މިނިވަން ވިޔަފާރީގެ އެއްބަސްވުމުގެ ދަށުން 1.9 މިލިޔަން ރުފިޔާގެ މުދާ އެތެރެކޮށްފި

ޗައިނާ-ރާއްޖެ މިނިވަން ވިޔަފާރިއަށް ޢަމަލުކުރަން ފެށިފަހުން މިހާތަނަށް 2 މިލިޔަނެއްހާ ރުފިޔާގެ މުދާ އެތެރެކޮށްފައިވާ ކަމަށް މޯލްޑިވްސް ކަސްޓަމްސް ސާވިސްގެ ތަފާސްހިސާބުތަކުން ދައްކައިފިއެވެ. މިއީ ކަނޑުގެ މަގުންނާއި ވައިގެ މަގުން އެތެރެކޮށްފައިވާ މުދާ ކަމަށް ކަސްޓަސްއިން ވިދާޅުވެއެވެ.

ޗައިނާއާއި ރާއްޖެއާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުމަށް ޢަމަލުކުރަން ފަށާފައިވަނީ މިމަހުގެ އެއްވަނަ ދުވަހުއެވެ. މިއީ ރާއްޖޭގެ ފުރަތަމަ މިނިވަން ވިޔަފާރީގެ އެއްބަސްވުމެވެ. މި އެއްބަސްވުމުގެ ދަށުން ދުނިޔޭގެ ދެވަނައަށް އެންމެ ބޮޑު އިޤްތިޞާދުން ޑިއުޓީ އެއްކޮށް މަޢާފްވާ ގޮތަށް ނުވަތަ ކުޑަކުރެވޭ ގޮތަށް މުދާ އެތެރެކުރުމުގެ ފުރުސަތު ލިބިގެންދެއެވެ. މީގޮތުން ގިނަ ބާވާތްތަކުގެ މުދާ ޑިއުޓީ އެއްކޮށް މަޢާފްވާ ގޮތަށް އެތެރެކުރެވޭއިރު، މީގެ ސަބަބުން މާކެޓުގައި ހެޔޮ އަގުގައި މުދާ ލިބެން ހުންނާނެ ކަމަށް ސަރުކާރުން ވިދާޅުވެއެވެ.

މޯލްޑިވްސް ކަސްޓަމްސްއިން ވިދާޅުވީ ޗައިނާ - ރާއްޖެ މިނިވަން ވިޔަފާރީގެ އެއްބަސްވުމުގެ ދަށުން ރާއްޖެއަށް މިމަހުގެ 18 ވަނަ ދުވަހުގެ ނިޔަލަށް، 1.9 މިލިޔަން ރުފިޔާގެ މުދާ އެތެރެކޮށްފައިވާކަމަށެވެ. މި މުދަލަކީ ކަނޑުގެ މަގުންނާއި ވައިގެ މަގުން އެތެރެކޮށްފައިވާ މުދަލެވެ. އަގުމަގުކޮށް އެންމެ ގިނަ މުދާ އެތެރެކޮށްފައިވަނީ ކަނޑުމަގުންނެވެ.

ކަސްޓަމްސް އިން ވިދާޅުވިގޮތުގައި ކަނޑުމަގުން 3 ޝިޕްމެންޓެއްގެ މުދާ ގެނެސްފައިވެއެވެ. އަދި ވައިގެ މަގުން 9 ޝިޕްމެންޓެއްގެ މުދާ ރާއްޖެ އެތެރެކޮށްފައިވެއެވެ.

ކަނޑާއި ވައިގެ މަގުން ރާއްޖެ އެތެރެކުރި މުދަލާއި އޭގެ އަގު

• ކަނޑު މަގުން - 1،040،875 މިލިޔަން ރުފިޔާގެ މުދާ
• ވައިގެ މަގުން - 882،381 ރުފިޔާގެ މުދާ

ޗައިނާ-ރާއްޖެ މިނިވަން ވިޔަފާރީގެ އެއްބަސްވުމާއި އެކު އެކި ސިނާޢަތްތަކަށް ބޭނުންވާ މުދަލުން ޑިއުޓީ ވަނީ މަޢާފްވެފައެވެ. މީގެތެރޭގައި އެލެކްޓްރޯނިކް ސާމާނާއި ފަރުނީޗަރު ފަދަ ހަރުމުދާތައް ހިމެނެއެވެ. މީގެއިތުރުން އިމާރާތްކުރުމުގެ މަސައްކަތަށް ބޭނުންވާ ސާމާނުން ޑިއުޓީ މަޢާފުވެގެންދާނެ ކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާއިން ވިދާޅުވެއެވެ.

