އެމެރިކާގެ ކުންފުނިތަކުން ރޮބޮޓު ބޭނުންކުރާ މިންވަރު ރެކޯޑު އަދަދަކަށް އިތުރުވެއްޖެ

އެމެރިކާގެ ކުންފުނިތަކުން މަސައްކަތުގައި ރޮބޮޓު ބޭނުންކުރާ މިންވަރު ރެކޯޑު އަދަދަކަށް އިތުރުވެއްޖެއެވެ.

އެސޯސިއޭޝަން އޮފް އެޑްވާންސިންގ އޮޓޮމޭޝަނުން އާއްމުކޮށްފައިވާ ހިސާބުތައް ދައްކާގޮތުން މިއަހަރުގެ ފުރަތަމަ ނުވަ މަސްދުވަސްތެރޭ، ކުންފުނިތަކުން 29000 ރޮބަޓަށް އޮޑަރު ދީފައިވެއެވެ. މިއީ މިދިޔަ އަހަރުގެ މި މުއްދަތާއި އަޅާ ބަލާއިރު 37 އިންސައްތަ އިތުރު އަދަދެކެވެ. އޯޑަރު ދީފައިވާ ރޮބޮޓުތަކުގެ އަގު 1.48 ބިލިއަން ޑޮލަރަށް އަރާކަމަށްވެސް ތަފާސް ހިސާބުތަކުން ދައްކައެވެ.

ޕެންޑެމިކް އާއި ގުޅިގެން ވިޔަފާރިތައް ހުއްޓުމަކަށް އައިސް އަލުން ފަށައިގަންނަމުންދާއިރު، ބޭނުންވާ ވަރަށް މުވައްޒަފުން ނުލިބުމުން ކުންފުނިތަކުންވަނީ މަސައްކަތުގައި ރޮބޮޓުތައް ބޭނުންކުރަން ފަށާފައެވެ.

ރޮބޮޓުތައް ބޭނުންކުރާ އިންޑަސްޓްރީތައްވެސް ދަނީ އިތުރުވަމުންނެވެ. މީގެކުރިން ރޮބޮޓުތައް އެންމެ ގިނަ އަދަދަކަށް ބޭނުންކުރަމުން އައީ އެއްގަމު އުޅަނދު އުފައްދާ ކާރުޚާނާތަކުގައެވެ. އެހެންނަމަވެސް ފުރަތަމަ ފަހަރަށް އެހެން ހުރިހާ ސިނާއަތެއްގައި ރޮބޮޓުތައް ބޭނުންކުރާ މިންވަރު ވަނީ އެއްގަމު އުޅަނދު އުފައްދާ ކުންފުނިތަކަށްވުރެ އިތުރުވެފައެވެ.

އެގޮތުން މިއަހަރުގެ ފުރަތަމަ ނުވަމަސްދުވަސްތެރޭ އެއްގަމު އުޅަނދު އުފައްދާ ކުންފުނިތަކަށް ވަނީ 20 އިންސައްތައިގެ ކުރިއެރުމެއް ލިބިފައެވެ. އަދި އެހެން ހުރިހާ ސިނާއަތެއް އެއްކޮށް ލިބުނު ކުރިއެރުންވަނީ 53 އިންސައްތައަށް ކުރިއަރާފައެވެ.