ކޯވިޑް-19 އަށް ފަރުވާ ހޯދަމުންދިޔަ އިތުރު ދިވެއްސެއް ނިޔާވެއްޖެއެވެ.
އެޗްޕީއޭއިން ވިދާޅުވީ މިއަދު ހެނދުނު 9:33 ހާއިރު ދަރުމަވަންތަ ހޮސްޕިޓަލްގެ ޑީއެޗް 11 ގައި ފަރުވާ ދެމުންދިޔަ އުމުރުން 100 އަހަރުގެ ދިވެހި ފިރިހެނެއް ނިޔާވެފައިވާކަމަށެވެ. މި މަރާއެކު މިއަދުގެ މިހާތަނަށް ކޯވިޑް ޖެހިގެން 2 މީހަކު ވަނީ ނިޔާވެފައެވެ.
މިއަދު އެންމެ ފުރަތަމަ ނިޔާވީ އުމުރުން 86 އަހަރުދެ ދިވެހި ފިރެހެނެކެވެ. ހެލްތު ޕްރޮޓެކްޝަން އެޖެންސީ އެޗްޕީއޭއިން ވިދާޅުވީ ނިޔާވީ ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ ދިވެހި ފިރިހެނެއްކަމަށެވެ. އޭނާ ނިޔާވީ ރޭ 12:19 ހާއިރުއެވެ.
ރާއްޖެއިން މިބަލީގައި ނިޔާވި މީހުންގެ އަދަދު ވަނީ 187 އަށް އަރާފައެވެ. އޭގެތެރޭގައި ހިމެނެނީ 170 ދިވެހިންނާއި 17 ބިދޭސީންނެވެ.
ކޯވިޑް-19ގައި ރާއްޖޭގެ ޙާލަތު އެންމެ ގޯސްވީ މިދިޔަ މަހުއެވެ. މިބަލީގައި މިދިޔަ މަހު 80 އަށްވުރެ ގިނަ މީހުން ވަނީ ނިޔާވެފައެވެ.
އިއްޔެވެސް ރާއްޖެއިން ކޯވިޑް ޖެހިގެން ފަރުވާ ދެމުންދިޔަ 3 މީހަކު ވަނީ ނިޔާވެފައެވެ. އިއްޔެ ނިޔާވެފައިވަނީ ހުޅުމާލެ މެޑިކަލް ފެސިލިޓީގައި ފަރުވާދެމުންދިޔަ އުމުރުން 93 އަހަރުގެ ފިރިހެނަކާއި 82 އަހަރުގެ ދިވެހި އަންހެނަކާއި 41 އަހަރުގެ ދިވެހި އަންހެނެކެވެ.