ރާއްޖެއަށް އެތެރެކުރާ ގިނަ މުދާތަކަކުން އެއްބަސްވުމުގެ ދަށުން ޑިއުޓީ މައާފްވާއިރު، ރާއްޖެއިން ބޭރުކުރާ މަހަށްވެސް ޑިއުޓީ މަޢާފްވެގެންދާނެއެވެ. މިއާއެކު ރާއްޖޭގެ މަސްވެރިކަމުގެ ސިނާޢަތަށް ކުރިއެރުންތަކެއް ލިބިގެންދާނެ ކަމަށް ސަރުކާރުން ވިދާޅުވެއެވެ.

ރާއްޖެއާއި ޗައިނާއާ ދެމެދު ސޮއިކޮށްފައިވާ މިނިވަން ވިޔަފާރީގެ އެއްބަސްވުމަށް އަމަލުކުރަން ފަށާފައިވާއިރު، ޗައިނާއިން މުދާ ގެންނަން ބޭނުންވާ ފަރާތްތަކަށް ބޭނުންވާ މައުލޫމާތު މޯލްޑިވްސް ކަސްޓަމްސް ސާވިސްގެ ވެބްސައިޓުގައި މިހާރު ވަނީ އާއްމުކޮށްފައެވެ. އެގޮތުން ޓެރިފް ރޭޓުތައް މިހާރު ކަސްޓަމްސް ވެބްސައިޓުން ބަލާލެވޭނެއެވެ.

ކަސްޓަމްސް އިން ވިދާޅުވީ، ވެބްސައިޓުގައި އާންމުކޮށްފައިވާ މިނިވަން ވިޔަފާރީގެ އެއްބަސްވުމުގެ ލުއިތައް ބޭނުންވާ ފަރާތްތަކުން އެ ލުއިތައް ހޯދުމަށް، ސެޓިފިކެޓް އޮފް އޮރިޖިން ބޭނުންވާނެ ކަމަށެވެ. އެގޮތުން އެ ސެޓްފިކެޓް ހުށަހެޅައިގެން ނޫނީ، މިނިވަން ވިޔަފާރީގެ އެއްބަސްވުމުގެ ދަށުން ލިބޭ ޑިއުޓީގެ ލުއިތައް ނުލިބޭނެ ކަމަށް ކަސްޓަމްސް އިން ވިދާޅުވެއެވެ.

އަދި ރާއްޖެއިން ބޭރުކުރާ މުދަލަށްވެސް ކަސްޓަމްސްއިން ދޫކުރާ ސެޓްފިކެޓް އޮފް އޮރިޖިން، ޗައިނާގެ އިދާރާތަކަށް ހުށަހަޅަން ޖެހޭނެ ކަމަށާއި ސެޓްފިކެޓް ހޯދުމަށް ބޭނުންވާ އެޕްލިކޭޝަން މިހާރު ކަސްޓަމްސްގެ ވެބްސައިޓުން ލިބޭނެ ކަމަށް ކަސްޓަމްސްއިން ވިދާޅުވެއެވެ.

ސަރުކާރުން ވިދާޅުވެފައިވާގޮތުގައި މިހާރުވެސް ދިވެހިރާއްޖެއާއި ޗައިނާއާ ދެމެދު 700 މިލިއަން ޑޮލަރުގެ ވިޔަފާރި ދަނީ ކުރެވެމުންނެވެ. އަދި މިނިވަން ވިޔަފާރީގެ އެއްބަސްވުމަށް އަމަލު ކުރަން ފެށުމާއެކު މި އަދަދު 1 ބިލިޔަން ޑޮލަރަށް އަރާނެ ސަރުކާރުން ލަފާކުރައްވައެވެ.