އާމްދަނީން ލިބުނު ފައިދާގެ 60 އިންސައްތަ ޚަރަދު ކުރީ ރައްޔިތުންނަށްޓަކައި: ޤާސިމް

ޢާމްދަނީން ލިބޭ ފައިދާގެ ގާތްގަނޑަކަށް 60 އިންސައްތަ ޚަރަދުކުރީ، އިންސާނިއްޔަތާއި ސިޔާސީ، އިޖުތިމާޢީ، އަދި އިޤްތިޞާދީ ގޮތުން ޤައުމު ކުރިއެރުވުމަށްޓަކައިކަމަށް ޖުމްހޫރީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހިމް ވިދާޅުވެއްޖެއެވެ.

ޖުމްހޫރީ ޕާޓީން ށ. ފޭދޫގައި ބޭއްވި ކެމްޕޭން ޖަލްސާގައި ވާހަކަފުޅުދައްކަވަމުން ޤާސިމް ވިދާޅުވީ ކުލަބު ޖަމިއްޔާތަކަށާއި، އިޤުތިޞާދީ ގޮތުން ރާއްޖޭގެ އެކި ރަށްރަށް ކުރިއެރުވުމަށްޓަކައި ވަރަށް ގިނަ ކަންތައްތަކެއް ކޮށްދެއްވާފައިވާނެ ކަމަށެވެ. އަދި މީހަކު ކަމަކާއިގެން އަތުވެއްޖެނަމަ، ވީވަރަކުން އެކަމެއް އެ މީހަކަށް ކޮށްދެއްވިކަމަށްވެސް ޤާސިމް ވިދާޅުވިއެވެ. މީގެ އިތުރަށް ޤާސިމެކޭ އެއްގޮތަށް ދިވެހި ރައްޔިތުން ކުރިއަރާ ދިއުމަކީ އެމަނިކުފާނު އެދޭ ގޮތްކަމަށްވެސް ޤާސިމް ވިދާޅުވިއެވެ.

"އިސްލާޙީ މަސައްކަތްތަކުގައި އަޅުގަނޑަށް ލިބެމުން އައި ފައިދާގެ ގާތްގަނޑަކަށް 60 ޕަސެންޓް، އިންސާނިއްޔަތަށްޓަކައި މި ޤައުމުގެ ކުރި އެރުމަށްޓަކައި، ސިޔާސީ، އިޖުތިމާޢީ އަދި އިޤުތިޞާދު ކުރިއެރުވުމަށްޓަކައި ކުރެވޭ މަސައްކަތްތަކުގައި ތަފާތު ރޮނގު ރޮނގުން އަޅުގަނޑަށް ކޮށްދެވެން އޮތް މިންވަރަކަށް، އަޅުގަނޑު އައީ ޚަރަދު ކޮށްދެމުން." ޤާސިމް ވިދާޅުވިއެވެ.

ޤާސިމްގެ ކެމްޕޭނު ދަތުރުތަކުގެ ތެރެއިން މިހާރު ކުރިއަށް ގެންދަވަނީ ބޮޑުތިލަދުންމައްޗަށް ކުރައްވާ ދަތުރުފުޅުތަކެވެ. އެގޮތުން، ހދ، ހއ، އަދި ށ އަތޮޅުގެ ބައެއް ރަށްތަކަށް ޤާސިމް ވަޑައިގަތުމަށްވަނީ ހަމަޖެހިފައެވެ. ޤާސިމްގެ ކެމްޕޭނު ދަތުރުތައް ރަސްމީކޮށް ފަށްޓަވާފައިވަނީ، އެމަނިކުފާނުގެ އުފަން ރަށްކަމަށްވާ އދ. މާމިގިލީންނެވެ.