ކެތްތެރިކަމުގެ މައްސަރު

މާތް ﷲ ރުއްސުންލެއްވި ސަލްމާނުލް ފާރިސީގެ އަރިހުން ރިވާވެފައިވާ ވަރަށް ތަފްޞީލު ޙާދީޘެއް ޞަޙީޙު ޙަދީޘް ފޮތްތަކުގައިވެއެވެ. ސަލްމާނު ވިދާޅުވިއެވެ. رسول صلى الله عليه وسلم ޝަޢުބާން މަހުގެ އެންމެފަހު ދުވަހު އަހަރަމެންނާ މުޙާޠަބު ކުރައްވައި ޙަދީޘް ކުރެއްވިއެވެ.

"يا أيها الناس، قد أظلكم شهر عظيم، شهر مبارك، شهر فيه ليلة خير من ألف شهر، جعل الله صيامه فريضة، وقيام ليله تطوعا. .....وهو شهر الصبر، والصبر ثوابه الجنة..." (رواه البيهقي في شعب الإيمان ޖިލްދު 2 ޞަފްޙާ 305)

މާނައީ: އޭ މީސްތަކުންނޭވެ! ވަރަށް މާތް މައްސަރެއް ތިޔަބައިމީހުންގެ މައްޗަށް ހިޔާއަޅައިފިއެވެ. އެއީ ބަރަކާތްތެރި މައްސަރެކެވެ. އަރަހުށި މާތް ﷲ އެމަހުގެ ރޯދަ ފަރުޟު ކުރެއްވިއެވެ. އެމަހުގެ ރޭ އަޅުކަން ތަޠައްވުޢެއް ކަމުގައި ކަނޑައެޅުއްވިއެވެ. ރަމަޟާންމަހަކީ ކެތްތެރިކަމުގެ މައްސަރެވެ. ކެތްތެރިކަމުގެ ބަދަލަކީ ސުވަރުގެއެވެ.
މަތީގައި އެވަނީ ވަރަށް ތަފްޞީލު ޙަދީޘެއްގެ ތަންތަންކޮޅެވެ.

"ކެތްތެރިކަމުގެ މައްސަރު" ގެ އެއް މަފްހޫމަކީ ބުރަތަކެއް ތަޙައްމަލުކުރުމުގެ މައްސަރެވެ. ރޯދަމަހު މުއުމިނާއަށް އޭނާގެ އާދަތަކަށް ބަދަލުތަކެއް ގެންނާން ޖެހެއެވެ. އޭނާ ކަރުހިއްކައިގަތަސް ފެން ނުބޮއި ހުންނަން ޖެހެއެވެ. ބަނޑުހައިވިޔަސް ނުކައި ހުންނަން ޖެހެއެވެ. ތިމާގެ އެދުންތައް މަތަކޮށް ހިފަހައްޓަން ޖެހެއެވެ. ރަމަޟާންމަސް އެދެވޭ ގޮތުގައި ހޭދަކުރާން ބޭނުންވާ މީހަކަށް އެމަހަކީ މަސައްކަތެއްގެ މަހެކެވެ. ބުރަތަކެއް އުފުލަންޖެހޭ މަހެކެވެ. ޙަޤީޤީ ރޯދަވެރިޔަކަށް ރަމަޟާން މަހަކީ މެދުކެނޑުމެއްނެތި ކެތްތެރިވުމުގެ މަހެކެވެ. އެމަހުގެ ދުވާލުގެ ވަގުތުތަކުގައެވެ. ރޭގަނޑުގެ ވަގުތުތަކުގައިވެސް މެއެވެ.

އެޢަމަލަކަށް ކެތްތެރިކަމުގެ ޒަރީޢާއިން އަގުއަދާކުރާ ޢަމަލަކީ މާތްﷲ ގެ ޙަޟުރަތުގައި އެންމެ ހެޔޮކަން ބޮޑު ޢަމަލެވެ. އާންމު ޙާލަތްތަކުގައި އިންސާނާގެ ޢަމަލުތަކުގައި ޝާމިލުވަނީ އޭނާގެ ޝަޚުސިއްޔަތުގެ ބައިކުޅަބައެވެ. ނަމަވެސް އެޢަމަލެއްގައި ކެތްތެރިވާންޖެހޭ ޢަމަލުތަކުގައި އިންސާނާގެ މުޅި ޝަޚުސިއްޔަތު ވަރަށް ޢަމަލީ ގޮތެއްގައި ބައިވެރި ކުރަން ޖެހެއެވެ. ޢާންމު ޢަމަލުތަކާ އަޅާބަލާއިރު ކެތްތެރިކަން ޝާމިލުވާ ޢަމަލުތަކުގެ ދަރުމަވެސް އެހާމަތިވަނީ އެހެންވެގެންނެވެ.

ރަމަޟާންމަސް ހެޔޮގޮތުގައި ލިބިގެންފި މީހަކީ ޙަޤީޤީ މާނާގައި ކެތްތެރިކަމުގެ ދިރިއުޅުމަކަށް ތައްޔާރުވުމުގެ މަހެއްކަމުގައި އެމަސް ހަދައިފި މީހެކެވެ. މުޅި އަހަރު ކެތްތެރިކަމުގެ މަގުގައި ސާބިތުވެ ހުރުމުގެ އެކަށޭނަކަން ލިބޭފަދަ ކެތްތެރިކަމުގެ ތަރުބިއްޔަތެއް އެމަހުގައި ލިބިގެންފި މީހެކެވެ.

ލިޔުނީ: އަލްއުސްތާޛު ޢަބްދުﷲ ފާރޫޤު ޙަސަން