅޭގޮތުން އެމަނިކުފާނު ދައްކަވަން އޮތީ ކުރީގައިވެސް ދެއްކެވި ވާހަކަތައްކަމަށެވެ. އެގޮތުން ކުރީގެ ސަރުކާރުން އެކުލަވާލައި އާންމުކުރި ގޯތީގެ ލިސްޓު އޮތީ ބޭއިންސާފުން ގިނަ ބަޔަކަށް ގޯތި ލިބޭގޮތަށްކަމަށް އެމަނިކުފާނު ވިދާޅުވާ ވިދާޅުވުން ވަނީ ތަކުރާރުކުރައްވާފައެވެ.

ދާދި ފަހުން ބިންވެރިޔާ ސްކީމުގައި ޝަރުތުހަމަނުވާ ބައެއް މީހުންނަށް ގޯތި ލިބުނުކަމަށް ބުނާ ލިޔެކިޔުން އާންމުވި މައްސަލައަށް އިޝާރާތްކުރައްވާ ރައީސް ނަޝީދު ވިދާޅުވީ، އެއީވެސް ބޭއިންސާފަށް އިތުރުވި ބޮޅެއްކަމަށެވެ.

ރައީސް ނަޝީދު ވަނީ ކުރިއާ ޚިލާފަށް މިފަހަރު މިމައްސަލައިގެ ތަހުޤީޤު ފުލުހުން ފަށާފައިވާކަން ފާހަގަކުރައްވާފައެވެ. އަދި އެޗްޑީސީގެ އިސް ފަރާތްތައް މަގާމުން ވަކިކޮށްފައިވާކަންވެސް ފާހަގަކުރައްވަމުން ރައީސް ނަޝީދު ވިދާޅުވީ، މިމައްސަލައިގެ ތަހުޤީޤު ރަނގަޅަށް ދާނެކަމަށް އުންމީދު ކުރައްވާކަމަށެވެ. އަދި އެޗްޑީސީގެ އައު މެނޭޖިންގ ޑިރެކްޓަރު އެކަންކަން އިސްލާހުކުރައްވާނެކަމަށް އުންމީދު ކުރައްވާކަމަށް ރައީސް ނަޝީދު ވިދާޅުވިއެވެ.

Nuhaggun goathi bahaafaiva massala aai gulhey gothun anehkaaves dhanavaan othee meege kureegaives dhennevi vaahaka. Kureegaives list hadhaafa vanee beyinsaafun ethah bayakah goathi libey gothah. Mifaharu anehkaves e beyinsaafah ithuru bolheh ekulavaa levunee.

— Mohamed Nasheed (@MohamedNasheed) December 23, 2024

ރައީސް ނަޝީދު މިހެން ވިދާޅުވެފައިމިވަނީ، ބިންވެރިޔާ ސްކީމްގެ ގޯތިތައް ދޫކުރި ފަރާތްތަކާއި ގުޅިގެން ފެންމަތިވި މައްސަލައިގައި އެއްވެސް އިދާރާއެއް އަދި މުއައްސަސާއެއް ނުވަތަ ކުންފުންޏެއްގައިވެސް ކޮރަޕްޝަނަށް ޖާގަ ނުދެއްވާނެ ކަމަށް ވިދާޅުވެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މުހިންމު ފިޔަވަޅުތަކެއް އަޅުއްވާފައިވާ ދަނޑިވަޅެއްގައެވެ.

އެގޮތުން މިމައްސަލަ ފެންމަތިވި ހިސާބުން ހައުސިންގ ޑިވެލޮޕްމެންޓް ކޯޕަރޭޝަން ބޯޑުގެ ޗެއަރމަން ފިޔަވައި މެނޭޖިންގ ޑިރެކްޓަރ ފަޒުލް ރަޝީދު ހިމެނޭހެން ހުރިހާ މެންބަރުން ވަނީ ސަސްޕެންޑް ކޮށްފައެވެ. އަދި ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީގެ މެނޭޖިން ޑިރެކްޓަރ އިބްރާހިމް ފަޟުލް ރަޝީދު އާއި މި މައްސަލައިގަ ތުހުމަތުކުރެވުނު އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރ މުޙައްމަދު ފަޒީލް ރަޝީދު ހިމެނޭހެން 20 މީހެއްގެ ޕާސްޕޯޓް ހިފަހައްޓައިފައިވެއެވެ. އޭގެ ފަހުން ފަޒުލް ވަނީ އިސްތިޢުފާ ދެއްވާފައެވެ. މީގެ އިތުރުން މި މައްސަލާގައި ހައުސިން ޑިވަލޮޕްމެންޓް ކޯޕަރޭޝަން، އެޗްޑީސީގެ މުވައްޒަފުންތަކެއް ވަނީ ވަޒީފާއިން ވަކިކުރައްވާފައެވެ.

މިމައްސަލާގައި ޕީޖީގެ ޢަމުރަކަށް ފުލުހުންނާއި އެންޓި-ކޮރަޕްޝަން ކޮމިޝަން ގުޅިގެން ޖިނާޢީ ތަހުޤީގެއް ވަނީ ފަށާފައެވެ. އަދި މައްސަލާގައި ތުހުމަތު ކުރެވޭ ފަރާތްތަކުގެ ތެރޭގައި ގެދޮރުވެރިކަމާއި ބެހޭ ވުޒާރާގެ ކުރީގެ ސިޔާސީ މުވައްޒަފުން ހިމެނޭއިރު، އެފަރާތްތައްވެސް ސަސްޕެންޑްކޮށް ޕާސްޕޯޓު ވަނީ ހިފަހައްޓާފައެވެ.