ކޫއްޑޫ ކެޕޭސިޓީ އިތުރުކުރުމުގެ އަމަލީ މަސައްކަތް ފަށަން ތައްޔާރުވެއްޖެ

ކޫއްޑޫ ކެޕޭސިޓީ އިތުރުކުރުމުގެ އަމަލީ މަސައްކަތް ފަށަން ތައްޔާރުވެފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމް ވިދާޅުވެއެވެ.

ކޫއްޑޫއަށް މަސް ގަނެވޭ މިންވަރު އިތުރުކުރުމަށްޓަކައި 4000 ޓަނުގެ ކޯލްޑް ސްޓޯރޭޖެއް ތަރައްޤީކުރުމަށް ސަޢުދީ ފަންޑު ފޮރ ޑިވެލޮޕްމަންޓުގެ ލޯނު އެހީގައި ކުރިއަށްގެންދާ މަޝްރޫޢު ހަވާލުކޮށްފައިވަނީ ލަކީ ގްލޯބަލް ޕްރޮޖެކްޓްސް ޕްރައިވެޓް ލިމިޓަޑާއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގދ. ނަޑެއްލާއަށް ކުރެއްވި ދަތުރުފުޅުގެ ތެރެއިން ޕީއެސްއެމްނިއުސްއަށް ދެއްވި ބަސްތީގަތުމަށް މަސްވެރިކަމާއި ކަނޑުގެ ވަސީލަތްތަކާބެހޭ ވަޒީރު އަހުމަދު ޝިޔާމް ވަނީ މަސްވެރިކަމުގެ ދާއިރާ ކުރިއެރުވުމަށް ރައީސް ވެވަޑައިގެންނެވި ވަޢުދުތައް ފުއްދަވަމުން ގެންދަވާކަން ފާހަގަކުރައްވާފައެވެ. އެގޮތުން، މިހާރު މަސްވެރިންނަށް 48 ގަޑިއިރުތެރޭ ފައިސާ ދޫކުރަމުންދާކަމަށް ވަޒީރު ވިދާޅުވިއެވެ.

މީގެއިތުރުން މަސްވެރިންނަށް ދިމާވެފައިވާ ގޮންޖެހުންތަކުގެ އަޑު ގާތުން އައްސަވާ، އެ ގޮންޖެހުންތަކަށް ހައްލު ހޯއްދަވައި ދެއްވުމަށް މަސައްކަތް ކުރައްވަމުން ގެންދަވާ ކަމަށް ވަޒީރު ޝިޔާމް ވިދާޅުވިއެވެ. ވަޒީރު ޝިޔާމު ވިދާޅުވީ ހުވަދު އަތޮޅަކީ މަސްވެރިކަމުގެ ސިނާޢަތުގައި ހަރަކާތްތެރިވާ ގިނަ ބަޔަކު ދިރިއުޅެމުންދާ އަތޮޅެއްކަން ފާހަގަކުރައްވާފައެވެ.

އަދި ސަރުކާރުންް މަސްވެރިކަމުގެ ސިނާއަތް ތަރައްޤީކޮށް ކުރިއެރުވުމަށް އިސްކަންދެއްވާ ކަމަށާއި މަސްވެރިކަމުގެ ދާއިރާ ފުޅާކޮށް ކުރިއެރުވުމަށް ގިނަ މަޝްރޫޢުތަކެއް ކުރިއަށް ގެންދިޔުމަށް ރާވާފައިވާ ކަމަށް ވަޒީރު ވިދާޅުވިއެވެ. މިގޮތުން ކޫއްޑޫ ކެޕޭސިޓީ އިތުރުކުރުމުގެ މަޝްރޫޢުގެ މަސައްކަތް ފަށަން ތައްޔާރުވެފައިވާކަމަށް ވަޒީރު ވިދާޅުވިއެވެ.

"ބައެއް މަޝްރޫޢުތައް ބައެއް ހިސާބުތަކުގައި ފެށިފައި ހުރީ. ހުވަދު އަތޮޅު ވަކިން ހާއްސަކޮށް ކޫއްޑޫއަށް ކުރެވެން ހުރި މަސައްކަތްތައް؛ މިއަތޮޅުގެ ހުރިހާ ރަށަކުންވެސް ބަރޯސާވަނީ ކޫއްޑޫއަށް. ކޫއްޑޫގެ ކެޕޭސިޓީ އިތުރުކުރުމަށް ހުރި މަސައްކަތް ބާރަށް އެބަދޭ. އެގޮތުން އިތުރަށް ކުރަން ހުރި މަސައްކަތްތަކަށް ބޭނުންވާ ފައިސާ ހޯދި، އިރާދަ ކުރެއްވިއްޔާ ފެށުމުގެ މަރުހަލާގައި މިހާރު ހުރީ" ވަޒީރު ޝިޔާމް ވިދާޅުވިއެވެ.

