ބިހުރޯޒް ކަމަނާ މިސްކިތް ނިންމާ އަންނަ ހަފްތާތެރޭގައި ހުޅުވުމަށް މަސައްކަތް ކުރަމުންދާކަމަށް އިސްލާމިކް މިނިސްޓްރީން ބުނެފިއެވެ. އިސްލާމިކް މިނިސްޓްރީން ބުނީ މިހާރުކުރަމުންދަނީ އެ މިސްކިތުގެ ފާރު ރީތި ކުރުމުގެ މަސައްކަތް ކަމަށެވެ. އަދި އެ މަސައްކަތް ނިމުނުހާ އަވަހަކަށް މިސްކިތް ހުޅުވާނެކަމަށްވެސް އިސްލާމިކް މިނިސްޓްރީން ބުނެއެވެ.
ބިހުރޯޒް ކަމަނާމިސްކިތުގެ ޢިމާރާތަށް މައިގަނޑު އެއްވެސް ބަދަލެއް ނުގެނެސް އެމިސްކިތް ވަނީ މަރާމާތުކޮށް ނިންމާފައެވެ. ކުރިން ވިހި މީހުންނަށް ނަމާދުކުރެވޭ މި މިސްކިތުގައި ގާތްގަނޑަކަށް ފަންސާހާއި ސަތޭކައާ ދެމެދުގެ ޢަދަދަކަށް މީހުންނަށް މިހާރު ނާމާދު ކުރެވޭނެކަމަށް އިސްލާމިކް މިނިސްޓްރީން ބުނެއެވެ.
މިދިޔަ ރަމަޟާންމަހަށް މިސްކިތް ހިޔާ ކުރުމުގެ މަސައްކަތްކުރުމުންދިޔައިރު މިސްކިތުންވަނީ ގަބުރުފެނިފައެވެ. އެގޮތުން އެ ސަރަހައްދު ކޮނެގެން 14 ގޯނީގެ ގަބުރު ވަނީ ނަގާފައެވެ. އޭގެ ސަބަބުން އޭރުވަނީ މިސްކިތުގައި ނަމާދުކުރުން ހުއްޓާލާފައެވެ.