ފަލަސްޠީނުގެ ޣައްޒާގެ ރައްޔިތުންގެ ނަސްލުހޭދު ކުރުމަށް ޔަހޫދީ ފައުޖުން ހިންގަމުންދާ ޤަތުލުޢާންމުގެ ދަށުން ޣައްޒާގެ ތިން ސަރަޙައްދަކަށް ދިން ވައިގެ ޙަމަލާތަކެއްގައި 23 މީހުން ޝަހީދުކޮށްލައިފިއެވެ.
ޣައްޒާގެ ސިއްޙީ ވުޒާރާއިން ބުނީ، ޣައްޒާގެ ދެކުނުގައި އޮންނަ ޚާން ޔޫނިސް، އުތުރުގެ ޖަބާލިޔާ އަދި ނުޞެއިރަތުގައި މީހުން ދިރިއުޅޭ ސަރަޙައްދުތަކަށް ޔަހޫދީންގެ ނިރުބަވެރި ފައުޖުން ދިން ވައިގެ ޙަމަލާތަކުގައި ޝަހީދުވި މީހުންގެ ތެރޭގައި ނޫސްވެރިޔަކާއި މީހުން ސަލާމަތްކުރުމުގައި ހަރަކާތްތެރިވާ އިދާރާގެ އިސް އޮފިޝަލަކު ވެސް ހިމެނޭ ކަމަށް ބުނެފައިވެއެވެ.
ނޫސްވެރިޔާ ޙަސަން މަޖުދީ އަބޫ ވަރްދީގެ ޖަބާލިޔާގައި ހުންނަ ގެއަށް ދިން ވައިގެ ޙަމަލާއެއްގައި އޭނާގެ އިތުރުން އޭނާގެ އާއިލާގެ ގިނަ ބަޔަކު ވެސް ޝަހީދުވި ކަމަށް ސިއްޙީ ވުޒާރާއިން ބުންޏެވެ.
ޔަހޫދީން ނުޞެއިރަތަށް ދިން ވައިގެ ޙަމަލާތަކުގައި، އެ ސަރަޙައްދުގެ އެމަޖެންސީ ޚިދުމަތްދޭ މަދަނީ އިދާރާގެ އިސް އޮފިޝަލެއް ކަމަށްވާ އަޝްރަފް އަބޫ ނަރް އާއި އޭނާގެ އަންހެނުން ޝަހީދުވެފައިވާ ކަމަށް ބުނެފައިވެއެވެ.
ޣައްޒާގައި ވެރިކަން ކުރާ ޙަމާސް ޖަމާޢަތުގެ މީޑިޔާ އޮފީހުން ބުނީ، އަބޫ ވަރްދީ ޝަހީދުކޮށްލުމާއެކު، 7 އޮކްޓޯބަރު 2023 ގައި ޔަހޫދީންގެ ނިރުބަވެރި ފައުޖުން ޣައްޒާގެ ޢުދުވާނު ފެށި ފަހުން، ޝަހީދުކޮށްލާފައިވާ ނޫސްވެރިންގެ އަދަދު 220 އަށް އަރާފައިވާ ކަމަށެވެ.
އެއްގަމުންނާއި ވައިގެ މަގުން ހުއްޓުމެއްނެތި ދެމުންދާ ޙަމަލާތަކުގައި، ޣައްޒާގެ 77 އިންސައްތަ ސަރަޙައްދު ޔަހޫދީންގެ އަތްދަށަށް މިހާރު ގެންގޮސްފައިވާ ކަމަށް ޙަމާސް އިން ބުންޏެވެ.
ޙަމާސް ޖަމާޢަތާއި ޔަހޫދީންނާ ދެމެދު ޖަނަވަރީ 19ވަނަ ދުވަހު ޢަމަލު ކުރަން ފެށި ޢުދުވާން ހުއްޓާލުމުގެ އެއްބަސްވުމެއްގެ ދަށުން ޙަމަލާ ބަދަލު ކުރުން މެދުކަނޑައިލި ނަމަވެސް، އެ އެއްބަސްވުމާ ޚިލާފުވެ މާރިޗު 18ވަނަ ދުވަހު ޔަހޫދީ ފައުޖުން ވަނީ އަލުން ޣައްޒާއަށް ޙަމަލާ ދޭން ފަށާފައެވެ. އެއްބަސްވުމާ ޚިލާފުވުމުގެ ދުވަސްކޮޅެއް ކުރިން ޔަހޫދީން ވަނީ ޣައްޒާގެ ފުރަބަންދު ހަރުކަށިކޮށް، އެ ސަހަރަށް ކާބޯތަކެއްޗާއި އެހީގެ ސާމާނު ވެއްދުމަށް ހުރަސް އަޅާފައެވެ. އޭގެ ފަހުން ދެ މަހަށްވުރެ ގިނަ ދުވަސް ފާއިތުވެފައިވާއިރު ޣައްޒާގެ 2.3 މިލިޔަން ރައްޔިތުން ދަނީ އިންތިހާ ދަރަޖައަށް ބަނޑުހައިހޫނުކަމާއި ބަލިމަޑުކަމާ ކުރިމަތިލަމުންނެވެ. ނަމަވެސް ޔަހޫދީން މިހާރު ވަނީ ޣައްޒާއަށް މަދު ޢަދަދަކަށް ކާބޯތަކެއްޗާއި އެހީގެ ސާމާނު އެތެރެ ކުރުމުގެ ފުރުޞަތު ދީފައެވެ.
ޔަހޫދީންގެ ޢުދުވާންތަކަށް ކެތް ނުކުރެވިގެން 2023ވަނަ އަހަރުގެ އޮކްޓޯބަރު މަހުގެ 7ވަނަ ދުވަހު ޙަމާސުން ޔަހޫދީންނަށް ދިން ޙަމަލާއަކަށް ބަދަލުހިފުމުގެ ގޮތުން ޔަހޫދީ ފައުޖުން ވަނީ ހަމަ އެ ދުވަހު ޣައްޒާގެ ރައްޔިތުންގެ ނަސްލުހޭދު ކުރުމަށް ޤަތުލުޢާންމެއް ފަށާފައެވެ. އެ ޤަތުލުޢާންމުގެ ދަށުން ޔަހޫދީ ފައުޖުން ވަނީ ޣައްޒާގެ އާބާދީގެ ބޮޑު އިންސައްތައެއް އެ މީހުންގެ ގެދޮރު ދޫކޮށް ދިޔުމަށް މަޖުބޫރު ކޮށްފައެވެ. އެ ޢުދުވާނުގައި ޝަހީދު ކޮށްލާފައިވާ މީހުންގެ އަދަދު 53،600އަށް އުފުލިފައިވާއިރު، އިތުރު 120,000އަށްވުރެ ގިނަ މީހުންނަށް ވަނީ ޒަޚަމު ކޮށްލާފައެވެ. އަދި، ޣައްޒާގެ ޢާންމުންގެ ގެދޮރާއި އުމްރާނީ ވަޞީލަތްތައް ވެސް ވަނީ ސުންނާފަތިކޮށް ބިމާ ހަމަކޮށްލާފައެވެ.