މެލޭޝިޔާގެ ޔުނިވަރސިޓީތަކުން ލިބެން ހުރި މަތީ ތަޢުލީމުގެ ފުރުޞަތުތަކާއި ސްކޮލަރޝިޕްތަކާއިބެހޭ މަޢުލޫމާތު ދިނުމަށް ބާއްވާ މެލޭޝިޔާ އެޑިއުކޭޝަން އެކްސްޕޯ މާދަމާ ފަށާނެއެވެ.
މި އެކްސްޕޯއަކީ މެލޭޝިޔާގެ ހަޔަރ އެޑިއުކޭޝަން މިނިސްޓްރީގެ ދަށުން ހިންގަމުންދާ އެޑިއުކޭޝަން މެލޭޝިޔާ ގްލޯބަލް ސަރވިސަސް (އީ.އެމް.ޖީ.އެސް) އިން އިންތިޒާމް ކޮށްގެން ކުރިއަށްގެންދާ އެކްސްޕޯއެކެވެ. އެކްސްޕޯގައި މެލޭޝިޔާގައި ފާހަގަކޮށްލެވޭ 17 ޔުނިވަރސިޓީއަކާއި ކޮލްޖްތަކުން ބައިވެރިވާނެއެވެ. މީގެ އިތުރުން ޑިޕާރޓްމަންޓް އޮފް ހަޔަރ އެޑިއުކޭޝަންނުންވެސް މި އެކްސްޕޯގައި ބައިވެރިވެ މަތީ ތަޢުލީމުގެ ފުރުޞަތުތަކާއި ސްކޮލަރޝިޕްތަކާ ގުޅޭ މަޢުލޫމާތު ފޯރުކޮށްދޭނެ ކަމަށް އެޑިއުކޭޝަން މިނިސްޓްރީން ބުނެއެވެ. މެލޭޝިއަން އެކްސްޕޯ ފެށުމުގެ ކުރިން ހޮޓެލް ޖެންގައި މިއަދު ބޭއްވި ހަފްލާއެއްގައި ވާހަކަދައްކަވަމުން އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ. އަބްދުﷲ ނަޒީރު ވިދާޅުވީ މަތީ ތަޢުލީމްގެ ފުރުޞަތުތައް ހޯދުމަށް ގިނަ ޤައުމުތަކާއެކު މަޝްވަރާ ކުރަމުންދާކަމަށެވެ. އެގޮތުން ފިލިޕީންސްއާއި ތައިލެންޑްއާއި އިންޑިއާ އަދި ސްރީލަންކާއާއެކު މަސައްކަތް ކުރަމުންދާކަން އޭނާ ފަހަގަ ކުރެއްވިއެވެ. މީގެ އިތުރުން ސްޓޭޓް މިނިސްޓަރ ވަނީ މެލޭޝިޔާއިން ރާއްޖެއަށް މަތީތަޢުލީމްގެ ފުރުސަތުތައް ދެއްވާތީ އެކަން ފަހަގަކޮށް ޝުކުރު އަދާކުރައްވާފައެވެ.
"ސަރުކާރުގެ އަމާޒަކީ މަތީތަޢުލީމްގެ ގިނަ ފުރުޞަތުތައް ރާއްޖޭގެ ޒުވާން ކުދިންނަށް ހޯދައިދިނުން. އީ.އެމް.ޖީ.އެސްގެ ފަރާތުން ދިވެހި ސަރުކާރަށް ދޭ ގިނަ އަދަދެއްގެ މަތީ ތަޢުލީމްގެ ސްކޮލަރޝިޕްތަކެއްވެސް ކައިރި މުސްތަޤްބަލެއްގައި އިޢުލާން ކުރާނެ" އެޑިއުކޭޝަން މިނިސްޓްރީގެ ސްޓޭޓް މިނިސްޓަރ ޑރ. އަބްދުﷲ ނަޒީރު ވިދާޅުވިއެވެ.
މި ހަފްލާގައި ވާހަކަދައްކަވަމުން ރާއްޖެއިން މެލޭޝިޔާއަށް ކަނޑައަޅުއްވާފައި ހުންނަވާ ސަފީރު މުޙައްމަދު ފަހުމީ ޙަސަން ވިދާޅުވީ މި އެކްސްޕޯއަކީ މަތީ ތަޢުލީމް ހާސިލްކުރަން ބޭނުންވާ ޒުވާން ކުދިންނަށް ވަރަށް ރަނގަޅު ފުރުޞަތެއްކަމަށެވެ. މެލެޝިޔާއަށް ތަޢުލީމް ހާސިލް ކުރަންދާ ދަރިވަރުންނަށް، މެލެޝިޔާގެ ސަރުކާރާއި ރާއްޖެއިން ގުޅިގެން ވިސާ ހޯދުމަށް ލުއިފަސޭހަ ގޮތްތަކެއް ހޯދާފައިވާކަން ސަފީރު ފާހަގަކުރެއްވިއެވެ.
"ލޯނުގެ އެހީގައި ކިޔަވާ ކުދިންކަމުގައިވިއަސް، އަމިއްލަ ޚަރަދުގައި ކިޔަވައި ކުދިންކަމުގައި ވިއަސް އަދި ސަރުކާރުގެ ސްކޮލަރޝިޕްގައި ކިޔަވަކުދިންނަށްވެސް ކުރަންޖެހޭ ޚަރަދު ވަރަށް ބޮޑަށް ކުޑަވެގެންދާނެ." މުޙައްމަދު ފަހުމީ ޙަސަން ވިދާޅުވިއެވެ.
މި މަހުގެ 28 އަދި 29 ގައި ދަރުބާރުގޭ ފާށަނާ މާލަމުގައި ބާއްވާ މެލޭޝިޔާ އެޑިއުކޭޝަން އެކްސްޕޯ ކުރިއަށްދާނީ މި ދެދުވަހުގެ މެންދުރު 2 ން ރޭގަނޑު 10 ޖެހުމާ ހަމައަށެވެ.