ޚަބަރު

މަތީ ތަޢުލީމު ހާސިލްކުރާ ދަރިވަރުންނަށް ދިމާވަނީ ނިޒާމީ މައްސަލަތަކެއް، ޙައްލުކޮށްދޭނަން: ރައީސް


  • ފައިދާ ދިނުމުގައި ދިމާވާ މައްސަލަތަަކަށް ހައްލު ގެންނަވާނެ

  • ބޭރު ޤައުމުތަކުގައި ކިޔަވާ ދަރިވަރުންނާ ބައްދަލުކުރުމަށް ޚާއްޞަ އިސްކަމެއްދެއްވާ

ރާއްޖެއިން ބޭރުގައި މަތީ ތަޢުލީމް ހާސިލްކުރާ ދަރިވަރުންނަށް ދިމާވާ ގިނަ މައްސަލަތަކަކީ ނިޒާމުގެ ތެރެއިން ދިމާވާ މައްސަލަތަކެއްކަމަށާއި، އަވަސް މުސްތަގުބަލެއްގައި މިފަދަ މައްސަލަތައް ހައްލުކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، އިނގިރޭސިވިލާތަށް ކުރެއްވި ރަސްމީ ދަތުރުފުޅުގެ ތެރެއިން އެޤައުމުގައި ކިޔަވަމުންދާ ދިވެހި ދަރިވަރުންނާއި ބައްދަލުކުރައްވާ ދެއްކެވު ވާހަކަފުޅުގައެވެ.

އިނގިރޭސިވިލާރުގައި ކިޔަވަމުންދާ ދިވެހި ދަރިވަރުންނާ ބައްދަލުކުރައްވާ ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، މިފަދަ ބައްދަލުކުރެއްވުންތަކުގެ ސަބަބުން ބޭރު ޤައުމުތަކުގައި މަތީ ތަޢުލީމު ހާސިލްކުރަމުންދާ ދަރިވަރުންނަށް ކުރިމަތިވަމުންދާ ދަތިތައް ރަނގަޅަށް އެނގިގެންދާކަމަށެވެ. އަދި ދަރިވަރުންނަށް ކުރިމަތިވަމުންދާ ދަތިތައް ހައްލުކުރުމަށް އިތުރަށް ފަސޭހަވެގެންދާކަމަށެވެ. ރައީސް ވަނީ ރާއްޖެއިން ބޭރުގައި ތަޢުލީމު ހާސިލްކުރަމުންދާ ދަރިވަރުންނަށް ދިމާވާ ދަތިތަކަށް ހައްލު ގެނެސްދެއްވުމަށް ސަރުކާރުން މަސައްކަތްކުރައްވަމުން ގެންދަވާކަމަށް ވިދާޅުވެފައެވެ.

ރައީސްގެ ވާހަކަފުޅުގައި ސްކޮލަރޝިޕްގެ ދަށުން ކިޔަވަމުންދާ ކުދިންނާއި، ލޯނު ނަގައިގެން ނުވަތަ އަމިއްލަ ޚަރަދުގައިވެސް މަތީ ތަޢުލީމު ހާސިލްކުރާ ދަރިވަރުންނަށް ބޭނުންވާ އެހީތެރިކަން މި ސަރުކާރުން ފޯރުދެއްވާނެކަމުގެ ޔަޤީންކަން ދެއްވިއެވެ.
އެގޮތުން ބޭރު ޤައުމުތަކުގައި މަތީ ތަޢުލީމު ހާސިލްކުރާ ދަރިވަރުންނަށް ކުރިމަތިވާ އެންމެ ބޮޑު އެއް ގޮންޖެހުމަކީ ފައިސާ ދޫކުރުމުގައި ދިމާވާ މައްސަލަތައްކަމަށާއި މި މައްސަލައަށް ހައްލު ހޯދުމަށް މިދިޔަ ދުވަސްތަކުގައިވެސް ގިނަ މަސައްކަތްތަކެއް ކުރައްވާފައިވާއިރު، ކުރިއަށްއޮތް ދުވަސްތަކުގައިވެސް ގިނަ މަސައްކަތްތަކެއް ކުރައްވާނެކަމަށެވެ.

