މިހާރު ކުރިޔަށްދާ ދިވެހި ޔޫތު ލީގުގެ 14 އަހަރުން ދަށުގެ ޗެމްޕިއަންކަން ޓީސީ ސްޕޯޓްސް ކުލަބުން ހޯދައިފިއެވެ.
14 އަހަރުން ދަށުގެ ޗެމްޕިއަންކަން ޓީސީން ހޯދީ ކުޅުނު އެއްވެސް މެޗަކުން ބަލިނުވެ 17 ޕޮއިންޓާއެކުއެވެ. ދެވަނައިގައި އޮތް ވިކްޓަރީ ސްޕޯޓްސް ކުލަބަށް ހުރިހާ މެޗެއް ހަމަކުރިއިރު ހޯދުނީ 15 ޕޮއިންޓެވެ. އަދި ސުޕަ ޔުނައިޓެޑް ސްޕޯޓްސް (ސަސް) ތާވަލުގެ ތިންވަނައިގަ އޮތީ 14 ޕޮއިންޓާއެކުއެވެ.
14 އަހަރުން ދަށުގެ ފަހު މެޗުތައް ހެންވޭރު ދަނޑުގައި އިއްޔެ ކުޅުނުއިރު، ޓީސީން ލީގު ޗެމްޕިއަންކަން ކަށަވަރު ކުރީ ހުއްރިއްޔާ ސްޕޯޓްސް ކުލަބު 2-0 ގެ ނަތީޖާއަކުން ބަލިކުރުމަށްފަހުއެވެ. މި މެޗުގައި ޓީސީއަށް ލަނޑުތައް ކާމިޔާބުކޮށްދިނީ ޝާދިން ރައްޒާގު އާއި ޝާއިމް ނަޝީދެވެ.
މި އުމުރުފުރާގައި އިއްޔެ ހަވީރު ވިކްޓަރީ އާއި ސަސް ވާދަކުރި މެޗު ނިމުނީ ދެ ޓީމުން ކުރެ ޓީމަކަށް ލަނޑެއް ނުޖެހި އެއްވަރުވެގެންނެވެ. މި މެޗަށް ވިކްޓަރީ ނުކުތް އިރުވެސް ލީގު ހޯދުމުގެ އަމިއްލަ ބާރު ވަނީ ގެއްލިފައެވެ.
ޔޫތު ލީގުގެ 12 އަހަރުން ދަށުގެ މެޗުތައްވެސް ނިމިފައިވާއިރު، މި އުމުރުފުރާގެ ޗެމްޕިއަންކަން ހޯދާފައިވާ ސަސްއިން ވަނީ ލީގުގައި ކުޅުނު ފަހު މެޗުގައި ވިކްޓަރީ އަތުން 1-0 ގެ ނަތީޖާއަކުން މޮޅުވެފައެވެ. އަދި ޓީސީން ކުޅުނު ލީގުގެ ފަހު މެޗުގައި ވަނީ 2-0 ގެ ނަތީޖާއަކުން ހުއްރިއްޔާ ބަލިކޮށްފައެވެ.
އިއްޔެގެ މެޗުތަކާއެކު 12 އަހަރުން ދަށާއި 14 އަހަރުން ދަށުގެ ލީގުގެ މެޗުތައް ކުޅެ ނިމިފައިވާއިރު، ލީގުގައި ބާކީ މިހާރު އޮތީ 16 އަހަރުން ދަށުގެ ބައިގެ މެޗުތަކެވެ. އެގޮތުން މި އުމުރުފުރާގައި ކޮންމެ ޓީމަކަށްވެސް ބާކީ އޮތީ ތިން މެޗެވެ. 16 އަހަރުން ދަށުގެ އެއްވަނައިގައި މި ވަގުތު އޮތީ ކުޅުނުފަސް މެޗުން 15 ޕޮއިންޓާއެކު ވެލެންސިއާއެވެ.