ދާންދޫގެ ފެނުގެ ޚިދުމަތާއި ކޮލަމާފުށީގެ ފެނަކަ އޮފީހާއި ވޮލީކޯޓް ރައީސް ހުޅުއްވައިދެއްވައިފި

ގއ. ދާންދޫގައި ފެނުގެ ޚިދުމަތް ރަސްމީގޮތުން ފަށްޓަވައިދެއްވައި ގއ. ކޮލަމާފުށީ ފެނަކަ އޮފީހާއި ވޮލީކޯޓް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ރަސްމީގޮތުން މިއަދު ހުޅުއްވައިދެއްވައިފިއެވެ.

ރައީސުލްޖުމްހޫރިއްޔާ މިތަންތަން ހުޅުއްވައިދެއްވައި ޚިދުމަތްތައް ފަށްޓަވައިދެއްވާފައި ވަނީ އެމަނިކުފާނު މިހާރު ގއ.އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.

ދާންދޫގައި ފެނުގެ ނިޒާމު ޤާއިމުކުރުމުގެ މަސައްކަތްކޮށްފައި ވަނީ ޓްރިވެނި އިންޖިނިއަރިންގ އެންޑް އިންޑަސްޓްރީސް ލިމިޓެޑާއި ހަވާލުކުރައްވައިގެންނެވެ.

ކޮލަމާފުށީގައި ހުޅުވި ފެނަކަ އޮފީހަކީ 50 މުވައްޒަފުންގެ ޖާގައިގެ އޮފީހެކެވެ. މިއޮފީހުގައި ރިސެޕްޝަން، ލޮބީ، މެނޭޖަރ ރޫމް، މީޓިން ރޫމާއި ރެސްޓްރޫމް ހިމެނެއެވެ. މިއޮފީސް ޤާއިމްކޮށްފައިވަނީ ޒަމާނީ ވަޞީލަތްތަކާއެކުއެވެ. ކޮލަމާފުށީގެ ވޮލީކޯޓަކީ ދައުލަތުގެ ބަޖެޓުން ޚަރަދުކުރައްވައިގެން ތަރައްޤީކޮށްފައިވާ ވޮލީކޯޓެކެވެ.

އަތޮޅުތަކުގެ ރަށްރަށުގައި އަސާސީ ޚިދުމަތްތައް ޤާއިމްކޮށް، ރައްޔިތުންގެ ދިރިއުޅުމުގެ ފެންވަރު މަތިކުރުމަށްޓަކައި، ސަރުކާރުން ވަނީ، އަތޮޅުތަކުގެ ރަށްރަށުގައި ޢުމުރާނީ ތަރައްޤީގެ ވަރަށް ގިނަ މަޝްރޫޢުތައް ހިންގަވާފައެވެ. އަދި ފަޚުރުވެރި، އަބުރުވެރި ދިރިއުޅުމެއް އުޅެވޭނެހެން މަގުފަހިކުރުމަށް ރާއްޖޭގެ ރަށްރަށުގެ ތަރައްޤީއަށް ސަރުކާރުން ގެންދަވަނީ ގިނަ ގުނަ މަސައްކަތްތަކެއް ކުރައްވަމުންނެވެ.