"ޤައުމީ އެއާލައިންގެ ހިންގުމަށް ގެނައި ބަދަލުތަކުގެ ރަނގަޅު ނަތީޖާ ދަނީ ފެންނަމުން"

އަދުގެ ސަރުކާރުން ޤައުމީ އެއާލައިން، މޯލްޑިވިއަންގެ ހިންގުމަށް ގެނައި ބަދަލުތަކުގެ ރަނގަޅު ނަތީޖާދަނީ ފެންނަމުންދާކަމަށް ފަތުރުވެރިކަމާއި މަދަނީ އުދުހުންތަކާބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.

ވަޒީރު އަމީން އެފަދައިން ވިދާޅުވީ، މޯލްޑިވިއަން ސީޕްލޭން ޓަރމިނަލް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

އައު ސީޕްލޭން ޓަރމިނަލްއަކީ ރާއްޖޭގެ ސިޕްލެން ސިނާއަތުގައި ޤަބޫލުކުރެވޭ މިންވަރަށް ޤާއިމްކުރެވިފައިވާ ފެންވަރު ރަނގަޅު ތަނެއްކަމަށް ވަޒީރު ވިދާޅުވިއެވެ. މޯލްޑިވިއަންގެ ތަޖުރިބާގެ ތެރެއިން ހަނދާނުގައި ބަހައްޓަންވީ ކުންފުނި ކުރިއަރައިގެން ދިޔަ ގޮތްކަމަށް ވަޒީރު ވިދާޅުވިއެވެ. މޯލްޑިވިއަންއަކީ ދަޢުލަތަށް ފައިދާ ދެއްކުމުގައި ރަނގަޅު ނަމޫނާއެއް ދެއްކި ޤައުމެއްކަން ވަޒީރު ފާހަގަކުރެއްވިއެވެ. ނަމަވެސް އެކަށީގެންވާ ގޮތުގައި ކުންފުނީގެ ކަންކަން ނުހިންގުމުން 2018-2023އަށް ކުންފުނީގެ ހާލަތު ދަށްވެ ކުންފުނި ވަރަށް ބޮޑަށް ދަރަނިވެރިވިކަމަށް ވަޒީރު ވިދާޅުވިއެވެ.

"މުޅި އޮޕަރޭޝަންސް ހުއްޓުމަކަށް އައިސް، މިތާގައި ސަރވިސްކުރަމުންދިޔަ ކޮންޓްރެކްޓްތަކެއް ގެއްލި ވަރަށް ބަލިކަށި ހާލަތަކަށް ކުންފުނި އައި. 2023ގެ ފަހުން ކުންފުނީގެ މެނޭޖްމެންޓާއި، ހިންގުމަށް ގެނައި ބަދަލުން، ބޮޑު ދަރަންޏެއް 5 އަހަރު އޮއްވާ މިދިޔަ އަަހަރު ބަލާލި އިރު ކުންފުނި ޓަރންއެރައުންޑްކޮށްފި." މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވިއެވެ.

ސަރުކާރުގެ އަމާޒަކީ ކުރިއަށް އޮތްތަނުގައިވެސް ކުންފުނި އިތުރަށް ހަރުދަނާކުރުންކަމަށާއި، މޯލްޑިވިއަންއަކީ ދިވެހިންގެ ފަޚުރެއްކަން ފާހަގަކުރައްވައި، ވަޒީރު ވިދާޅުވީ، މިދިޔަ 3 އަަހަރު ތެރޭ ސީޕްލޭންގެ ޚިދުމަތް އައު މޮޑެލްއަކަށް ބަދަލުކުރުމަށް މަސައްކަތްކުރަމުންދާކަމަށެވެ. އަދި ކުންފުންޏަށް އުމްރާނީ އަދި ރައުސުލްމާލުތައް ހޯދުމުގައި ކުރިއެރުން ހޯދުމުގެ ބަދަލުގައި، ކުންފުނީގެ މުވައްޒަފުންގެ މާހައުލު ރަނގަޅުކުރުމަށް އިސްކަންދެއްވާކަމަށް ވަޒީރު ވިދާޅުވިއެވެ. އަދި ކުންފުނީގެ ތެރެއިން މުވައްޒަފުންނަށް ބޭނުންވާ އަސާސީ ޚދުމަތްތައް ފޯރުކޮށްދިނުމަކީ ސަރުކާރުގެ އަމާޒެއްކަމަށް ވަޒީރު ވިދާޅުވިއެވެ.

"ނޭޝަނަލް ކެރިއާ އޮންނަންވާނީ ރަނގަޅު ސްޓޭޓަސްއެއްގައި ރަނގަޅު ފެންވަރެއްގައި." މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވިއެވެ.

ވަޒީރު އަމީން ވަނީ މޯލްޑިވިއަންގެ މޯލްޑިވިއަންގެ މުވައްޒަފުންނަށް ދިމާވެފައިވާ ގެދޮރުވެރިކަމުގެ މައްސަލައަށް ހައްލެއް ހޯދައިދެއްވުމަށް ސަރުކާރުން ޚާއްސަ އިސްކަމެއްދެއްވާކަމަށް ފާހަގަކުރައްވާފައެވެ. ހައުސިންގެ މަސައްކަތަށް ބޭނުންވާ ދެ ބިން ހަވާލުކޮށްފައިވާކަމަށާއި، އެ ތަނުގެ އަމަލީ މަސައްކަތް ވަރަށް އަވަހަށް ފެށޭނެކަމަށް ވަޒީރު ވިދާޅުވިއެވެ.

އައިލޭންޑް އެވިއޭޝަންގެ މަސައްކަތްތައް ކުރިއަށްގެންދިުއމަށް އެ ހައިބަތު ފެންނަ ފަދަ ބިލްޑިންއެއް މިހާރު ކުރިއަށްދާކަމަށްވެސް ވަޒީރު ވިދާޅުވިއެވެ. މީގެއިތުރުން، ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ވިސްނުންފުޅަކީ، އެ ކުންފުނިން އެދެމުންދާ ކަންކަމަށް ސަރުކާރުގެ ޤާބިލްކަން ހުރި މިންވަރަކުން ވީހާވެސް ފުރިހަމަކަމާއެކު ކޮށްދެއްވުންކަމަށްވެސް ވަޒީރު ވިދާޅުވިއެވެ.