އެންޓި ކޮރަޕްޝަން ކޮމިޝަން، އޭސީސީން ބަލަމުންދާ މައްސަަލައަކާއި ގުޅިގެން ސްޓެލްކޯގެ ކުރީގެ މެނޭޖިންގް ޑިރެކްޓަރ އަހުމަދު ޝަރީފްގެ ޕާސްޕޯޓު ހިފަހައްޓައިފިއެވެ.
ޝަރީފް ޕާސްޕޯޓު ހިފަހައްޓާފައިވަނީ ސީދާ ކޮން މައްސަލައަކާއި ގުޅިގެން ކަމެއް އެނގިފައި ނުވެއެވެ. ނަމަވެސް އޭނާއާއި ގުޅޭ މައްސަލައެއް ބަލަމުންދާކަން އެންޓި ކޮރަޕްޝަން ކޮމިޝަނުން ޕީއެސްއެމްއަށް ވަނީ ޔަޤީންކޮށްދެއްވާފައެވެ. ޝަރީފްގެ ޕާސްޕޯޓު ހިފަހައްޓާފައިވަނީ އަންގާރަ ދުވަހު ކޯޓު އަމުރެއްގެ ދަށުންނެވެ.
މިމައްސަލަ އެސީސީން ތަހުޤީޤު ކުރަމުންދާއިރު، ކުރީގެ ސަރުކާރުގެ ވެރިންގެ މައްސަލަތަކެއް އެކި އިދާރާތަކުން ދަނީ ތަހުޤީޤު ކުރަމުންނެވެ. މީގެ ތެރޭގައި ކޮރަޕްޝަނުގެ ބޮޑެތި ތުހުމަތުތައް ހިމެނޭ މައްސަލަތައް ދަނީ ބަލަމުންނެވެ.
ފެނަކައިގެ މެނޭޖިންގ ޑިރެކްޓަރުކަމުގެ މަޤާމާއި އިލެކްޝަންސް ކޮމިޝަނުގެ ރައީސްކަމުގެ މަގާމުވެސް އަދާކޮށްފައިވާ ޝަރީފް ސްޓެލްކޯ މެނޭޖިންގް ޑިރެކްޓަރ ކަމަށް ހަމަޖައްސާފައިވަނީ 2022ވަނަ އަހަރުގެ މާރިޗު މަހުގައެވެ.