މަސްވެރިކަމާބެހޭ ވުޒާރާއިން މައުލޫމާތުދޭގޮތުގައި ކޫއްޑޫގެ ކެޕޭސިޓީ އިތުރުކުރުމުގެ މަސައްކަތްތަކުގެ ދަށުން ތަރައްޤީކުރާ 4000 ޓަނުގެ ކޯލްޑް ސްޓޯރޭޖުގެ ޑިޒައިން މަސައްކަތްތައް މިހާރުވަނީ ނިމިފައެވެ. އަދި މަޝްރޫޢު ފެށުމަށްޓަކައި ކުރިއަށްގެންދަން ޖެހޭ ގިނަ މަސައްކަތްތައްވެސް މިހާރު ނިމިފައިވާއިރު ވަރަށް އަވަހަށް އަމަލީ މަސައްކަތްތައް ފެށިގެންދާނެ ކަމަށް އެވުޒާރާއިން ވިދާޅުވެއެވެ.

ކޫއްޑޫގައި 4000 ޓަނުގެ ކޯލްޑް ސްޓޯރޭޖެއް ޤާއިމްކުރުމަށް ގްލޯބަލް ޕްރޮޖެކްޓްސްއާ ޙަވާލުކޮށްފައިވަނީ މިދިޔަ ނޮވެމްބަރު މަހުގައެވެ. މި މަސައްކަތް ހަވާލުކޮށްފައިވަނީ 365 ދުވަހުގެ ތެރޭގައި މަޝްރޫޢުގެ މަސައްކަތް ނިންމާގޮތަށެވެ. މިއީ 6.6 މިލިޔަން ޑޮލަރުގެ މަޝްރޫޢެކެވެ. މިހާރު ކޫއްޑޫގައި ހުރީ 2000 ޓަނުގެ ކޯލްޑް ސްޓޯރޭޖެއް. މިމަޝްރޫޢުގެ ސަބަބުން 6000 މެޓްރިކް ޓަނަށް ގއ. ކޫއްޑޫގެ ސްޓޯރޭޖު އިތުރުކުރެވޭނެއެވެ.

މިހާރު ރާއްޖޭގެ ކޯލްޑު ސްޓޯރޭޖުގެ ކެޕޭސިޓީއަކީ 8500 ޓަނެވެ. ރައީސުލްޖުމްހުރިއްޔާގެ ރިޔާސީ ވަޢުދަކީ މިހާރު ހުރި ކެޕޭސިޓީ ދެގުނަ ކުރުމެވެ. އަދި މިހާރުގެ އަމާޒަކީ 3 ގުނަކޮށް ޖުމްލަ ކެޕޭސިޓީ 25 ހާސް ޓަނަށް ހެދުންކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވަޒީރު އަޙުމަދު ޝިޔާމު މީގެކުރިންވަނީ ވިދާޅުވެފައެވެ.

ސަރުކާރުގެ އަމާޒަކީ މި ދައުރުތެރޭގައި އިތުރު 15500 ޓަން މުޅި ރާއްޖޭގައި އިތުރުކުރެވި، ޖުމްލަ 25000 ޓަނަށް މުޅި ރާއްޖޭގެ މަހުގެ ސްޓޯރޭޖް ކެޕޭސިޓީ އިތުރު ކުރުމެވެ. ރާއްޖޭގައި އެކަށީގެންވާ ސްޓޯރޭޖް ކެޕޭސިޓީ ނެތުމުގެ ސަބަބުން ރާއްޖެއިން ވިއްކާ މަހަށް ރަނގަޅު އަގެއް ނުލިބޭ ކަމަށް ސަރުކާރުން ވިދާޅުވެއެވެ. މީގެ ސަބަބުން ބާނާ މަހުގެ 65 އިންސައްތަ ރޯ މަހުގެ ގޮތުގައި ބޭރު ކުރާ ކަމަށްވެސް ސަރުކާރުން ވިދާޅުވެއެވެ.