ޕާސްޕޯޓު ކާޑާއި ގުޅޭގޮތުން ބައެއް ފަރާތްތަކުން ސޯޝަލް މީޑިޔާގެ ވެރިފައިޑް އެކައުންޓްތައް ބޭނުންކޮށް ހަގީގަތާއި ހިލާފު މައުލޫމާތު ފަތުރާ ކަމަށާއި އެ ފަދަ ފަރާތްތަކާމެދު ފިޔަވަޅު އަޅާނެ ކަމަށް އިމިގިރޭޝަނުން ބުނެފި އެވެ. އެ އިދާރާއިން ބުނީ އިމިގްރޭޝަނުން ފޯރުކޮށްދޭ ޚިދުމަތާއި އަދި ތަކެއްޗާއި ގުޅޭގޮތުން ސައްޚަ ނޫން މައުލޫމާތު ފަތުރާ ފަރާތްތަކާމެދު ގާނޫނީ ގޮތުން އެޅޭނެ އެންމެ ހަރުކަށި ފިޔަވަޅާނެކަމަށެވެ.ރާއްޖޭގައި ތަޢާރަފު ކޮށްފައިވާ ޕާސްޕޯޓު ކާޑަކީ ޕާސްޕޯޓެކޭ އެއްފަދައިން ސަލާމަތީ ކަންކަން ވަރުގަދަ އަދި ފަސޭހައިން އެއަށް ބަދަލު ނުގެނެވޭ ގޮތަށް ފަހުގެ ޒަމާނީ ސަލާމަތީ ސިފަތަކާއެކު ތައްޔާރު ކޮށްފައިވާ ކާޑެއް ކަމަށް އިމިގްރޭޝަނުން ބުނެއެވެ. ޕާސްޕޯޓު ކާޑާއިބެހޭ ގޮތުން އިމިގްރޭޝަނުން ނެރެފައިވާ ބަޔާނެއްގައި ބުނެފައިވަނީ ޕާސްޕޯޓު ކާޑު ހައްދާ ފަރާތްތަކުގެ އެކައުންޓާއި ކާޑާއި ލިންކު ކުރަނީ ބޭންކް އޮފް މޯލްޑިވްސްއަށް ކާޑު ފޮނުވައިގެން ކަމަށާއި ކާޑު ދޫކުރާ ފަރާތުގެ ބޭންކު ތަފްސީލް ހިމަނަނީ އެބޭންކުން އަމަލު ކުރަން ހަމަޖައްސާފައިވާ އުސާލާއި އެއްގޮތަށް ބޭންކުން ކަމަށެވެ.އަދި ސިޔާސީ ގޮތުން މަންފާ ހޯދަން ހަޤީޤަތާއި ޚިލާފަށް ބައެއް ފަރާތްތަކުން ސޯޝަލް މީޑިއާގެ ވެރިފައިޑް އެކައުންޓްތައް ބޭނުންކޮށްގެން ސައްޚަ ނޫން މަޢުލޫމާތު ފަތުރަމުންދާތީ ކަންބޮޑުވާ ކަމަށާއި ބައިނަލްއަގުވާމީ ދަތުރުފަތުރު ކުރުމަށާއި ކާކުކަން އަންގާ ދިނުމުގެ ގޮތުން ތައްޔާރުކުރާ ދަޢުލަތުގެ ލިޔެކިއުންތަކާބެހޭ ގޮތުން ހަގީގަތެއް ނެތް މައުލޫމާތުތައް ފެތުރުމަކީ ދުނިޔޭގެ އެއްވެސް ޤައުމެއްގައި ކުރާ ކަމެއް ނޫން ކަމަށްވެސް އިމިގްރޭޝަންގެ ބަޔާނުގައި ފާހަގަކޮށްފައިވެއެވެ.
އިމިްގްރޭޝަނުން ބުނީ ޕާސްޕޯޓު ކާޑާއި ގުޅޭގޮތުން ހަޤީގަތެއްނެތް މަޢުލޫމާތު ފެތުރުމަކީ ޕާސްޕޯޓު ކާޑުގެ އިތުރުން ޕާސްޕޯޓުގެވެސް އިންޓެގްރެޓީ އާއިމެދު ދިވެހި ރައްޔިތުންނާއި ބޭރުގެ ފަރާރާތްތަކުން ސުވާލު އުފައްދަފާނެކަމެއްކަމަށެވެ. މިފަދަ ކަމެއް ދިމާވެއްޖެނަމަ ދިވެހީން ރާއްޖެއިން ބޭރަށް ދަތުރު ކުރުމަށް ބޭނުންވާ ވިސާ ހޯދުމުގައި ދަތިވެ، ބޭރު ޤައުމުތަކުގެ ބޯޑަރ ހުރަސް ކުރުމުގައި ދަތިތަކާއި ކުރިމަތިވެ، އިމިގްރޭޝަން ކުލިއަރަންސް ހޯދުމުގައި ލަސްވުންފަދަ ކަންކަންކަމާއި ދިވެހީން ކުރިމަތިލާން ޖެހިދާނެކަމަށްވެސް އިމިގްރޭޝަނުގެ ބަޔާނުގައި ބުނެފަވެއެވެ.