"އިރާދަ ކުރެއްވިއްޔާ ކުރިއަށްއޮތްތަނުގަ އެއީ ސްޓައިފަންޑް ކަމަށްވިޔަސް އަދި ޓިއުޝަންފީ ޖަމާކުރުމުގައި ކަމުގައިވިޔަސް ސަރުކާރުގެ ނިޒާމުގެ ތެރެގައި ހުންނަ އިންއެފިޝެންސީޒްތައް ހައްލުކޮށްދޭނަން. މިސާލަކަށް އަޅުގަނޑަށް އެންމެ ގިނައިން އައިސްފަހުރި ހަމަ ވަރަށް ޖެނުއިން ކޮންސާންއެއްގެގޮތުގައި އައިސްފައިހުރިކަމެއް ސަރުކާރުގެ ކަމާބެހޭ އިދާރާގެ ރެސްޕޮންސްދައްވުމާ މިކަހަލަ ކަންތައްތައް. އީމެއިލްއަށް ޖަވާބުދިނުން ކަހަލަ ކަންތައްތައް. އެކަންކަން އިރާދަކުރެއްވިއްޔާ އަޅުގަނޑު އެޑްރެސްކުރާނަން." ރައީސުލްޖުމްހޫރިއްޔާ ވިދާޅުވިއެވެ.

ބޭރު ޤައުމުތަކުގައި މަތީ ތަޢުލީމު ހާސިލްކުރަމުންދާ ދަރިވަރުންނަށް ދިމާވާ ދަތިތަކަކީ ނިޒާމުގެ ތެރޭގައި ހުރި މައްސަލަތަކެއްކަމަށާއި، މި މައްސަލަތައް ޙައްލުކުރުމާއެކު، ސަރުކާރުގެ އިދާރާތަކުން ދެމުންދާ ޚިދުމަތުގެ ފެންވަރު ރަނގަޅުކުރައްވާނެކަމަށްވެސް އެމަނިކުފާނު ވިދާޅުވިއެވެ.

"ނިޒާމުގެތެރޭގަ ހުރި މައްސަލަތަކެއް މިއީ. އެކަންކަން އިރާދަކުރެއްވިއްޔާ ރަނގަޅުކޮށް އެފިޝެންޓްކޮށްދީ އިރާދަކުރެއްވިއްޔާ ފަސޭހަތައް ގެނެސްދޭނަން. އަވަސްކޮށް ޖަވާބުދިނުމާއި އަވަހަށް އޮން ޓައިމް އެ ލިބެންޖެހޭ ފައިސާ ޖަމާކޮށްދިނުން ކަހަލަ ކަންކަމާ މި ކަންކަން ރަނގަޅުކޮށްދޭނަން އިރާދަކުރެއްވިއްޔާ." ރައީސުލްޖުމްހޫރިއްޔާ ވިދާޅުވިއެވެ.

ރާއްޖެއިން ބޭރުގައި މަތީ ތަޢުލީމު ހާސިލްކުރާ ހުރިހާ ދަރިވަރުންނަށްވެސް އެއްހަމައަކުން ސަމާލުކަންދީގެން މި މައްސަލަތަކަށް ހައްލު ގެނެސްދޭނެކަމުގެ ޔަޤީންކަންވެސް ރައީސް ވަނީ ދެއްވާފައެވެ.

ރައީސުލްޖުމްހޫރިއްޔާގެ މި ދަތުރުފުޅުގައި ވަނީ އިނގިރޭސިވިލާތުގެ ލިވަޕޫލް ސިޓީގައި ކިޔަވަމުންދާ ދިވެހި ދަރިވަރުންނާއިވެސް ބައްދަލުކުރައްވާފައެވެ. އަދި އެކޮމޮޑޭޝަން ބްލޮކެއްގެ ގޮތުގައި އަދި "ހަބެއް"ގެ ގޮތުގައި ބޭނުންކުރަމުންދިޔަ "ނަމްބަރ 9 ރޯޒްމަންޓް އެވެނިއު" ޢިމާރާތް އަލުން އެކުދިންގެ އެކި ބޭނުންތަކަށް ބޭނުންކުރެވޭނެ ޢިމަރާތެއްގެ ގޮތުގައިވެސް ވަނީ ހަމަޖައްސަވައިދެއްވާފައެވެ.